Thumak ka sawi nin theih loh chu Kalvari chanchin a ni – Upa K. Zalawma – Mizo sermon

‘A saw râltiang tlângah,
Kraws hlun tak chu a ding’ tih hla chanchin ziah ka tum mĕk laiin, he hla hian min tur hneh ta zâwk a ni.
‘Thu mak ka sawi nin theih loh chu’ tih hla phuahtu hi Rev. Liangkhaia (1884-1979) a ni.

Liangkhaia hi lehkha thiam thei tak a ni a. Mahni inzirin kum 1900 khan Lower Primary a exam a, pakhatna a ni.

1908-ah Kristianah a inpe a, 1909-ah baptisma a chang. 1910-12 chhungin Rev. D.E. Jones-a hnuaiah tirhkoh hna a zir a, mautam buai avangin lehkha pawh zir ṭha hman lo mah se, examnaah an pâwlah a sang ber a ni tho a ni.

Lehkha a thiam theih ĕm avangin Cherrapunjee Theological College-ah kum 1913 khan Pathian thu zirin Rev. Frederick W. Savidge-a remruatnain a kal a, Mizoram tâna mi pawimawh tak la ni thei tûrah inngaiin Cherra-a a kal pawh hi Pathian hruaina ngei niah a inngai a; nasa takin a zir a, an examnaah pawh pakhatna a ni zĕl a ni.

Kum 1916-ah Tirhkoh atân rawih ṭan a ni ta a ni. Kum 1921-ah Pastor atân ordain a niin Saitual Bial a enkawl. Kum 1919-1921 harhna rûnpui laia khaipa ber a ni. Kum 1921 aṭanga a pension thlengin Bial awp Pastor hna a thawk a, kum 96 mi niin June 27, 1979 khan a thi.

Liangkhaia hian Thurin Bu leh Hrilhfiahna Bu leh Pathian thu lam lehkha bu eng emaw zat a ziak a. Arsi chanchin te, Mizo History te, Mizo Culture lam te pawh a ziak a, kehkha bu 30 chuang a ziak a, Mizo Academy of Letters (MAL) chuan a hmasa ber atân chawimawina Academy Award an hlan a ni.

Thuziak chang ni lovin, Hlaphuah hlei hlei hi a thiam emaw tih tur a ni. Kristian Hla bua mizopa kutchhuak kan neih zingah chuan a ṭhahnem ber a, a hla 30 lai KHB-ah hian telh a ni.

Cherrapunjee khaw dai vĕl hi thing awm lova phûl leh lungkĕlhâ chhawrdawh a tam a. Kum1988 March thla khan KJP Synod-ah Diakkawn Pastor Bial Zaipawl-ten zaia rawngbawlna kan zu nei ve a. Rev. Liangkhaia te kalna Cherra Theological School Building chu a ngai tĕin an lo la kal a, he building chhungah hian zan thum zet kan riak a ni.

Cherrapunjee-a kan awm chhung leh, Theological Schoola kan chĕn chung hian kan Pastor Cherraa zir hote kha rilru mithlâah an châm reng a. Rev. Liangkhaian Thisen hlu thiasen hlu tih leh, he hla Thu mak ka sawi nin theih loh chu tih a phuahna hmuna han awm meuh chuan rilru a thar duh hle mai.

Ka rilrua a lo lan dân chuan, Cherrapunjee khaw dai, Kalvary tlang niawm tak tak chu Liangkhaia hian hmuin Kalvary tlangah chanin, Thu mak ka sawi nin theih loh chu,
Kalvary chanchin a ni, tiin kum 1913 khân a phuah ta a nih ngei dawn hi tiin ka ngaihtuah neuh neuh a ni. He hla a phuah lai hian Tirhkoh a la ni.

He hla hi Charles Hutchinson Gabriela hla,
Sing, oh sing, the old story
Of ours Saviour’s Matchless love! (SSS No 81, Mizo ṭawnga lettu – Lalthanchhûnga 1885-1967) thlûkin a thu hi a phuah a ni.

Liangkhaia hian, Kalvary tlângah Pathian Fa mal chu, ani misual tâna a lo thi mai hi mak a ti a, Van Angelte leh Serafim te, ni tina Lalpa rawngbawltute chu Kalvary tlâng chanchin (Lal Isua thih chhan) chu a zâwt kual a, an lo chhâng thiam bik si lo.

A thlarau chu, Kalvary tlângah chhûn zâna va lĕng a, Lal Isua Kross lera nunga awm chu va zawt tur leh, anin a lo hrilh theih tur thu a hrilh ta a ni.

Chu Kalvary chanchin – Lal Isua misual tâna a thih thu chu, khawvel zawng zawng, naupang leh puitling pawhin hriain Isua ke bula kuna a hming faka zai turin a ti a, Kalvary-a an tân Lal Isuan a tuar tawh avangin, an chawimawi lĕt ve tur a ni tiin thu a pe a ni ber mai.

Liangkhaia hian Cherra dai aṭangin Kalvary tlâng a hmu fiah tak meuh meuh a ni.

October, 1919 khân Lungrâng khuaah Chhim Presbytery khawmpui an hmang a, Kohhran aiawhin Durtlang lal Suaka nen an tel ve a. Tirhkoh Liangkhaia (Tirhkoh a la nih lai) chuan Jn 3:16 thupuiah a sermon a. A sawi thiamin a tui bawk a, an vai ṭah titih a ni awm e.
Rev.J.H. Lowrain-a neuh pawh a ṭap a, ‘Tunah zet chuan Kalvary ka hmu chiang ve ta. He pheikhawk ngei hian Kalvary tlang vaivut a lo rap tawh a, mahse, Lungrâng pulpit bulah Kalvary tlâng a lo chiang ber a ni,’ a ti hial e an ti. Chumi ṭum chuan he hla hi tlai dar thum aṭanga zân dar sawm thleng rawkin an sa niin an sawi.

He hla hi tun lai thlenga Mizo ṭawng hmang ringtuten Pathian faka chawimawi nâna kan sak nin theih loh a la ni.
Kalvary tláng chanchin hi rinna mita hmuh leh hriat hian a lo chiang ber mai e.

Chhim leh hmâr, chhak keh thlanga mi,
A ke bulah lo kûn se;
A pui a pang, a lian a tĕ,
A hming fakin zai rawh se.

Kalvary-ah, Kalvary-ah,
An tân a tuar tawh vangin.

Leave a Reply

Your email address will not be published. Required fields are marked *

error: Content is protected !!