Tholeh Lalpa nena len dun – Upa K. Zalawma – Mizo sermon

Tin, an kalna tûr khua chu an thleng dâwn ta a; tin, ani chu hla deuhva kal tum angin a awm a. Tin, kâin an chelh a, “Kan hnênah awm ta che; khua a tlai dâwn ta a, ni pawh a tlâk dâwn tawh hi,” an ti a. Tichuan, an hnêna awm tûrin a lût ta a. Tin, heti hi a ni a, an hnênah chaw kîla a ṭhutin chhang a la a, mal a sâwm a, a phel a, an hnênah a pe a. Tin, an mit a lo vâr a, a hmêl an lo hre ta a; tin, ani chu a ral ta mai a. Tin, anni chuan, “Kalkawnga min biak laia Pathian Lehkha Thute min hrilhfiah lai khân, kan thinlung a harh huai rêng lâwm ni kha?” an ti a.
Luka 24:28‭-‬32.

Lal Isua a thawhleh ni khan zirtir zinga mi pahnih chu Emmau khaw panin an kal a (Heta zirtir pahnihte hi Apostol zinga mi an ni lo a niang). Jerusalem khuaah chuan Isua thlân ruak chungchângah titi a tam hman hle a, Puithiamten thlân vengtute pawh thamin, Isua ruang chu a zirtirten an ru ti turin an ti a ni.

Emmau khua hi Jerusalem aṭangin km 13 vel a niang.
Ṭhian dun Emmau khaw pana kalte titi ber chu Isua thih thu, phûma a awm a, thlân a ruak leh si te a ni a. Thlân ruak thuah an inhnial a ni thei e. Hetia an sawi dun lai hian an zingah Isua a lo tel ve a, an mit tihvaih a nih avangin Isua a nih an hre lo.

Isuan an titina thu a han zâwt a, Isua chu thil hre lo an ti hle a, Kleopa zawk chuan, “Jerusalem-ah nangmah chauhin em ni i chĕn, tun laia thil awm zia hi i hriat loh ni?” a ti a.

Isuan Pathian lehkha thu zawng zawnga a chanchin an ziahna apiang chu anmahni a hrilhfiah zĕl a.

An kalna tur khua an thlen dawn chuan Isua chu hla deuhva kal tum angin a awm a. Anni chuan, “Kan hnenah awm ta che; khua a tlai dawn ta a, ni pawh a tlâk dâwn tawh hi,” an ti a.

Tichuan an hnena awm turin inah an lut ta a. An hnena chaw kila a ṭhut laiin chhang a la a, mal a sâwm a, a phel a, an hnenah a pe a. An mit a lo var a, Isua hmĕl chu an lo hre ta a; a ni chu a ral ta mai a. Anni chuan, “Kalkawnga min biak laia Pathian Lehkha Thute min hrilhfiah lai khân, kan mit a var huai rĕng lawm ni kha?” an ti ta hehaw mai a ni.

Lal Isuan amah sawmtute a hnar ngai lo:
Kleopa-te ṭhian dûn khan Isua kha an hnena awm turin sawm ta lo se, Isua hmua hre turin an mit tihvarin a awm kher lo vang. An sawm tâkah chuan Isuan a hnar lo va, an hnena awm tûrin a lût ve ta a ni.

Lal Isua hian thinlung taka sâwmtute a hnar ngai lova, keini pawhin kan sâwm chuan min hnar dawn lo a ni.

An mit a lo var a, tholeh Lalpa an hre ta:

An hnena chaw ei tura a luh a, chhang laa mal a sawma a han phel chuan, an zinga a lo tih ṭhin a nih zia an hmuhin an mit a lo var ta a, an manganna chu lawmnaah a chang a, a tlai a tlaiin Jerusalem lamah an ṭhiante Isua thawhleh thu hrilh turin an kir leh ta a ni. Isua hi an sâwm sual lo hle mai. Isua nĕn an lĕng ho miau a.

Isua i sawm ve ang u:
Lal Isua sâwm nachâng hre lo hian a thawhlehni te hi phûr takin kan lo hmang ve reng thei a, amah hre chiang lovin lungngai leh beidawng takin kan lo awm dah ang e.

Natna leh thihna te, beidawnna leh hlawhchhamna te tuarin kan nun ram hi a lo chau reng thei. Kan tu leh fate sualin a manin ruih hlo bawihah an tâng reng em? Kan taksa a hrisel loin natna khirh tak takin min tlâkbuak mĕk em?
Lal Isua hi kan hnena awm turin i sawm ve ang u. Tichuan anin thlamuanna leh lawmna min hnutchhiah dâwn a ni. Johana chuan, “…amah chu ĕngah a awm angin keini pawh ĕngah kan awm chuan, kan inpâwl tlâng a, tin, a Fapa thisenin kan sual zawng zawng min tlen faisak ṭhin,” (I Joh. 1:7) a ti.

Tho leh Lalpa nen in lĕng dûn ve tawh em le?

Kei pawh tûnah ka sâwm che Lal Isu,
Ka khawvel dam lai ni a tlâk hmâ ngei hianin,
Min awmpuiin tlai khua min varpui ve la;
Ka thlarau, lo nghâk rawh, i Lal Isua.

Leave a Reply

Your email address will not be published. Required fields are marked *

error: Content is protected !!