Thlarau thianghlim leh mei baptisma – Mizo Sermon

Ṭpa Ngente.

Thlarau thianghlim leh mei baptisma hi ringtu nun bul ṭanna a ni lo va, hnathawh pawimawh em em a neih chu, ‘Van khawpui thianghlima hruai luh tlak ni tura ni tina ringtu nun kang fai zeltu, ringtute hnena chakna, nghehna, huaisenna leh thiltihtheihna petu, sual hnehna nun petu, thlarau lam thilpek chi hrang hrang hmanga rawngbawl theihna petu’ a ni.

Lal Isua chuan Tirhkohte 1:8 ah “Nimahsela Thlarau Thianghlim chu in chunga a lo thlen hunah thiltihtheihna in la nei ang; tichuan Jerusalem khuaah te, Judai leh Samari ram khaw tinah te, kawlkil thleng pawhin ka thuhretute in ni ang,” tiin a lo sawi lawk a.

Johana khan, “Kei zawngin tuiin ka baptis thin che u a; nimahsela, keimah aia ropui zawk a lo kal dawn e, a pheikhawk hrui phelh tlak pawh ka ni lo ve; ani chuan Thlarau Thianghlim leh meiin a baptis ang che u” a ti bawk a. (Luka 3:16)

Tichuan, Thuthlung thar lama a hmasa ber atan Penticost niah khan Lalpa nghaktu awmkhawmho hnenah Thlarau Thianghlim leh mei baptisma chu a lo thleng ta a. A hma zawnga hlau dep dêpa awm ṭhin khan huaisenna an lo nei ta a, an hriatna te tih thar saka awmin thiltihtheihna pawh an lo nei ta bawk a. Tharau Thianghlim thuamna chi dang pawh tam tak an dawng a ni. Tichuan, khata ṭang khan Thlarau Thianghlim chuan ringtute chu Lal Isua lo kal leh hma zawnga kawng engkima min hruaitu ni zel turin min cham chilh ta reng a ni.

Bible hi ngun taka kan en chuan, Penticos ni thlen hnuah ringtu ni tawh Thlarau thianghlim la chang lo kan hmu nual a. Ethiopia mitilreh chuan Pathian lawm tlaka Pathian a biak reng tawh laiin Thlarau thianghlim a la chang lo va, Thlarau thianghlim a chan theih nan a hnenah Philipa tirh a ni a. Tin, Kornelia pawhin Pathian lawm tlaka Pathian a biak reng tawh hnuah Thlarau thianghlim a la chang lo bawk a, a hnenah Petera tirh a ni tih kan hmu bawk.

Samari khuaa miten Pathian pawm tlak piantharna an chan hnuin Thlarau thianghlim an la chang lo va, Tirhkohte an hnenah zuk kalin an chungah kut an nghat a, Thlarau thianghlim an chang ta chauh bawk a. Chutiang bawkin Ephesi khuaa mite pawhin Thlarau thianghlim chan tir tlak piantharna an neih hnuah Thlarau thianghlim chu a awm tih pawh an lo la hre lo va, Paulan an chungah kut a nghah hnuah Thlarau thianghlim chu an chang ta a ni.

Pentikos nia Thlarau thianghlim baptisma changtute pawh kha ngun taka kan en chuan, Thlarau thianghlim leh mei baptisma an chan hma pawh khan Isua ringtu ni hlawm tawh mahse, chakna, huaisenna, hriatna, thiltihtheihna leh thianghlimnatea thuamin an la awm lo va. Thlarau Thianghlim leh mei baptistma an chan chinah kha chuan heng zawng zawng hian thuamin an awm ta a nih kha.

Hengte aṭanga lo lang ta chu, mihringte hi Thlarau Thianghlimin chhandamna changtua min han siam hian, Thlarau Thianghlim hnathawh leh puihna changtu leh dawngtu chu kan ni ngei mai. Mahse, Thlarau Thianghlim hnathawh chi dang kan han sawite khi kan la chang nghal mai lo va, ni tina kan nun kâng faitu ni tur leh, chakna, huaisenna, hriatna leh thiltihtheihna tea thuama kan awm theih nan ‘Thlarau Thianghlim leh Mei baptisma tak tak’ hi chan kan mamawh ṭhin a ni.

Tichuan, Thlarau Thianghlim chuan kan dam chhungin nitin min kang faiin min tithianghlim zel ang a, Tirhkoh Paulan ‘Nitin ka thi ṭhin’ a tih ang khan nitin sual thihsana tihthianghlimna chang zelin ‘Van Khawpui’ khi thianghlim famkimin hruai thlenin kan awm ang.

Chuvang chu a ni an pianthar hnua Thlarau Thianghlim leh Mei baptisma la chang lo Ethiopia mitilreh te, Kornelia hnenah te, Samari khuaa mite hnenah te leh Ephesi khuaa mite te hnenahte khan tirhkohte kha tirh an nih ni. Anni mi tlemtê te hi entirna ni turin Pathianin kan Bible-ah hian min lo tar lan sak a lo ni.

Leave a Reply

Your email address will not be published. Required fields are marked *

error: Content is protected !!