Van hmun ropui hmangaih ram khi bihchianna

VAN HMUN ROPUI HMANGAIH RAM KHI (Will the Circle be unbroken?)

Upa K. Zalawma

He hla, Mizoten kan tuipui tak mai hi Ada Ruth Habershon-i (1861-1918) phuah a ni. January ni 8, 1861 khân Marylebone, London-ah a piang a. Kristian ruh tak chhungkua aṭanga seilian a ni a. Hla thlûk hi siam nual mah sela, amahin hla a phuah chu kum 1899 hnu lam chauhah a ni.

Hla phuah leh thlûk siamah hian a kut chhuak zahnih zet a tel a. He hla hi 1907-a phuah a ni a, an chhûngkuaa thihna thlen avânga phuah a ni. Kum sawmnga leh pasarih mi chauh niin February ni 1, 1918 khan a thi a, Hampstead thlanmual, London-ah phûm a ni.

He hla thlûk siamtu chu Charles Hutchinson Gabriel-a (1856-1932) a ni. A hla phuah leh thlûk siam hi 7000-8000 inkar niin sawi a ni. Kristian Hla Buah hian chûng zinga mi Mizo ṭawnga lehlin sawm leh pakhat lai chu telh a ni.

Charles Hutchinson Gabriel-a hi August ni 18, 1856-ah Wilton, Muscatine Country Iowa khuaah a lo piang a, a pa Farm a seilian a ni. A pa hian music zirna sikul an inah a siam a, chuta ṭang chuan a ni pawh hian Music hi a tet tê aṭangin a thiam a. A hranpaa music school-ah lut ve ni chuang lovin a pa sikul aṭang hian a lo man chho ve zel a ni awm e. Rimawi lam a thiam hi a naupan lai aṭangin mite hriat a ni a.

[adToAppearHere]

Gabriel-a hian nupui vawi hnih a nei a, a nupui hmasa zâwk Fannie Woodhouse-i nen hian an inhamtawng vak lo a ni awm e, an inṭhen a, a hnuah Amelia Moore-i nei lehin fa pakhat an nei. C.H. Gabriel-a hi Sept ni 14, 1932 khan Hollywood, Californi-ah a thi (V.L. Luaha Renthlei).

He hla thu tluan en duh tan hetah hian click rawh

Mizo ṭawnga lettu chu Upa Thanga (Thangluaia)a ni a.
(A chanchin chu Aw Lalpa Chunung ber kan fak hle a che tih hlaah khan kan sawi tawh kha.) ‘Van hmun ropui Hmangaih ram khi’ tih hla hi ‘III Alexander No 15-na aṭanga lehlin a ni’ ti ila, lehlin ai mahin he hla aṭanga mizo ṭawnga siam a ang zawk mah âwm e. A sapṭawng lamah chuan châng 5 a awm a, châng khatna leh chang nga-na hi mizo ṭawnga lehlin a ang a, sap ṭawnga chang 5-na hi mizo ṭawnga chang 4-naah hman a ni. A thunawna “Nakinah in nuamah” tih laia slur – Nakinah tih hi “Nakinah a in nuamah” tia sa kan tam hle mai.

Ada R. Haberson-i chuan a thunawn hi zawhnain a siam thung. He hla thua mizo ṭawng nena inmil ber châng leh a thunawn hi a sap ṭawngin i lo sakpui ve teh ang u:

One one their seats were emtied,
One one they went away;
Here the circle has been broken:
Will it be complete one day?

Will the circle be unbroken
By-and-by, by-and-by,
In a better home awaiting
In the sky, in the sky?

Ada Ruth Habershon-i chuan an chhûngkuaa thihnain inṭhenna a thlen laiin, ‘Van in nuam zawka min lo nghahnaahchuan, lungduh inṭhenna a la awm cheu dawn em ni?’ tiin inṭhen awm tawh lohna hmun hi zawhnain a khâr thung a ni. Hlaphuah thiamte chuan, thil ni tawh lo tur chiang sa hi zawhnain an cho fo ṭhin rêng a ni. Upa Thanga chuan tluangtlam takin – “Khawvel ni hi a ral hunin,
Nakinah in nuamah, Mi thianghlimte lenna ramah,
Van inah kan chêng ang” tiin a dah ta zawk a ni.

“Hemi avang hian Pa, lei leh vana chhungkaw tinreng hming chawi chhana hmaah chuan ṭhingṭhiin ka kûn ṭhin a ni”(Eph 3:14,15).

[adToAppearHere]

Leave a Reply

Your email address will not be published. Required fields are marked *

error: Content is protected !!