Zoram Arsi – Mafaa Hauhnar

ZORAM ARSI

-Lalthlamuana

Chawṭhing bar turin a rawn tlân lut zuai a, chhûngte tirh hman lêk lohvin a petek chhuak leh thuai a. Ṭhiante sawm kualin ke zungpui tin nei hman lêk lovin savun ham puar a pet lêng ve lawp lawp ṭhin. Football tui tak a ni a, KG 2 zirlai a nihin mi ina TV en dilin 1982 World Cup Final hmuhnawm ti takin a lo en daih tawh!

Football a ruihchilh a ni thâwthâng a, hriat pawh a hre narawh. A mu-tui lai hi sâwi harh la, football player hming i sawi chuan a khelhna club, a ram, a position leh a jersey number chenin a hrilh thei ang che ti khawpin a hria a ni. Chutiang pheng a nih avang chuan kum naupangtê ni chungin an veng YMA chanchinbu Sports Column a chang ta chawt a, a ziak a ziak a; a inziak tui zel a. Mite fak pawh a hlawh hle a, tichuan football lam aiin thu leh hla lamah a tui ta daih a.

Primary leh Middle School a kal laiin Mizo ṭawng thiam tumin a lo bei fê tawh a. Amaherawhchu a zirlai aiin thu leh hla a dah hmasa lo thung. A lo ṭhang lian a, zirna rûn sang kaia college rap rual a lo ni ta a. Finna tui chawi turin; ‘bucket mawng pawp’ nen St. Anthony’s College, Shillong lam pan chuan a inphur chhuak ta hnak hnak a. A han tlangval chho chu taksa insawizawi lam a bansan vang ni hauh lovin a chum bat mai a, thisen pe tura iaiawm loh tak a ni. A tâwr a ṭha a, a zak ngai lem lo bawk a, zirlai pawl hruaituah pawh a tel chho vat rêng a ni.

He zirna in, Bomfyle Road-a innghat, Pu A. Thanglura kawtkai maia to lûrah hian a ni, thu leh hla lamah a par chhuah ni. Kum 1993 kum laihawl vela an veng YMA -ina an kum puan bawhzui nana ‘Nungcha Humhalh Essay Competition’ a buatsaih ṭumin lâwmman pakhatna a dawng a. Tin, a kum leh 1994-ah Mizoram pum huap tura Art & Culture Department leh Chapchar Kut Celebration Committee ṭang kawpin an buatsaih ‘Chapchar Kut Essay Competition’-ah essay thehluh ve a rilruk a. State leh Central Library-ah kalin Chapchar Kut lam leh a kaihhnawih thuziak awmte chu a vaihma ta a.

A essay ziah chuan lâwmman pakhatna a dawng leh nawlh mai a, thu leh hla a luhchilh ta tak tak a, a kum leh 1995-a Young Writer’s Association Mizoramin a buatsaih poetry inphuahsiak ram pum huapah pakhatna a la leh bawk a ni. Article leh Essay tam tak a ziak a, hla sak mi leh hla chham mi tam tak a phuah bawk a. Tin, short story kan tih, Thawnthu tawi lamah pawh a inhmang a, lehkhabu hial a chhuah a ni. A chhiar zau a, a hre hnem bawk a. Lehkhabu chhiar hi a peih a ni lo va, chhiar lovin a awm thei lo a ni zawk. A khawilo kalna emaw, a zin nikhuain a thlenin ten lehkhabu chhiar tur an neih loh pawhin an fate zirlaibu tal a chhiarsak ṭhin.

Kum 21 a nihin a lehkhabu hmasa ber ‘Chawlhna Tuikam’ a chhuah a, fak a hlawh hle a, Zofaten thu leh hla lama Zoram Arsi lian kan hmelhriat ṭan ta a ni. Hemi a chinah hi chuan a kawlawmin chawlh tih ni a nei ta lo va; insumkar hauh lovin dik nia a hriat leh ramin a mamawh nia a hriat chu huai takin a ziak a, sêltu awm ṭhin mahse chawlh a hnêkin a bei zual sauh sauh ṭhin. Zep ṭit ṭet nei lem lo a ni bawk a, uiin a pu a bauh chang a awm zauh ṭhin reng a ni.

A tan chuan thu leh hla hi a hahdamna hmun a ni a, khawvel nunrawnna te, ei leh bar khawsak harsatna te, bawrhsawmnaten a bawhbuai pha lo va, thu leh hlaah hian a inbunruak a, a thu leh hlate hian he khawvel lak ata hi la bovin, a khawvel din chawpah a hruai bo ṭhin a, a Chawlhna Tuikam a ni.

Mizo Creative writer ropui a ni a. Essayist, poet, short story writer, critic, humourist, columnist ti tein kan hre bawk. Tin, ram leh khawtlang nun siam ṭhat pawh a vei hle a, hma kan sawn theih nân bâng lovin a thuziah hmangin min zilh a, min fuih a, min cho tho ṭhin. A hla phuah ‘ Khaw’nge Ka Ram ‘ tih a chang khat lek hi han la chhuak ila:

Khaw’nge a awm tâk ram duhawm,
Hlimna ram, nunkhua kan chenna,
Dikna siktui kan dâwnna kha?
Khaw’nge rinawmna romei bawm
Sa leh va tinte lungmuanna,
Angelte venhim ram nuam kha.

He hla hi kan Mizo ze mawi sûnna hla a ni a, a phuahtu hian kan Zonun mawi rinawmna te, dikna te, tlawmngaihnaten kan nunah hmun an chan tâk loh avângin a lungngaih thu a âu chhuahpui a, ṭan la a hmasawn tûrin min fuih a, min tur a ni.

Pu JF-a te, Zikpuii Pa te, Siamkima te kan chân hnuin he kan Zoram Arsi hi a rawn her chhuak a, an meichher chhit en chu vâm ṭha takin a rawn chhem alh a, Zofate thu leh hlaah min chawm hneh hle ṭhin. Par lai a chhuang dawn chauh emaw tih laiin kan arsi lian chuan her liam zai a rel ta mauh mai si a, mihringte hian khuannu rorel danah mual êng kan kîl pha si lo hi a pawi a ni.

Chan tawk a lungawi a har a, lungawi loh theih a ni si lo. Hun lo ti hle mah ila, hun hi kan thunun thei si lo. A lei zinkawng thawnthu hi ziak ṭha duh mah ila, Lal thu kan hnial thei si lo. Ani kan chân hian rilru a ti hrehawm takzet a, kan vai ruai a; kan varṭian pawh Vaihna Varṭian a chang zo ta. Ngaiin au au mah ila keini au te chu Thlaler Aurâwl ang lek a ni mai si a. He kan Hringnun Hrualhrui a chah hma hi chuan kan hre reng tawh ang a, he khawvel leilunga Zofate kan awm ve ṭek ṭek chhung chuan a hming a dai tawh lo ang. A sulhnute hi a ni kan tu leh faten kawla ni chhuak chhiara zirna in lama an la chhiar lauh lauh tur ni.

Khawvel lungngaihna leh mangannaten kan chungah thla an zar hunin kan bihrukna tur, kan inphenna, kan hahdamna tur chu a thuziak leh hla phuah te, a sulhnu min hnutchhiah te hi an ni. Kan Chawlhna Tuikam an ni.

Kaphleia, a ṭhianpa India rama chhuah leh tum tawh lo, Scotland pana liam mai tur, he khawvel an dam chhunga inhmu leh ngai reng reng tawh lo tur nena chibai an inbuk laia a ṭhianpa thusawi, We shall meet beyond the river” a tih hmang ngei hian ka han thlah teh ang.

Khi lui râl mawiah khian kan intawk leh ngei ang a, fai sa ringin Pialralah, titi kan sêp za ang chu. ‘Khawnge Mafaa?’ tih ngai lovin, a lo lang lurh turah ka ngai. Tin, Chhûra buh thlira phêk en mai pawhin, kei leh ka u Rama te hi chu min hmuh hmaih ka ring tlat lo a ni.

Dated Shillong
The 7th November, 2019


About the author : Lalthlamuana hi kum 1998 September ni 7-ah Aizawlah a lo piang a. Bethlehem Vengthlangah chhungkuain an cheng a. Tun (2020)-ah hian St. Anthony’s College, Shillong-ah B.sc (Zoology) 6th Semester a zir mek a ni.

Lalthlamuana, Lalthlamuana Tochhawng, Thlamuana Tochhawng, Tochhawng Thlamuana
Lalthlamuana

About the author

Comments

  1. A tha hle mai kan Muaythai-a nge nge hahah….ti zel rawh le…i lehkhabu release hun kan thlir thap e.

  2. Thianpa Thlamuana,Mafaa ang bawka Savun ham puar, phur zet a pet chiah I thiam a maw kan tih lai mek in .Amah Mafaa ang bawkin thu leh hla lam ah pawh ilo duai lo Kher mai…Han bei tang tang la,Ani ang bawk hian,kan Mizo thu leh hla ten vam lam an hnaih ai chuan, hei aia nasa zawk hian min han chhem alh sak leh ta che ..

Leave a Reply

Your email address will not be published. Required fields are marked *

error: Content is protected !!