Thuziak kawng sira tar

KAWNG SIRA THUZIAK TAR

Han zin chhuah chang hian kawng sira thuziak tar mawi tak tak hmuh tur a awm ṭhin. Border Roads Organisation lam hian thu an thiam angreng hle. Mizoram lamah pawh hian rilru khawih tak tak kawng sira lungphun leh thu tar hmuh tur a awm fo. Zinkawng khawhar hnemtu pakhat an ni ve reng reng. An thu tar ṭhenkhat chauh lo la ila.

  • Be Mr. Late than Late Mr.
    (Pu Tlaiṭhina nih hi pawi ti suh, Fam ta an tih ai che chuan)
  • If you love her, Please divorce speed
    (I hmangaih takzet a nih chuan tlan-chak hi bansan rawh)
  • Sorry for – Oooh, Ahh, Ouch. Inconvenience regretted
    (Ka let thiam lo)
  • Donate blood in blood bank, not on this road
    (Blood bank-ah i thisen pe rawh, kawngpuiah ni loin)
  • Please go slow unless you have a urgent meeting with God
    (Pathian nena inhmuh vat i ngai te a nih loh chuan muang changin tlan ang che)
  • Licence to drive not to fly
    (Motor khalh-theihna i nei, thlawh-theihna ni lovin)

Mizoramah pawh hian kawngsir lungphun leh thlanmual a thlan lung thuziak chhiar mai mai hi a hlimawm duh viau. Sihfa khaw daiah khian ‘Chhura lungkawh’ a awm a, vawnhim a ni a. A bul lawkah chuan lungphun pakhat a awm a, chuta thuziak chu “ Suakhanga, Nupa 87 a sawi rem vangin kuli a awl. Sifa (Sihfa)ah vawi 6 a awm. A phunna sial. Tit (rannung tit lem lianpuiin an ziak a) heti tiat hi a hmu” tih a ni .

Mizo thl anlung phunah hian nula ngaih thu leh a hunlai a ngaihhlut zawng thuziak hmuh tur a awm fo reng a ni. Entirnan, “Pu Zaliana. Kum 50. Hindi a thiam ni a hriat a ni” tih ang chi te. South Sabual-a lungphun pakhatah chuan “Nula 16 a ngai” tih an ziak tel a. Chutiang vel chu a ni. Mahse Facebook-a ka hmuh pakhat thlanlung thuziak hi a nasa fe zawkin ka hria, “Kan pa duhtak K. Lalbiakthanga. Kum 100. Nula 15 a ngai, mahse a uang lo, Uipui nen. Sawn pathum a thlak. Pa zaidam nunnem a ni” (a source ka lo chhinchhiah hmaih).

Mizote hi midangte hmuh theih tura thuziak tar uar ve tak kan ni reng reng a. Kawngsira an chhungte accident-na hmun nen lama chhinchhiah ṭhin kan ni a. Kum 2013 khan Thenzawl-ah Pa Muana te in hmuh pahin kan class kan zin a. Tuirihiau kan tlawh lai chuan luiah chuan insu an lo awm a. Keini chuan tuia chen chu kan tum a. Kan insiam vel lai chuan a khaw mi insu te chuan “Fimkhur rawh u aw, tla hlum te pawh an awm tawh a nia” an ti a, chu thu chuan rilru a kap run ta mai a. Rilru nuam vak lo chunga kan awm reng lai chuan li chhak a thingkung-ah chuan Thenzawl KTP ten “I Pathian tawk turin inpeih rawh” tih thu an lo tar kulh mai a.

https://www.packnfly.in/wp-content/uploads/2017/05/lehmanali-highway-14.jpg

Leave a Reply

Your email address will not be published. Required fields are marked *

error: Content is protected !!