Zozam par – KC Lalvunga

ZOZAM PAR
Phuahtu – Zikpuii pa / KC Lalvunga

Kumsul lo vei khuasan sikni sen lo her,
Fang par lawrna turni nem duai hnuaiah
Lawm lungrvalte lunglawm nan maw
A par zozam lo vul bukthlam mualmawiin
Zalam ṭhuamah zawldi thuai nan
I mawi chuang e val tawnan.
Turni a liam tukram chul a lo chanin
Zozam a par hmanah di ṭhuaina,
A chuai leh ṭhin ṭhal rum chungturni hnuaiah.
Aw, sikni nem duai mawitu zozam par,
La cham rih la lungrual lawm hian kan ngai che.

A dungthul hringmi zaleng lawmna, rawlthar
Ni hi a nghak vanglai turni nem chuan,
Saisen teta kan nghah ṭhaltui,
Hnam tin lungduh kan sakhmel mawina,
Chawih zai rel lo iangin vul la,
Kan ti hringmi zaleng hian.
Mahse lenlai turni kawlrawn a liam chuan
Zingzin kan ṭan leh piallei panin,
Aw, vanglaini i liam dawn maw kawlrawnan?
Dawn lungruka kan lo nghahfak, ṭhen che
Kan ui, hnam tin leng hian ṭapin kan au che.

Ka dawn ṭhin a thlawn em ni khawvel nun hi!
Zozam sawmfang mualmawi a chuai leh ṭhin,
Ṭhal khawrum chapchar ni hnuaiah;
Mahse a par mawina a cham thinlaiah
Hnutiang ngaia dawn chang niin,
Kan nghilh lo’ng che lungrukan.
Ngai teh vanglai ni chuai mah se hming mawina,
A zam zel ang khuavel hmun zauvah,
Vanglai ni zawng hmate’n a chuai leh si ṭhin,
Khuarei chang tur atan erawh dawn la,
Hmingṭha a tlo zawk ang ṭhang leh thar cheņin.

Leave a Reply

Your email address will not be published. Required fields are marked *

error: Content is protected !!