TUNLAI THIL AWMZIA
(KRISTIAN THLIRNA AṬANGIN)

K. Zalawma

“Tunlai thil awmzia in hriat avang leh, muhil thawhharh a hun tawh takzet tih in hriat avangin chu chu ka sawi a ni; tunah chuan kan rin tirh lai ai khan ka chhandamna chu a hnai ta zawk si a.” Rom 13:11.

TUNLAI CHU ENG HUN HI NGE?
Kan Bible lehlin laia English Bible an hman ber Revised Version chuan tunlai tia an lehlin hi ‘the season’ a ti a.
Kum khata hun bi hrang hrang, sik leh sa, fur leh ṭhâl te hi ‘season’ an ti. Tun laia Version lar tak NIV chuan, ‘the present time’ a ti mai a. Mizo ṭawnga ‘tunlai’ tih nen hian a intlûk hlê awm e. Kan hun tawng mêk hi ‘tunlai’ chu a ni phawt mai.

Paulan ‘tunlai thil awmzia’ tia sawi a tum erawh hi chu hun kan hman mêk hi ni satliah lovin, kha tih hun laia mite khawsak khaw loh dân chi hrang hrang, Rom 13:12,13-a a sawi, ‘thima thil tih, zu in buai leh zuruih, hur leh inngaih, insual leh inîtsîknain mi tam tak a thunun a, chu tianga an nun an hman khaw loh lai hun (season) kha “Tunlai thil awmzia” tiin a sawi a ni.

Khawvêlah Pathianin hunbi awm tura chhûn leh zân te, ni leh thla leh thil dangte a siam aṭang kha chuan ‘tunlai’ hi englai pawhin a awm reng ni turah ngai ila, hun ṭha leh ṭha lo te, sual leh ṭhate pawhin mihringte zîngah thuneihna an inchan chhawk fo ṭhin a ni. Kan thupui hi “Tunlai thil awmzia” tih
a nih avangin a sawi chhuaktu Paula sawi tum lam phawk zawngin sawi ve ta ila:

Genesis 1:1-ah chuan, “A tirin Pathianin lei leh van a siam a, tin lei hi a chhia a, a ruak ngawt a ni a; tui thûk tak chung chu a thim mup a. Pathian Thlarau chuan tui chungte chu a awp reng a.” tih kan hmu.
Mi thenkhat chuan, “Engati nge lei hi a chhiat a, a ruah ngawt?” tiin, tûna kan awmna lei hi chu Pathianin a tira a siam kha a siam ṭhat leh tawh zawk niin an ring an ti.

Khawvel hmasain kha tih laia “Tunlai thil awmzia” an tawn ve chu, Pathian vantirhkoh chungnung ber Lucifer-a khan Pathian tluka awm duhin chapò sualnain a khat a, Vanah indona lo awmin Lucifera chu leiah paihthlak a ni ta a, chu Lucifera chuan Pathianin lei a siam hmasak chu a tikhaw lo ta niin an ring an ti. (Hei hi Bible pâwn lam a nih avangin buaipui vak chi a ni lo.)

Pathianin mihring, a ma anpuia a siam, Eden huana a pâwl ṭhinte chu, chu Lucifera, Rulpuitar, Setana, Diabola an tih bawk chuan dâwta bumin Pathian dân an lo bawhchhe leh ta a, khatih laia an ‘tunlai thil awmzia’ chu bumna leh thuawih lohna sual kha a ni. Chuta ṭang chuan mihringte zîngah sualna chi hrang hrangin kua a hreuh a, tú tân pawha an tunlai khawvel kha sualna nên an hmang ta zêl a ni.

Nova hun laia an ‘tunlai thilawmzia’ te kha, Pathian fapaten mihring fanute chu hmelṭha takin an hmu a; tichuan, an duh zâwng apiang chu nupuiah an nei ta ṭhin a (Gen 6:1,2). An rilru suangtuahzia rêng rêng chu sual hlir a ni fo mai tih Lalpain a lo hria a, tuilêt hmangin a tiboral ta chiam a nih kha.

Lota hun laia an ‘tunlai thil awmzia’ pawh kha, mipa leh hmeichhia inhman tawn mai a ni lo, mipa leh mipa inîtna sualin a tuam vêl a, mei leh kâtin Pathianin a kan raltir ta a nih kha.

Khawvêlah hian sorkar hrang hrang an lo ding tawh a, an ’tunlai thil awmzia’ pawh chapona leh mi dang hnuaichhiah duhna a ni ṭhin. Assuria sorkar te, Babulon sorkar te, Persia sorkar te, Aigupta sorkar te, Grik sokar te, Rom sorkar te an lo chhuak tawh a, an ‘tunlai thil awmzia’ pawh lalna leh ropui duhna, pathian tam tak biak leh hur leh nawm chenna a ni ṭhin a, chu hun chuan mual a liampui ṭhin.

Tirhkoh Paulan, ‘Tunlai thil awmzia’ tia a sawi hun lai pawh hi Rom sorkar vanglai a ni a, tunlai thil awmzi a a tih tak pawh a bul lamah kan sawi tawh kha.

KAN TANA ‘TUNLAI THIL AWMZIA:
1) Tisa châkna sual (Lust):
Tun lai hian tisa châkna sual – nawmchenna chi hrang hrang, mipat hmeichhiatna hman sualna, mipa leh mipa, hmeichhia leh hmeichhia inpâwlna leh ran hial pawh pâwl duhnain min tuam vel ta a. inngaihna leh uirena te, pawngsual leh kum tling lo pawngsual te, tualthah leh mahni ngei pawh intihhlum duhnain min rûn a. Ruihhlo chi hrang hrang leh ruihtheih thil dang zûk leh hmuam te‘n min bawhbet a, mizote – pasal ṭha leh tlawmngai, mi hrâng sa hrâng hmaa zâm ngai lo kha, hêng sualna chi hrang hrang hmâah hian kan tlâwm ta hnû hnú mai a nih hi! Hei hi a ni dawn lawm ni ‘Tunlai thil awmzia’ chu?

2) Lalna leh thuneihna :
Hmânlai khawvêla an lo do hneh tawh loh lalna leh thuneih duhnain kan ram hi a buan mek a: Party Politics hmangin ram rorelna kan kalpui a, sorkàrna chan kan duh avangin ram ṭhatna tur aiin vote kan thlahlel zâwk a; chu chuan sum leh páia duhâmna leh hlemhlêtna a hring a, mahni party sorkar chakna hmangin kan invulh lian a, mahni phâk loh pawh nih leh neih duhin a dik leh tling zâwk chu leiah a tlu ta fo mai a, Zawlnei Amosa hun laia Israel sorkar ang mai kan lo ni ta.

Mahni thawh phû tâwk aia tam neih tum kan kuh ta ṭul mai! Kan ‘tunlai thil awmzia’ tak hi chu aw!

3) Natna dam thei lo :
Hmân laia kan hriat loh natna mak pui pui a pung ta. Kan ei leh in a ṭha a, thau leh mâwm te, siam chawp thil hâng lutuk te kan ei nasa a, Biblein ei a phal loh pawh kan ei zel a, hna kan thawk rim lo va, thil kan ei tui leh si a, sex lamah kan tladah a, thisen sâng, zunthlum etc. natna a pung hluai hluai a, rilru lam natna chenin kan dam lo ta a. Mipat hmeichhiatna leh ruih hlo hman khawloh avanga natna dam thei lo HIV AIDS-in min suat a, India ramah Mizoram hi HIV AIDS vei – a percentage-a chhûtin a tamna ber State kan ni an tih chu!. Kan ‘tunlai thil awmzia’ tak hi chu aw!

ENGTIN NGE NI TA ANG?:
‘Tunlai thil awmzia’ hi Krista lo kal hnaih tawh zia entirna a ni. Kristian kan nih tirh lai ai khan kum 120 zetin Krista lo kal leh kan hnaih ta mai. Paula chuan hêng sualna chi hrang hrang hi ‘thima thil tih’ a ti a, rûk rûk leh sualna dang pawh hi zan thimah an ti ber ṭhin. Chuvangin, “Zân hi a ral lek lek tawh,’ tiin he sual thiltihna khawvel hi a tâwp hnaih tawh thu a sawi a, “Khua a var dawn ta e,” a tih hi, Krista lo kal lehna hi zan thim rala khawvar ta angin a sawi a ni.

Chuvangin thim thiltih chu paiha, êng thuama in thuam tur kan ni. Chu mi awmzia chu, sual thil tih hi kal san a, Krista duh zâwnga nuna thil ṭha tih hi eng thuam chu a ni e.

Tirkoh Paula min ngenna thu hian tlâng han kawm ila:

“Zan hi a ral lek lek tawh a, khua a var dawn ta e; chuvangin, thima thiltih chu paih ila, eng thuamin I inthuam ang u. Chhûna awm angin mawi takin I awm ang u, zu in buai leh zu ruia awm lovin, hur leh inngaih hmanga awm lovin, insual leh inîtsîka awm lovin. Lal Isua Krista chuan inthuam zawk ulang, in tisa châkna puitlin turin engmah insiam suh u.” Rom 13:12-14.

Leave a Reply

Your email address will not be published. Required fields are marked *

error: Content is protected !!