Thutak Lal Isua – Sermon

-Upa K. Zalawma

Johana 1:12-14 (MGB) Nimahsela amah lawm apiang chu, an hnenah Pathian fate nih theihna tur a pe, a hming ringtute chu;
chung mite chu thisen hrin an ni lo va, tisa duhzawnga hrin an ni hek lo, mipa duhzawng pawha hrin an ni hek lo, Pathian hrin an ni zawk e.
Tin, Thu chu tisaah a lo chang a, kan zingah a awm ta a, (Pa fa mal neih ropui angin a ropuizia kan hmu,) khawngaih leh thutakin a khat.

Pathian fate nih theihna:
Johana hian Pathian fa kan nih theihna chu Lal Isua min peka hi a ni a, Lal Isua lâwma ringtute chu Pathian fate an lo ni thei ta a ni a ti.

A hming ringtute chu:
Mizote chuan kan nu leh pa te emaw, kan pi leh pute nihna emaw hi hmingah kan pu ṭhin.

‘A hming’ tih hi Hebrai-ho chuan a hming putu nun pum sawi nân an hmang ṭhîn ; chuvangin, ‘Isua hming rin’ tih leh, ‘Isua rin’ tih chu a danglam lo a ni. Isua chu Chhandamtu a nih avangin a ringtu chu chhandamin a awm tihna tluk a ni ang.

Thisen hrin an ni lo, tisa duhzâwng leh mipa duh zawnga hrin an ni hek lo:
Mi hringte kan lo pian theihna chu mipa leh hmeichhe thisen (chi) aṭangin a ni.
Lal Isua hming ringtute chu Pathian duh zawngin, Lal Isua thisena hrin kan ni a, Fapa Isuaah fa nih theihna pĕk kan ni. Tisa duhzâwng leh thisena hrin kan ni lo.

‘Thu tisaa lo chang:
Logos hi Pathian a ni a, Pathian chu hmuh phâk loh an ti ṭhin.
Mihring suala kan tluk avangin Pathianin thuin Chhandamtu pĕk a tiam a, Zawlnei Isaia phei chuan, “Kan tân naupang (child) a lo piang a..,”(9:6) tiin Isua pian hma kum 700 laiah khan a lo sawi piang der tawh mai. A hunbi a lo kim khân (Gal.4:4)Pathian thu chu Lal Isuain tisaah a takin a lo thleng ta a ni. Logos – Pathian – thu, hla taka hmuh phak lohva awm kha kan zingah tisa puin, thu mai ni tawh lovin, a takah a lo chang ta a ni.

Khawngaih leh Thutaka khat:
Kan naupan laiin thingsemim kan chhar ṭhin a. A tak lo chu a zâng heih a, han seh phel ila, a chhungah engmah a lo awm lo. A tak erawh chu a rit nalh a, a chhûngah a tak a lo khat tlat ṭhin.

Chutiang chuan Lal Isua hi a der mai a ni lo va, a tak, (true/real) ngei a ni a, amah chu khawngaihna hlawm (khat) a ni bawk tih Johana hian min hrilh.

Johana 14:6-ah Lal Isuan, “Keimah hi kawng leh thutak (truth) leh nunna chu ka ni, Keimaha kal lo chu tumah Pa hnenah an thleng ngai lo,” a ti tawp mai a ni.

Pâwn lama mite hmuha lansarh leh ropui duh vanga rawngbâwl hi kawng leh thutak Lal Isuaa kalna a tling zo lo.

Khawngaih leh thutaka khat Lal Isua hming ringtute chu, mahni indah hniam ngam, midang dah pawimawh zawk khawpa rilru tlawm leh, thinlung taka mi khawngaih thei an ni ṭhin a, tun dinhmun mai ni lo, a tawp thlenga Lal Isua leh a Kohhran tâna rinawm leh a thlavâng hauh ngam an ni tur a ni.

Mahni mawina leh mi fak nih tumna rilru paih bovin, Kohhrante tâna ṭha tura theih tawp chhuah ngam leh hun leh sum sĕnga rawngbawl a, a ṭul huna mualphopui ngamten Pathian fate nih theihna chu a takin chatuanin an la chang dawn a ni.
LAL ISUA HI A TAK TAK A NI A, A TAK TAKIN ZUI VE RAWH LE.

Leave a Reply

Your email address will not be published. Required fields are marked *

error: Content is protected !!