Vanram chabi enge ni –  Mizo Sermon

Ṭpa Ngente.

Van ram chabi chu ‘Krista Kraws hmangaihna Chanchin Ṭha’ hi a ni a, keini ringtute hi a kawltu kan ni.

Kohhran hote hian he Chabi kan kawl hmang hian la hre lote tan van ram kawng chu kan kawhhmuhin kan hawn sak zel dawn a ni. (Chuvangin, he van ram chabi kawltute hian mite tan van ram kawngkhar hawn sak nana kan hman loh chuan an thisen mawh kan phur ngei dawn a, kan kova Chanchin Ṭha puan darh hna mawhphurhna Lalpan a dah hi a sang em em a ni.)

Lal Isua chuan, “Tu sual pawh in ngaihdam apiang ngaihdam a ni ang; tu sual pawh in ngaihdam loh apiang ngaihdam loh a ni ang,” a ti a.

He ‘ngaihdamna’ leh ‘ngaihdam lohna’ thuneihna hi thlarau lam thuneihna pawimawh tak, mihringin a duh dana a chelek mai theih loh, a hman dan tur dik taka kan hman tur, ‘ringtu ten kan hman ngei ngei tura min pek’ a ni a, kan chunga Pathian thikthu chhiatna lai ber pawh a ni.

Lal Isua kha vana a lawn dawn avangin a thuneihna ropui tak, Van thuneihna chu kan hnenah hian min kawl tir a. He thuneihna min kawl tir hi peipung lova talent khat kawltu anga a ngai ngaia kan pe kir leh a nih a, a hmangaihte tan Van kawng hawn sak nan kan hman loh vanga mei dil lama an liam a nih vaih chuan kan chungah a lawm hauh lo ngei ang.

Tichuan, chu van ram chabi kan kawl, ‘Krista kraws hmangaihna thu’ la hre lote hnena hriattir chu kan tih tur pawinawh ber a ni a, chumi vêk chu kan rorelna hmanrua pawh a ni bawk nghal bawk a ni.

Krista kraws hmangaihna thu hmangin ‘Ngaihdamna’ leh ‘Thiamloh chantirna’ thu kan hriattir ang a, Kros hmangaihna thu kan hriattir an awih duh loh avanga an thiam loh zia kan hriattir te chu Van pawhin thiam a chan tir bik lo vang. (Mathaia 16:19 Vanram chabite ka pe ang chia, lei chungah eng pawh i phuar apiang vanah phuar a ni ang a; lei chungah eng pawh i phelh apiang vanah phelh a ni ang,”)

Amaherawhchu, kan hriattir lo a nih chuan an thisen mawh chu kan hnenah phût a ni dawn lawm ni. “Mi suaksual hnena ka thu, ‘I thi ngei tur a ni,’ ka tih a, chu mi suaksual chu a nunna hum tura a sualna kawng kalsan turin vauna i neih lohva, vaukhânna thu i hrilh bawk si lohva, chu mi suaksual chu a khawlohnaah a thih chuan a thisen mawh chu i lakah ka phut ngei ang.” tia Pathianin a sawi hi i hre reng ang u. (Ezekiela 3:18)

Leave a Reply

Your email address will not be published. Required fields are marked *

error: Content is protected !!