ZU CHUNGCHANGA BIBLE ZIRTIRNA

Lalṭanpuia Ngente

Thuhma tlem han nei ila. Mithiam, psychologist te chuan, mihring seilian 95% vel hian tleirawl chhuah hawi harh hun, kan ban phaka khawvel chen duh hun lai kan nei vek a, chutiang nei lova puitlin thlenga zi chhuak chu 5% vel chauh an awm an ti a.

Ruih theih thil chi hrang hrang hi an ṭha lo vek a, an ṭhat loh dan leh mihring taksa leh rilru an tih chhiat theih dan te, an tih chhiat chak dan te erawh chu a inang vek lo va. Chung ruih theih thil chi hrang hrang zingah chuan zu hian mihring a ti chhe muangin a ti chhe nep ber e an tih chu.

Tin, thlirna pakhatah chuan, ‘Ruih theih thil zawng zawng hi tih bo vek theih a nih chuan a ṭha ber a, mahse kan tih bo vek theih si loh avangin ṭhalaite tana pawi nep ber awlsama siam mai hi a fin thlak a ni’ an ti bawk.

Kohhra hian kan mipuite nun hi piantharna dik takah hruai lut vek thei ila chuan duhthusam ber a ni a, mahse, zêp thu a cheng lo, kohhranhoten chu chu kan thei si lo va, an tan ruih theih thil ṭha lo zawk drugs etc. te awlsam zawka a awm ai chuan pawi nep zawk zu hi awlsam zawkah awm se a ṭha zawk lawm ni,’ ti zawnga ngaihtuah pawh a awm theih bawk awm e.

Engpawh ni se keini chu kohhran mi kan ni a, kohhran ṭawnga ṭawng tur leh ṭawng ṭhin kan ni a, khawvel mithiamte thlir dana thlir ve thei kan ni lo. Chuvangin kohhran hian ruih theih thil chungchangah hian Biblical takin inzirtirna mumal kan neih a ngai hle a, eng pawh ni se fakmawi lovin, mimal ngaihdan pawh rawlh hek lovin, Bible mila kal tawp mai hi a himin kohhran tan pawh a ṭha berin a rinawm. Chuvangin khawvel miten an thlir dan leh an do dan system hmangin kan thlirin kan do ve tur a ni lo va, khawvel mite system anga kan do ve a nih chuan kohhran hian kan ti sual viau thei a, ram leh kohhranin a tawrhna pawh a thlen hial zawk thei a, Pathian pawhin min pui kher lo vang.

Bible hi ngun taka kan en chuan, leilung leh a chhunga thil awm zawng zawng hi Pathian aṭanga chhuak vek a ni a, Pathian chuan engkim mai hi a ṭha zawnga kan hman a phal vek a, a ṭha lo zawnga kan hman a phal lo vek bawk a.

Tin, Bible-ah hian ‘Thupek’ (Commandment) a awm a, chu chu, ‘tih ngei ngei tur leh tih miah loh tur’ a ni a. Commandment chu thlarau thih leh dam hril nghal a ni. Tichuan, ‘Thurawn (Advice) a awm bawk a, chu chu, ‘tih atana ṭha leh tih loh atana ṭha inkawhhmuhna’ a ni a. Advice chu chawp leh chilha thlarau thih leh dam hril nghal ni lovin, ringtu nun kawng zawh dan tura thurawn, kawng ṭha leh ṭha lo inkawhhmuhna a ni ber. Hetiang hian Bible zirtirna hi hlawm hnih lian puiah a inṭhen phawk a ni.

Tichuan, Bible-a Zu chungchang zirtirna hi ‘Commandment’ chhunga mi ni lovin Advice huang chhunga awm a ni a. Hemi mil hian kohhranho ten zirtirna kan kalpui ngam leh kan kalpui thiam a ngai hle a, chu chu hemi kawnga rawngbawl dan dik leh Bible nena inmil a ni. A bakchham chu, kohhran leh Pathianthu kan behchhan a nih si chuan Pathianthu tihdanglam tumna a tling hial awm e.

Bible-a Zu chungchang a lanna hmun hrang hranga mite hi ngun taka kan zir chuan, Zu khap leh nuaibo lam min zirtir lo va, Zu ruih leh zu heh ṭhat loh zia leh, a ṭha lo zawnga hmang lo tura uar taka zirtirnate an ni hlawm a, a hunah chuan a hman dan tur tawka hman dan pawh min zirtir bawk a ni.

Aw le, Zu chungchanga Bible zirtirna kan hriat fiah theih nan Bible-a Zu leh Uain ṭhatlohna lam zirtirna leh a ṭha zawnga hman dan tur min zirtirna langsar zualte han tar lang ila, tin, bible-a Zu an hmannate pawh tar lang tel bawk ila, tichuan a hrethiam duh tan chuan Zu chungchanga Bible zirtirna dik kan hrethiam thei mahna.

A ṬHATLOHNA LAM ZIRTIRNA

(Isaia 5:11 “Zu um tura zing tak taka thova, uainin a tihruih bung hma lohva zan rei tak tak thlenga awm ṭhinte chu an chung a pik e!”)

(Isaia 5:22 “Uain in kawnga mi chak tak, zu chawhpawlh kawnga thahrui nei mite chu an chung a pik e!”)

(Thufingte 20:1 “Uain hi nuihzatbura mi siamtu a ni a, Zupui hi insual bung bungna a ni; Chumi buma awmte chu an fing lo a ni.”)

(Thufingte 21:17 “Nawmsakna thlahlel chu mi rethei a ni ang a, Uain leh hriak ngaina mi chu a hausa lo vang.”)

(Thufingte 23:20-21 “Uain heh mite zingah leh Sa heh mite zingah tel suh; Zu rui mite leh sa heh mite chu an lo rethei dawn si a, Nguinain puan chhia a sintir ang.”)

(Thufingte 23:29-30 “Tute nge chungpik ṭhina, tute nge lungngai ṭhina, tute nge inhau ṭhin? Tute nge thubuai nei ṭhina, tute nge a vang awm lova hliam tuar ṭhina, Tute nge mit sen rem rum ṭhin le? Zu hmuna awm reng ṭhinte, Zu chawhpawlh in ṭhinte an ni.”)

(Galatia 5:21 “itsikna te, zu ruihna te, zu hmun hlimna te, chuti angte chu; chung kawngah chuan tun hmaa, “Chutiang thil tih hmangte chuan Pathian ram an chang lo vang,” tia ka hrilh lawk che u ang khan ka hrilh lawk che u hi.)

(1 Korinth 6:10 “ruk hmangte emaw, mi duhamte emaw, zu ruih hmangte emaw, mi hau hmangte emaw, hleprute emawin Pathian ram an luah lo vang.”)

(Efesi 5:18 “Tin, uain ruiin awm suh u, chumiah chuan insum lohna a awm si a; Thlarauva khatin awm zawk rawh u.”)

(Tita 2:5 “an awm dan renga Pathian zah mite niin, hêktute leh uain heh mite ni lova, ṭha lam zirtirtute ni turin fuih bawk rawh.”)

👆 Aw le, khingte khi Bible-a Zu leh Uain ṭhat loh zia zirtirna langsar leh strong deuh deuhte an ni a. (Zu leh uain hi thil thuhmun, a ṭhatna leh ṭhatlohna te, mihringa hna an thawh dan te pawh thil thuhmun reng a ni a, Bible pawhin a ṭhatna leh ṭhatlohna min zirtirnaah hian thliar hrang lem lovin a sawi pawlh vek a ni.)

Tichuan, khingte khi ngun taka kan zir chian chuan, Uain leh Zu avanga tisa tak pawha kan chunga chhiatna leh mualphona nasa tak a thlen theih zia uar takin min zirtir a. Chu mai bakah Zu ruih hmangten Pathian ram an luah loh tur zia pawh chiang takin min hrilh a ni. (Hei hi, lei nuna Pathian ram thlennate leh Van Nun hi a inzawm tlat avangin, ‘Zu ruih hmangte chuan Van ram an kai lo vang’ tihna tluk a ni.) Amaherawhchu, khing zirtirna zawng zawng khi ngun taka kan ngaihtuah chuan ‘Zu’ an bitum lo va, Zu khap leh nuai bo lam an zirtir lo va, mihring lam zawk an bitum vek tih kan hre thei ang.

Tichuan, khingho zingah khian ‘Galatia 5:2’ leh ‘1 Korinth 6:10’ te khi an pawimawh bikin ngaih sual pawh an awl bik a, ngai sual pawh an tamin ‘Zu in hrim hrimin van ram an lut lo vang’ tia hrilh fiah ta mai te pawh an awm nawk ṭhin a, chuvangin sawi fiah an ngai bik a.

Zu ruih hmangten… Pathian ram an luah lo vang,’ tih awmzia dik tak chu hei hi a ni. Miin Zu emaw, Uain emaw, ruih a chin fo chuan, Zu leh Uain te chuan thisen ti luma thinlung an tih puam ṭhin avangin insumtheihna an ti bo va, pawisak neih lohnaah mihring an hruai lut ṭhei a, chuvangin Zu ruih ching fo mi chuan insum theihna tlachhamin Pathian duh loh zawng pawisak lohna a lo nei ṭhin a, chuvangin thlarau thihnaah a tlu lut nge nge ang’ tia zirtirna a ni a, Pathian thuin a hman dan tur tawk a zirtir anga hman chu a hmer tel lo a ni.

A HMAN DAN TUR TAWK ZIRTIRNA LEH A ṬHA LAMA SAWINA LAM

(Isaia 55:1 “Hawh u, tuihal apiangte u, tuiahte hian lo kal rawh u; tangka nei lote pawh, lo kal ula, lei ula, ei rawh u. A ni, lo kal ula, uain leh hnutetui tangka pe lovin, a man pawh pe lovin lei rawh u.”)

Helai thu hi Pathianin chatuan nunna hlu tak a thlawna laa nei tura min sawmna a ni a. Chu chatuan nunna hlu tak chu lei thil hlu hmangin a tehkhin a, chutah chuan ‘Uain’ chu chatuan nunna hlu tak tehkhin nan a hmang tel a ni. ‘Uain’ hi khatih hun laia Hebrai-te leh hnam dangte pawhin tisa chaw, tisa nunna hnar ber pakhata an hman ṭhin a ni a, Pathianin a khap sak lo va, Uain ngah chu an tan Pathian malsawmna ropui tak a ni.

(Thufingte 31:6-7 “Boral dawn ṭepte chu rakzu pe ula, Mi lungngai chu uain pe rawh u. In sela, a pachhiatna chu theihnghilh sela, A hrehawmzia chu hre reng lo rawh se.”)

Helai thuin sawi a tum hi chu kan chiang mai awm e. A sawi tum a sawi ruala lo lang fiah tel nghal a awm bawk. *’Pathian thuin rakzu leh Uain a khap lo va, nuai bo a tum lo va, a hunah chuan mi lungngai leh na tuarte hnemtu atana a ṭhat dan min kawhhmuh a ni.

-(Ezekiela 44:21 “Puithiam chuan hung chhungnung zawk an luh chuan uain an in tur a ni lo.”)*

Helai hi ngun taka kan en chuan, Puithiamte tan pawh Uain in phal sak an ni a, mahse, Biakbuk hung chhungnung zawka an luh dawn erawh chuan an in tur a ni lo.

(Deuteronomy 14:26 “tin, pawisa chu in rilrua in duh ber, bawngpa emaw, beram emaw, uain emaw, zupui emaw, in rilrua in châk zawng ang apiang atan in hmang ang a; chutah chuan Lalpa in Pathian hmaah in ei ang a, hlim takin in awm tur a ni, nangni leh in chhungte nen;”)

Helai hi Israel te Kanaan ram an la thlen hma a ni a. Kanaan ram an luh hun chuan Pathianin amah an biakna tur hmun a ruat bikah amah be turin an kal ṭhin tur a ni a, chuta an thil ken tura a tukte chu an kalna tur a hlat avanga an ken theih dawn loh chuan suma chan tirin, chu sum chuan an thinlungin a châk zawng an leia an ei a phal sak thu a ni a, chung zingah chuan ‘Uain emaw, Zupui emaw’ pawh a tel a ni.

(Thufingte 3:9-10 “I sumin Lalpa chawimawi la, I thil lo pung hmasa ber zawng zawngte nen; Tichuan, i buh in chu a lo khat liam ang a, I sawrkhur chu Uain tharin a luang liam ang.)

Helai thu hi mahni neih sum ngei hmanga Lalpa chawimawituin Pathian hnen aṭanga malsawmna a dawn tur thu sawina a ni a, an sawrkhur Uain thara luang liam zawih zawih chu malsawmna ropui tak a ni.

(Mika 2:11 ‘Uain leh zu a luang ang,’ tia dawt sawi zawlnei vak velte chu heng mite zawlnei ni awm lek hi an ni.”)

Hetah pawh hian Uain leh Zu luang liam zawih zawih khawp chu Pathian malsawmna a ni tih a lang bawk.

(Luka 7:33-34 “Baptistu Johana chu a lo kal a, chhang a ei lo va, Uain pawh a in lo va, nangnin, ‘Ramhuai a zawl a nih hi,’ in ti a. Mihring Fapa a lo kal a, a eiin a in a, nangnin, ‘En teh u, chaw heh mi, Uain heh mi, chhiahkhawntute leh mi sualte ṭhian saw!’ in ti si a.”)

Hetah hian Lal Isuan Uain hi khapa nuai bo hi a tum a ni lo va, amah ngei pawhin a in ṭhin tih kan hre thei a ni.

(Johana 2:9 “Tin, ruaiṭheh fatu chuan tui uaina lo chang ta chu a tem a, a chhuahna chin a hre lo va (tui thal rawngbawltute erawh chuan an hria a), nupui nei tura chu a ko ta a,”)

Hei hi Lal Isuan tui Uain-a a chan tir thu kha a ni a. Hetah pawh hian Lal Isuan Uain hi a pawngpaw do ngawt lo tih a lang bawk a, a ṭul hunah chuan a tipung mai zawk tih kan hmu.

1 Timothea 5:23 “Tui chauh in mi ni tawh suh la, i pum avang leh i damloh fo avangin uain tlem te hmang ṭhin ang che.”)

Hetah hian Tirhkoh Paula, ‘Zu ruih hmang ten Pathian ram an luah lo vang’ titu khan Timothea hnenah chuan a dam loh fo avang leh a pum lam chak loh avangin tui chauh in mi ni tawh lovin ‘Uain’ chu damdawi atan tlem tlema hmang ṭhin turin thurawn a pe a. Tirhkoh Paula pawh hian a pawng a puiin Zu leh Uain hi a do ngawt lo va, a ṭul hunah chuan mamawh dan azira hman a dodal lo tih kan hmu.

(Mathaia 26:27-29 “Tin, no a la a, lawm thu a sawi a, an hnenah a pe a, “In zain in rawh u;  hei hi ka thisen, sualte ngaihdam nana mi tam tak tana chhuak tur, thuthlunna chu a ni. Nimahsela, ka hrilh a che u, ka Pa ramah nangmahni nena a thar ka in ni a thlen hma loh zawng, tun achinah grep hrui raha mi hi ka in leh tawh lo vang,” a ti a.)

Helai hi Lal Isua leh a zirtir ten zanriah hnuhnung an kil thu kha a ni a. No chhunga awm Uain chu Lal Isuan sualte ngaihdam nana mi tam tak tana chhuak tur a thisen (entirna) a nih thu a sawi a. 1 Korinth 11:25 lamah phei chuan tirhkoh Paula chuan, “He no hi ka thisena thuthlung thar chu a ni, in in apiangin mi hriat reng nan hei hi ti ṭhin rawh u,” a tih kha, tiin Lal Isuan amah hriat reng nana ti ṭhin tura a chah thu a sawi a ni.

Khing zawng zawngte khi ngun taka kan thlir chuan Pathian thu hian ‘Zu’ hi a dovin nuai bo a tum lo va, Lal Isua leh Pathian thuah hmun pawimawh tak a luah ve zawk tih kan hmu a. Amaherawhchu, thil hman sual awl tak, taksa chunga chhiatna leh lungngaihna nasa taka thlen thei, thlarau boralna thlenga min hnuk lut awlsam em em tu a nih avangin Zu lakah hian fimkhur a ngaih zia min hrilh uar hle a, Thlarau nun puitlinna tak tak leh thlaraua khat nun nei lo tan chuan hnaih loh tawp a ṭha ber tih a lang reng mai.

Heng kan han tar lan leh kan han sawizauna zawng zawngte hi Zu fakmawi tumna lam a ni lo va, Zu chungchanga Bible zirtirna dik kan hriat theihna tur a ni.

Aw le, Pathian chuan a thil siam zinga mi a enga mah hi, sual hmanrua pawh ni se mihringte lak aṭanga nuai bo hi a tum ngai lo va, mihring zawk hi sual leh thil ṭha lo lak aṭanga min lak chhuaha nun thar min neih tir hi a tum chu a ni zawk a. Chu chu Pathian hna thawh dan a ni a, ringtuten kan zuia kan inzirtir dan tur pawh a ni a, hei hi a Biblical em em a ni.

Zu chungchang bikah pawh hian, duh thlan theih ni ta se, kan ṭhalaite kut aṭanga zu no ben buak sak ai chuan, zu no lak aṭanga kan ṭhalaite nun lak chhuah hi kan thlan tur dik tak zawk a ni a, chu chu kan hma lak dan tur dik pawh a ni a, hei hi a tlo a, a Biblical a, nun tak a ni bawk ni.

Zu ûm chu thler tinah in hûng tlar tuar mahse, kohhranhoten kan mipuite nun hi zu ûm lak aṭanga kan lak chhuah chuan Zu-in min ti buai chuang lo vang. Hei hi kohhranhoten ṭan kan lak dan tur Bible mil thlap a ni a, sorkarin zu a zawrh hnuah phei hi chuan tunhma aia nasa lehzuala ṭan la tur kan ni tih rilru pua kan thawh nasat lehzual a ngai hle a ni.

Thlirna pakhatah chuan, ”Kohhran hian lang thei lamah pawh kan do ang a, lang thei lo thlarau nun siamtharna lamah pawh kan thawk bawk tur alawm,’ kan ti bawk a. Hetianga kan ti ṭalh a nih chuan keini ang Biblical view chauha thil thlir ṭhin tan chuan sawi ve tur a vang hle.

Kohhranho ten lang thei lo thlarau nun siamtharna lama kan mawhphurhna hi ngaihpawimawh bera kan neih tak zeta awmze nei leh Pathian puih tlaka ṭhahnem kan ngaih phawt chuan Zu hi lang thei lama do ngai loin kan siam thei zawk tur a ni a. Mahse, Zoram kohhrante hian lang thei lama kan do nasat ang leh kan au nasat ang chen hian lang thei lo thlarau nun siamṭhatna lama ṭhahnemngaih hi har kan tiin Pathiana kan mawhphurhna hi kan tlin lo deuh niin a lang a, thawk viauin inhre mah ila kan mipuite nun kan siam ṭha zo lovin Krista ke bul kan thlen kim thei mawlh si lo va, hei vang hian kan ramah hian Zu hi buaipui chiam ngai a ni ta kan ti thei ang em.

Zu chungchangah hian Sawrkar leh NGO te chu an ṭha tih anga kalin an duh leh phalraiin an duh leh do sela, an duh leh na takin do sela, keini kohhran leh Pathian thu behchhan tlat tute tan chuan kan sawi phak a awm âwm lo ve. Kohhran leh Pathian thu behchhan tlat tute hi chu Pathian thu pel lo leh paih ṭhen lo, Bible mila kan kal a dikin a rinawm.

Leave a Reply

Your email address will not be published. Required fields are marked *

error: Content is protected !!