TUIFINRIATA MI VAKVAITEN

K. Zalawma

“Kei Isua hian kohhranho pawlte tân hêng thu hi in hnena hriattir turin, ka vantirhkoh ka rawn tir a ni. Davida bulpui leh a thlah, arsi êng tak, vârparh chu ka ni,” a tia. Thup. 22.16.

Tuifinriata mi vakvaiten tih hla hi Jane Cross Simpson-i (1811-1886) phuah a ni a, a pa hming chu James Bell-a a ni a, Glasgow-a ukil lar tak a ni. November ni 12, 1811 khân a piang a, he hla hi kum 1830-a a phuah a ni. Kum 1837 khân J.B Simpson-a, Glasglow a mi nen inneiin June ni 17, 1886 khân a thi.

He hla thlûk siamtu Dr. Lowell Manson- a (1792-1872) hi January ni 8, 1792 khan a piang a, American Church Music-ah chuan a lar ber zinga mi a ni. Hla 1600 zet thlûk a siam a, hêng zingah hian Mizote mai ni lovin khawvela Kristian awmna tawhphawtah chuan tun thlenga kan sak lar – Isua kraws mak tak chungah,’ ‘Khawvel lâwm nan a lo kal a’ tih leh ‘I lamah min hîp rawh’ tih te an ni.

American Public School-a music zirtirna hi ama hmalakna avanga tun thlenga chhunzawm a la ni. Kum 17 mi chauh anih laiin First Parish Unitarian Universalist Kohhranah Music Director a ni a. Chumi hnuin Independent Presbyterian Church-ah hruaitu ber a ni leh a. A chanchin chhinchhiah tlâk tak pakhat chu America-a mi dumte tana Sande Sikul bul ṭantu a ni hi a ni. August ni 11, 1872 khân a thi.

He hla mizo ṭawnga letlingtu chu Sainghinga (1899-1990) a ni a, hla pahnih a lehlinte hi KHB-ah telh a ni a, a pakhat zawk chu ‘Aw mi sang tam tak zaite chu’ tih a ni.

Sainghinga hi September ni 5, 1899 khan Pûkpui khuaah a piang a, a pa chu Hmingdailova Pautu a ni a, a nu chu Dosati Khiangte a ni. Kum 1911 khân Upper Primary a pass a, kum 1917-ah France ramah a kal a, July, 1918-a a rawn haw leh chuan anṭam chi a rawn hâwn a, Mizorama French Anṭam tichhuaktu hi a ni. February ni 7, 1921 khân Theiriatah Laltinchhîngi nên inneiin fa 14 lai an nei a, a nupui hian 1949 khan a thihsan.

Mizorama Red Cross Society leh Young Lushai Association dintute zingah a tel a, Indopui II-na laia a thawh ṭhat avangin Officer of the Order of the British Empire (OBE) a dawng a, Mizo zînga dawngtu awm chhun a ni hial âwm e.

Thil a chhinchhiah peih em em a, kum 1911-1966 thlenga Zoram khaw awm dân kha a record fel thlap mai. March ni 29 tlai dar 5:40, 1990 khân a thi.

He hla phuahtu Jane Cross Sympson-i chuan chang 1-naah arsi chu muanna arsi (star of peace), chang 2-naah beiseina arsi (star of hope), chang 3-naah rinna arsi (Star of Faith), chang 4-naah Pathian arsi (star of divine) a ti thliah thliah a. Tuipuia zin hian zofate lung a lèn phâk meuh loh laiin kan hriatthiam tur zâwnga Hmararsi tia kawng hruaitu a han dah hi a thiam hle a ni. A hla hi a ṭhain a thlûk pawh a mawi a, lung a kuai hle a, chu chuan mi a hîp ve rêng rêng a ni. Bible chang innghahna: Thupuan 22:16. (V.L. Luaha Rênthlei.)

He hla letlingtupa Sainghinga hi Indopui I-naah Mizoram aṭangin France rama kal a ni a, India ram aṭangin Arabian Sea-ah lawnga chuangin tuipuisen leh Mediterranean Sea in zawmna Suez Canal-ah kalin Mediterranean Sea kal tlangin France ram an lut ngei ang a, kha tih hun laia meilawng kha chu tunlaia lawng lian aiin a la changkâng lo hle bawk ang. Tuipuia zan tam kal tawh tân chuan hmar arsi ṭangkai dan a hre chiang hle ni tur a ni, Jane Cross Simpson-in tuifinriata lawnga chuangte tâna Pathian hruai leh vênna an mamawhzia sawi nan muanna arsi, beiseina arsi, rinna arsi leh Pathian arsi tia a vuah thluah chu Sainghinga hian hmararsi-ah a khungkhawm ta vek mai a ni.

Tuipuia zinten chhim lam leh hmar lam, khawchhak lam leh khawthlang lam an hriat mai theihna chu hmararsi aṭangin a ni a; kawng bo lova an awmna chin an hriat theih nân a pawimawh a ni. Tun laiah chuan chhûnah pawh, zâna arsi lang thei lova khua a chhiat a, thlipui ruahpuiin a nuai pawhin compass an nei tawh a. Hmararsi hmu thei lo mahse an buai tawh lovang.

Jane Cross Simpson-in sawi lan a tum ber zawk erawh chu, he khawvel tuipui chungah rinna lawnga kan chuan chhûng hian, thlemna thlipuiin min nuaiin harsatna chi hrang hrang tawk ṭhin mah ila, kalna bo lova min hruaitu leh kan en tlat tur chu Lal Isua, kan Varparh Arsi chu a ni tih min kawhhmuh a tum a ni.

Lungngaih thlaphân huna kan muanna arsi, beidawn chânga beiseina arsi, rinhlelh changa rinna arsi, thlemna thlipuiin min nuai lai pawha hnehtu Pathian arsi, min hruaia kawng min kawhhmuh zeltu chu Pathian – Varparh arsi anga thim tikianga chhun enga min hruaitu chu a lo ni zawk a ni.

Lalpa, Nang, hmârarsi angin,
Mi vâkvai i hnen thlen la;
Thlêmnaten rei tak bei mah se,
Khawvelah hian.

Far, far at Sea

1. Star of peace to wanderers weary!
Bright the beams that smile on me!
Cheer the pilot’s vision dreary,
Far, far at sea.

2. Star of hope! gleam on the billow;
Bless the soul that sighs for Thee,
Bless the sailor’s lonely pillow,
Far, far at sea.

3. Star of faith! when winds are mocking
All his toil, he flies to Thee;
Save him on the billow rocking,
Far, far at sea.

4. Star divine! oh! safely guide him;
Bring the wanderer home to Thee;
Sore temptations long have tried him
Far, far at sea.

Leave a Reply

Your email address will not be published. Required fields are marked *

error: Content is protected !!