Tunge hruai thin che – Laldinkimi

Hla thupui – Tunge hruai thin che
Phuahtu – Laldinkimi

Min hruainaah ka kal ang,
Ka tan kawng dik a ni si a;
Thlemna tinreng karah pawh
Ka phatsan tawp lo vang che.

Aw ringtu, tunge hruai ṭhin che?
I nunah tunge lal ber le?
Lal thu nghak lovin i tlan ṭhin em?
A hnuh let hun che a thleng thuai ang,
Chutih hun chuan i vui thei lo’ng;
Lalpa hruai theih turin inpe rawh.

Harsatna tinreng hnuaiah pawh,
Ka felna Pathian i ni a;
Thlamuantu ka hmuh loh changin,
Min thlamuan ṭhintu a ni si.

He lei buaina ka pelh hun chuan,
A ângchhung nuamah ka châwl ang;
Ṭhenna ram reng ngai lovin,
Min hruai ang vanram thlen thlengin./-

He hla mawi leh nalh tak Tunge Hruai Ṭhin Che tih hla Pi Laldinkimi phuah hi thlarau piantharna thinlung chhungril taka nun thar neia phuah a ni tih a hriat ngawih ngawih a, a sak a nuamin rilru a khawih ṭhin hle a mai. A phuahtu pianthar dan hi a rila, sakhawmi aṭanga Kristaa nun thar nei, Thlarau hruaia awm a ni a, a hla phuah dan hi a ril ka ti hle mai. A hla thu kalhmang aṭang hian Kristaa awm ringtu nung tak a ni tih a hriat hle.

Pian leh murna : He hla ṭha tak phuahtu Pi “Ladinkimi” hi March ni 4, 1976 khan Chawngtlai, Khawzawlah a piang a, a pa Upa Dr. Lalzuia Colney, Padma Shri leh a nu Lalzâmveli te an ni. Khawzawlah a naupan lai hun a hmang a, tunah hian Kanân Veng Aizawlah pasal fanau neiin a cheng mek a ni.

Hla phuah lam : Pathian thlarauvah a piangthar a, a thlarau nun a hlima, Pathian faka zai nuam a tithei hle a, chuvang chuan hla phuah lamah pawh Thlarau hruaina avangin a tui a, hla phuah lamah Talent ṭha tak a nei a, Pathian fakna hla pawh sawmriat lai a phuah a, a pianthar hma hian Hla Lenglawng sawmthum leh Lengzem Hla sawmhnih a phuah tawh bawk. Gospel Album pahnih a tichhuak tawh a, TV leh Radio-ah te pawh hla thlan hlawh leh Pathian hman ber zingah a tel a ni.

Nun kawrawng, takna nun nei lo : A nu leh pate hian a naupan tet ata Pathian biak dan leh Kristianna chungchanga serh leh sang te an thiam ang tawkin zirtir mah se, a thlarau nun tuihalna a reh thei si lo, thlamuanna nei si lovin kim lo va inhriatna a nei tlat a. A chhan chu Thlarauva Pathian nena inpawhna tak tak a neih loh vang a ni. A zawn ber a hriat loh avangin a rilru a mangang ṭhin a, kal dan tur kawng a hmu fiah thiam bawk hek lo. A han tleirawl chho pawh tleirawl dangte ang bawkin khawvel lamin a rilru a hip fo ṭhin. Amaherawhchu, a nu leh paten ṭhahnemngai taka an ṭawngṭai sak ṭhinna avangin khawvel lamah han tlan ve dawn viau mah se, thui tak a tlan thei chuang lo.

Hla lo pian dan

Thununna, mit natna hmangin : Kum 2001-ah chuan Chhandam hlim lawmna ropui tak a chang a, chuta ṭang chuan thlarau thilpek leh pawlna nasa tak a dawng ṭhin a. Ṭawngṭaina aṭangte leh Bible a chhiar aṭangtein fakna hla a dawng ṭhin a ni. Tisa lamah pawh malsawmna a dawngin, eizawnna kawngah pawh Lalpa’n mal a sawm a. Nimahsela, chung malsawmnate chu amah tidamtu, leh a buaipui leh a nuna lal zawk a nih tak fo avangin he hla thunawn hmang hian kohna a dawng ta tlut tlut mai a :

“Aw ringtu, tunge maw hruai ta che le? Ka hruai theiha i awm loh va, i nunah lal dang i thlang a nih chuan, ka hnuk let thuai dawn che, i vui thei lo vang. I eizawnna engkim kalsanin ka hruai theih turin inpe mai rawh. Petera’n a eizawnna lên leh sangha man sa te a kalsan a, mi zui ang khan mi zui rawh”

tiin kohna a dawng ta a. Chu kohna chu rin har leh pawm har a tih avangin a tlan lui zel a, mit natna hmangin a kotu chuan a ṭhatna turin hmangaihnaa thununin a khawih zui ta a ni.

Thupha chawia inhlanin a mit a dam leh ta! : A mit natna chu a zual zel a, khaw êng pawh a hmu mumal thei ta lo va. Doctor an han râwn lah chuan dam mai thei dimhmunah pawh a awm tawh lo niin an sawi a. Tichuan, beidawng takin thinlung leh tihtak zeta thupa chawia inhlanin a ṭawngṭai ta a : “Lalpa, ka mit chu del tawh mah se la, i hruai theih tur chuan ka rawn inpe e, ka nunah Lal ber ang che,” tiin a kotu hnenah chuan a inhlan ta nge nge a. Ni thum chhungin a mit chu a rawn pangngai leh ta var mai a, khua a hmu ṭha leh thei ta!!! A mit chu a ṭhain a dam leh ta var mai a ni!!!!

Hla phuah dan : He hla hi kum 2003 khan a phuah ta a ni. He hla a phuah ngei hmang hian ama nun pawh Pathianin a pawl nasa hle a. He hla a phuah dan a sawi hian Pathian hruaina a dawn dan chu mittui nen heti hian a sawi : “He hla hi ka phuah a ni tih pawh ka sawi ngam chiah lo, Pathian phuah sa lo puang chhuak tura tih ka ni ve maiin ka hria,” a ti. Hla phuah thiamah leh zai thiamah pawh a inngai lo va, Pathian lehkhabua thu awm sate hi a hla hmangin a ziak chhuak mai niah a inngai.

An innghahna “Jehova Jire” : An nupa hian Pathian kohna chu chhangin anmahni awmnaah hian ruihlo ngai leh hurna sualin a tihbuaite chu ṭawngṭaina nen an enkawl mek a. Intum chawp Pathian – Jrhova Jire chu an innghahna a ni.

He hla ropui tak, ringtu zawng zawngte chhân ngei ngei tur hla hi a mawi a, a thlûk pawh a ṭha hle. Amah Laldinkimi hian mawi tak leh thinlung takin a sa a, Zoram dung leh vanga Kristiante pawl harhtu topui tak a ni a, kan chheh vel hnam dang ṭawng hrang hrangin lehlin a ni bawk.

Source : Hla Lâr 110, Vol. I
By V.L. Luaha Renthlei
Mission Vengthlang, Aizawl.

(whatsapp a tanga lak a ni)

Leave a Reply

Your email address will not be published. Required fields are marked *

error: Content is protected !!