TV en loh man kan chawi nasa lutuk

TV en loh man i chawi ve nasa em? – TRAI dan thar hmangin i TV bill ti tlem rawh le

(Note – Copy paste ai chuan link share a ropui zawk)

TRAI dan ka hriat hnu chuan tv bill ah thla khata Rs 400 chawi ṭhin khan Rs 274 vel ka chawi tawh ang.

TRAI dan thar hi tv entuten an en ngai loh channel man an chawi thlawn nasa lutuk ṭhin tihtawpna hmanrua tur a nih laiin keini chuan chawi belh nan kan hmang hlauh a, thil nihphung han sawi dawn teh ang.

Keimahni chhungkuain kan en ṭhin lawrin naupang en tur chi thlengin channel thlang ta ila

1.Zonet Zawlbuk – Rs. 12
2.Zonet Senhri – Rs. 5
3.Zonet rimawi – Rs. Rs 5
4.Star sport I – Rs. 19
5.Star sport II – Rs. 6
6.Star sport III – Rs. 4
7.National Geographic channel – Rs. 2
8.National Geo wild – Rs 1
9.Animal planet – Rs. 2

10.Discovery kids – Rs. 3
11.NDTV 24X7 – Rs. 3
12.BBC – Rs. 1
13.CNN – Rs. 0.5
14.Disney hd – Rs.4
15.Sony Ten 1 – Rs.19
16.Sony Ten 2 – Rs.15

Total = Rs. 101.5

Tichuan ka channel thlan Rs. 101.5 man leh chawi ngei ngei ngai (basic fee) Rs 130 nen belh khawm ila, 101.5+130 = 231.5
Hetah hian GST (chhiah) kan chawi tur 18% belh leh ta ila.  = Rs 41.76
Tichuan thla khata kan chawi tur zat chu Rs 231.5 + Rs. 41.76 = Rs. 274
A formula chu Basic fee 130 + Pay channel fee 101.5 + GST 41.76

Mizoram Consumer Union President ni lai Dr. Chawngsailova chuan TRAI act ang chauhin fee a pek theih thu a hrilh hnuah Cable TV neitute chuan len chilhin a duh channel an thlan tir a, Rs 290 a chawi.

Pay channel chu lei ngai channel ang chi a ni a. a man a inang lo diat diat a, channel khat hi cheng 19 aiin a to thei lo thung. Sony ESPN te hi Rs 19 a nih laiin BBC te chu Rs 1 man chauh a ni a. Tin channel hi thla tinin kan duh kan tidanglam thei a, kan mobile phone-a mahni top up duh zat kan thun ang mai hian  a awlsam a, inthlahrunna tur a awm lo. World Cup lai chuan a chhuahna channel ka la ang a, world cup zawh atangin ka paih leh mai thei a ni.

TV bill pek dan thar hrechiang

Basic Pack chu chawi ngei ngei ngai a ni a. Hei hi cable tv neituten hlawkna an tel theihna atana tih a ni pakhat. Miin channel li emaw channel nga emaw lek thla khatah en ta se chu Rs 30 vel te chawi ta se chu hlawkna an nei dawn lo lutuk a, chuvangin basic/ chawi ngei ngei ngai Rs 130 leh tax 18% a siam ta a, cheng 150 hi chawi tlem theih ber tihna a ni ta a ni.

Basic pack hian Free To Air channel an tih channel 100 a keng tel nghal a, hetah hian DDK Aizawl te pawh a tel a.

Channel awmsa (basic pack chhawm) bakah channel dan kan lei belh duh chuan tih dan langsar deuh pahnih a awm a.

Tih dan pakhatna chu FTA channel 100 aṭang hian kan en duh loh tur nia kan hriat channel kan paih ṭhen ang a, kan paih ṭhen zat chu kan channel lei thar zat mil a ni tur a ni. Ka channel lei khi 16 a ni a. Basic channel 100 atangin channel 16 kan paih ang a, a aiah ka channel lei thar chu kan dah lut ang.

Tih dan pahnihna – Basic channel atanga paih kher loin kan channel lei zat chu kan belh ang a, additional fee kan chawi thung ang. Entir nan kan chawi tura kan chhut chhuah cheng 274 khi he dan ang hian kalpui ta ila, Rs 290 vel kan chawi dawn tihna a ni.

Complain dan leh thil dang hriat belh duh tan Pu A. Lalhmangaihzuala, Mizoram Consumer Forum General Headquarters a mi thuziak hi lo tarlang ila.

PUBLIC MEETING ON CONSUMER AWARENESS
‘DIGITALIZATION OF CABLE TV’
BY TELECOM REGULATORY AUTHORITY OF INDIA (TRAI)
Dated Aizawl: 09.5.2019 (Thu) 7:00 PM

Paper presented A. Lalhmangaihzuala

February 2019 aṭanga TRAI-in Cable TV Digitalisation dan thar a tihchhuah anga kalpui tur chungchang-ah mipuite leh Service Provider ten dan zawm tur chiang taka kan hriat a ngai a, TRAI dan ang thlap a Cable TV Operator te pawhin hma an lak a, mipui dikna leh chanvo an zah thiam a pawimawh hle dawn a ni. Dan hi zawm tlan a nih loh chuan Service Provider te hian thubuai an awrh mai thei dawn a ni. Dan thar a inhlankaina hi Sorkar chuan March ni 31 thleng a pawtsei a, hemi hun chhung hian Service Provider-te in chingfel hman tur leh danin a phutte an tih hlawhtlin a ngai a ni

Service Provider leh Consumer-te hriat ngei ngei tura pawimawhte chu :

1).TRAI dan tharah Cable Operator ten PAY channel mal te te leina man MRP an tarlang ṭheuh ang. (Vide Tariff Order Part II 3(1) (2) (a)(b), QoS Chapter II 3(4).

2).Cable TV Connection nei ten TV Bill (Basic-tier Service) Rs 130 + 18% GST = Rs 150 thla tin Fee an chawi ang. Hei hian Free channel 100 a keng tel ang. Hei chauh hi Compulsory Pack a ni. (Tariff Order Part II No.4.(1)

3).Dan tharah hian Subscriber-in a channel en duh zawng chauh a thlang chhuak thei ang. Subscriber duhthlanna a lal ber ang. Ṭul lova pawisa hman leh channel en ngai loh en man chawi ṭhin a ziaawm nan. Channel thlan tam chuan chawi a tam ang a, thlan tlem chuan chawi tlem a ni tawh dawn a ni. Chhungkua in rawn tlan tur a ni. (Tariff Order Part I1 4(2).

4).Subscriber-in channel mal te te a thlan duh loh chuan Operator te pack siam sa a lei thei ang. In tihluih theih a ni lo. Channel te hi engmah in lei luih tir theih a ni lo. Hei hi he dan tharin a tum ber a ni. (vide TRAI PR No. 4/2019)

5).Subscriber in a duh chuan Pack leh Channel mal a duh duh a thlan pawlh thei ang. Hriat thiam harsa a awm lo. Example 2 ah chiang takin Model siam a ni. Channel subscibe te hi a tih belh theih a, a tih tlem theih bawk-72 hrs (Lock-in period a zawhin). Thla tin Bill a dang thei. (QoS Chapter III 6,7).

6).Danin a phut angin Cable TV Operator ten Website mumal tak, Consumer Information Channel (999 ah) leh Toll Free No. changtlung tak nei vek turin TRAI chuan a hriattir daih tawh a ni. (Zonet hian Toll Free 1800-345-3796 an nei tawh.

7).Subscriber in FTA atanga Free channel 100 thlan tur hi paih thenin Pay channel a aiah a dahlut thei ang a, Example 1 en ila.

Example 1 : FTA 100 channel atangin Customer-in  channel 8 paih ṭhen ta se, chumi

aiah pay channel 8 ( Zawlbuk-Rs 12, NDTV-Rs 3, VHI-Rs 1, CN- Rs. 4.25, SONY ESPN – Rs 19,

BBC-Rs. 1, Animal Planet HD – Rs. 3, HBO-Rs 10) thlang zawk se, hetiang hi TV Bill tur a ni:

Basic pack of 100 SD channels (FTA) man = Rs. 130

Pay Channel pariat man belhkhawm = Rs 53

Total = Rs 183

18% GST =   = 32.94

TV Bill = Rs. 216

Example 2: Basic Service pack (FTA channel 100) Compulsory

Basic Pack bakah hian Pay channels 25 lak belh duh ila:

1.Zonet Zawlbuk Rs. 12.
2.Zonet Beiseina  Rs. 2
3.Zonet Dingdi Rs. 5
4.Zonet Daifim Rs. 5
5.Discovery – Rs. 4
6.Animal Planet – Rs. 2
7.Nat. Geo. Wild – Rs. 1
8.TLC – Rs. 2
9.CN – Rs. 4.25
10.POGO – Rs. 4.25
11.Disney HD – Rs. 4
12.BBC –  Rs. 1
13.CNN – O.5
14.NDTV – Rs. 3
15.HBO – Rs 10
16.Star Movie – Rs. 12
17.MXN – Rs. 8
18.Movies OK – Rs. 1
19.Star Sports Select 1 – Rs.19
20.Star Sports select 2 – Rs. 7
21.ESPN – Rs. 5
22.D Sports – Rs. 4

23.VH1- Rs. 1
24.MTV – Rs. 3
25.DDK (Azl) – Free

Tichuan TV Bill tur chu:

Thla tin TV Connection Fee = Rs 130 (compulsory pack man)

Channel 25 lakbelhna man (Addl. NCF) = Rs 20

Pay channel 25 man MRP belhkhawm = 120

Total = 270

Chhiah, GST 18% =    = 49

Tichuan thla khata TV Bill kan chawi zat tur chu Rs 270 + 49 = Rs 310 a ni

8).Set Top Box kan lei hian Warranty hian kum khat a huam tlangpui a, hemi huam chin bak chu a lo chhiatin a thar kan lei leh a ngai a. STB hi chi hnih a awm a, SD Channel man thei leh SD leh HD channel man kawp thei chi te. SD Channel man chi STB i neih chuan HD Channel inziak ho te hi lei miah loh tur a ni. A lang thei dawn chuang lo a ni.

9).TV Bill hi danin a sawi angin Pre-paid emaw Post-paid emaw a theih ve ve a, consumer duhthlanna a lalber a ni. Pre-paid tur chuan electronic transfer system fel taka kalpui a ngai. Tunah hian Prepaid/ Post-paid duh kan thlang thei lo a nih pawhin kan channel duh tal hi Service Provider te hian min lei tir se MCU chuan kan ti a ni. QoS Chapter 4 Clause 18(1) (2).

10).TV bill Receipt te hi mumal taka pek chhuah ṭhin tur a ni a; Free channel, Pay channel lei zat, Tax te chiang takin a inziak lang tur a ni.

11).Tin, Cable TV la pawt thar duh tan Connection Fee Rs 350 + Activation charge Rs 100 -Rs 450/- a ni tih mipuite kan hriattir bawk a ni. QoS Chapter II Clause 4 (5)(6)

12) TV Digitalisation dan tharah hian TV channel fiah ṭha, quality service, repairing and Maintenance ṭha leh zuala kalpui a ngai dawn a. Harsatna tawk, thil inlei luihtir, Service ṭha lo emaw intihderna/ inbumna, duhthlan theih lohna, pack in lei luihtir emaw a awm chuan ngawi bo mai lovin a hnuaia tarlan ah te hian Report theih a ni. Ka dikna chanvo humhalh hi keima tih tur a ni.

1.Mahni awmna District Consumer Forum/Court ah thlen theih a ni.
2.TRAI (e-mail [email protected] or he number 0120-6898689) thlen tur.
3.MCU ah Report bawk ni se (A hlawma Court a kalpui a ṭul hun atan)

Mizoram Consumers’ Union  Office phone no 0389-2311514

Paper ziaktu – A. Lalhmangaihzuala – 9615212163

President, MCU – Prof Chawngsailova 9862419156


I knowledge a zau em?Link ah hian lut la, Mizoram Images Mizo Quiz hi han chhang chhin teh le, hetah hian click rawh

Leave a Reply

Your email address will not be published. Required fields are marked *

error: Content is protected !!