Zosapthara chanchin

ZOSAPTHARA / EDWIN ROWLANDS (15 March 1867 – 6 August 1939) 

  • 1890 atanga awmnghet tura British sawrkarin Mizoram a awp hnuah, helna a reh a, Missionary te tana luh a him ta nia an hriat hnu 1894-ah Sap Upa leh Pu Buangate an lo lut nghal a.
  • Sap Upa leh Pu Buanga te chuan hawrawp min siam sak a, mawlna ata hriatna min pek phawt an tum a. An chanchintha rawn thlen chu kan hriatthiam theih nan tihfin hmasak min tum a.
  • Zosapthara te unau chu an pain a boral san tawh avangin a nu hoin an hmeithai a, a nau John Rowlands pawh America chhim lama Missionary turin a chhuak ve bawk a. Vanduaithlak takin a nau chuanna lawng chuan chhiat a tawk a, a pil dawn ta a, chhanchhuahna lawngah an vaia an len dawn loh avangin a chuang tur an pawt a. John Rowlands chu a vannei zingah a tel a, mahse chhanchhuahna lawng chang ve lo tlangval, la piangthar si lo chu a aiah chhanchhuahna lawngah chuan a chuantir ta a.
  • A unaupa thih thu hi India ram pana Arabian Sea-a a awm laiin a nuin thirhrui hmangin a rawn hrilh a, Zosapthara chu rawn kir leh turin a hrilh a. Mahse Zosapthara chuan a rawngbawlna tur hmun Mizoram lam chu a pan zel ta zawk a.
  • Silchar atanga Aizawl pana an rawn kal kawng tlawng dung an thang chhungin Zotawng hawrawp a zir a, tam tak a thiam hma a.
  • Mi tumruh leh thil zir chak tak a ni a, thu sawi leh titi a thiamin zai pawh a thiam em em a, zai leh lungleng taka khawsa mi Mizote hnena rawngbawl tura talent tha tak nei a ni sa a. Mahse he a chungchuanna leh Zofate laka a tlaktlum bikna hian a thawhpui Missionary dangte tan thikawm leh er tling khawp a lo ni ta a ni.
  • Dec 31, 1898 ah Aizawl a lo lut a.
  • A zin kual nasa hle a, Zawlbuk chu chanchintha puan darhna hmun berah a hmang a.
  • Sap ho khan (Missionary pawh tiamin) hnamdangte nen huang khatah an indah duh lova, Vanramah pawh a hranga awm tur ang khawpin an inngai a. Entirnan Rev. L Mendus (Pu Mena 1922-1944) khan Upa pakhat hnenah “Ka ngai em em che u a, vanramah pawh in awmna lamah ka lo kal thin ang” a ti a. Zosapthara erawh a inti Sap lo a, Mizo inah a thleng a, an ei ang a ei a, Mizo ten an nel phah hle.
  • 1900 kum hian Zosap lo awm hmasa Zosaphluia nen hna chanpual insemin Zosaphluian Kohhran enkawl lam a chang a, Zosaptharan zirna lam a chang a.
  • 1900 velah Chhingchhip a zin laiin Typhoid-in a na vak mai a. J.Shakespeare-a chuan Aizawl lamah a la thla a. A damloh thu hian Mizoram a deng chhuak a, a thihpalh hlauh chuan British sawrkarin Mizote na taka hrem tur angtein thu a thang hman a.
  • Mizorama a lo luh atanga kum lina 1903-ah Mizo hnam hla “Mizo kan ni lawm ilangin” tih a phuah a.
  • A hmalakna zirna bul tan chu tichak turin Mizo a zirtir chhuah tawhte chu a hmang tangkai a, chung mite chuan midang lehkha an zirtir chhawng ve leh zel a.
  • 1903-ah ringawt Khandaih (Phullen), Biate, Hmunpui, Khawreng, Khawrihnim, Lungtan, Maite, Phulpui leh Zukbual khuaahte a din hman a.
  • 1904-a Assam Chief Commissioner rawn zinin Zosapthara enkawl sikulte thatbikzia a hmu a, hemi kum 1904 atang hian Mizoram sikul zawng zawng chu Mission kutah hlan a lo ni ta a.
  • Naupang sikul kaltir chu nu leh pa atangin dodalna a lo awma, “hnathawk tur an ni a, inah an tangkai si. Sikul an kal chuan thatchhiat chauh an zir” an ti a. Chumi avang chuan Zosapthara chuan naupang tam tak a chawm tawp a, an hun awlah hna an thawk a, an chhungte tibuai loin lehkha an lo zir thei ta a.
  • Mi chak tak a ni a, kum 1907 August ni 12 ni ringawt hian hla pasarih a siam hman a. Lalpa theh darh ang che, Ram sakawlhte hian, Lalpa i kawngkhar kikin, Ka tisa chakna awmkhauhzia hi, Ramtinah kraws thihna hlu hi, Lalpa, ka thlarau thunun la, tih leh Lui kai dan tur min zirtir la tih te a ni a.
  • Mizo khawtlangah hmeichhe dinhmun a tha tawk lo tih a hmu a, a rawn vei nghal a. “Ka nausenin tunge mi kawl?/ Ka nu, ka nu duh tak chu;/…Ka damlo va, a tlaivar a,/ Ka tap a, min lo chawimu thin” tih hla a rawn phuah a.
  • A zin kualnaah Lal leh a thuihhruaiten zu an in rui nasa a hmu thin a, chu chu a tha a ti lova, hlain a phuah a. “Zu no pumpelh ula, a tha mang e./ At mu lem angin mi tam tak kan hmu chawk/ Mi an pawisa duh lo, Pathian an zah lo bawk;” tiin a phuah a.
  • Zosaptharan a chawmte chu a in bulah an khawsa a, a tlawh fo thin a, an zinga mi Thangkungi phei chu a ngaina zual a, tahchuah hmingchhiat a tawk ta a. Heng hun lai hi Kohhran thikthu chhiat lai, feh kawnga nula chhawm pawh sual nia an ngaih lai, Biak in thenkhatah phei chuan hmeichhia leh mipa an in mitmei loh nana inhnungchhawn zawnga an thuttir hial hun lai a ni a.
  • Zosapthara chu hek a ni a, a hektuah chuan D.E Jones (Zosaphluia) leh a nupui chu rinhlelh ber an ni a. Zosaphluia chuan a thenawm lawka khawsa Zosapthara chu Thangkungi nena an chungchangah lehkha a thawn a. Tin, Zosaphluian a thian dangte lehkha a thawnnaah Zosapthara chungchangah “Mizoho chuan Mizo nupuia a neih an duh lo” a ti bawk a. Dawt chiang tak a ni. Zosapthara chu enthla turin ama zirtir naupang thenkhatte chu an hmanhlel a, chung zingah chuan Kelsih lal nita Lalsailova pawh a tel ve a.
  • Zosapthara chu 1907-ah Welsh Mission Board chuan a hna atangin an chawlhtir a. Mizorama awm theih dan zawngin belh tur a zawng a, Mizoram chu Excluded Area a nih avangin ruaitu awm lova rei tak awm chu thil theih a ni si lo, hetih hunlaia amah lo tanpuitu ber chu Pu Buanga a ni.
  • Sap Tlangvala (Watkin Roberts) enkawl Thado-Kuki Pioneer Mission (TKPM) chu Zosapthara chuan 1920 August thlain a zawm a.
  • July ni 20, 1923 chuan Zosapthara chu Tongkolong leh Kaishi inkar kawngah a thiante nen inhlohin kawng a bova, thlamah a riak a. Tahchuan “Thlalera vak ka lo nih hi” tih hla hi a phuah a.
  • Zosapthara hian Mizo nula ngainat em em a nei a, a hming chu Thangkungi a ni a. Thangkungi nen chuan inhnimhnai viau mahse Thangkungi chu Kristianah a inpek mai duh loh avangin a tan nupui anga cheibawl a rem lova, an inngaina bawk si chuan hmingchhiat a hlawh phah a ni.Thangkungi nen hian an innei tho nia sawi pawh an awm.
  • Hek leh tihmualphoa awmin Mizo zinga awm thei lo turin hnawhchhuah a ni a.
  • Zosapthara chu kum 1939 August ni 6 –ah Rangoon, Burma-ah a thi a ni.

Leave a Reply

Your email address will not be published. Required fields are marked *

error: Content is protected !!