Thlalera vak ka lo nih hi bihchianna – Upa K. Zalawma

THLALERA VAK KA LO NIH HI

Upa K. Zalawma

He hla hi Rev. Edwin Rowlands (Zosapthara 1897-1939)-an Welsh hla thlûk J.A. Lloyd-a(1815-1874) siam hmanga Mizo ṭawnga a phuah a ni. (Zosapthara tiin kan sawi zel tawh ang.)

Zosapthara hi Welsh ram aṭangin Mizorama Missionary hna thawk turin Dec. 31, 1898 4:30Pm-ah Aizawl a lo thleng a; 1908 kumah chawlhtir a ni a, Mizoramah kum 10 pawh a awm tling meuh lo a ni.

Mizorama a thawh hnu hian Khumi (Matu) ramah Missionary hna a thawk leh a, Kemmidine High School zirtirtu niin, August ni 6, 1939-ah kum 72 mi niin a thawhrimna chawlh sanin Lalpa hnenah a chawl hlen ta a ni.
Mizoram leh Khumi rama a awm chhung hian hla103 a phuah hman a ni.

Thlalera vak ka lo nih hi tih hla a phuah dawna kawng boa mi thlama zan a riah chanchin ngaihnawm tak hi sawi dan chi hnih a awm a, he hla lo pian chhuahna chhan a nih avangin a chanchin dang sawi tel lovin kan luhchilh mai ang a, sei deuh mahse kan dawh hram hram dawn nia.

1.Zosapthara hi Mizoram Welsh Mission Field-a a lo leihnawn tâkah chuan, chhim lama a ṭhiante pahnih Sap Upa leh Pu Buanga te a pan phei a. Thawhho a lo remchân loh avangin Tlabungah a chhuk a, Rangamati-ah kal zelin Silchar-ah, chuta ṭangin Lakhipur-ah muangchângin a lo kal chhuak a, Saptlangvala nên an inhmu a. Ani chuan ram chin hria tiin Mission Field zawnsakah a lo ngên a, “Ni ang hmiang” tiin Patlaia leh Kuaichika nên Silchar aṭangin Rêngpui tlâng dûngah, Zoram sir hnam chekhnawkho an hrût phei a.

[adToAppearHere]

Khawthlang ramri hrût phei zelin Arakan-ah Akyap thlengin an kal a. Chuta ṭangin Pawi ram an rawn pal phei leh a, ngawpui zau tak takah lûtin Sai tluang te an zawh a, ramhnuaiah pawh an riak a ni.

Lakher khaw hnai ber luh tuma ni hnih zet an lo phei hnuin an inhloh buai ta a ni. Patlaia leh Kuaichika hi an hmanhmawh deuh a ni ang chu an pu chu an kalsan ta daih mai a. Ani chuan an hnû chu a rawn chhui zel a, kawng mumal ta lo chu a bo ta daih mai a. A tirhkoh hruaite chu eng emaw tiin khuaah an lut hrâm a, a ni Zosapthara erawhchu rampalailêngah a bo chiang hle.

Tlai lamah chuan thlawhhma êng a hmu a, a pan nghal a, an thlâmah chuan a riak ta a. Thlâmah chuan tuiûm pakhat tui awm sa a lo awm hlauh a, zanriah atân maite pum khat a ring. Hemi ṭum hian ‘Thlalera vak ka lo ni’ tih hla ṭha tak hi a phuah ta a ni.

A tirhkoh hruaite chuan an ngaihtuah em em mai a. A tûk zingah an zuk zawng a, he hla a phuah lai mêk hian an zuk hmu ta a. A han sa nghal a, a tirhkoh hruaite rilru chu a khawih êm êm mai a, an ṭap zawih zawih mai a ni. Heta ṭang hi chuan a bo champhaphâk apiangin maite pum khat chauh chawah a ring ṭhin (Kristian Hla Bu bihchianna V.L. Luaha Renthlei).

2. B. Lalthanglianan Zosapthara chanchin a ziah, Zosapthara chanchin chhui kawnga hawl zau ber leh rinchhan tur nei tha L. Keivoma thuziak zulzuia a ziah hi lo thlir ve thung ila :
” ….Kum 1923 aṭanga November thla thleng Zosapthara Diary-a hmuh theiha a tlawh khuate lo tarlang ve leh zawr zawr ila, a pawimawh lai pahnih erawh chu kan sawi zau deuh ang a. Burma chhim thlang, Arakan state khawpui Akyab (Burmese-ho chuan Sittwe an ti a) aṭangin he a Diary hi a inziak ṭan a ni. Chhimtuipui (Koladyne) zawhin hmar lam a pan zel a, June thla tâwpah Chin Hills chhim tâwp khawpui ve deuh Paletwa a thleng a.

Chhimtuipui zawha hmâr lam panin Khumi chi chên tamna khaw 4 Ngada, Daletwa, Kaletwa leh Suiiaw-ah te a riak a. July 14-ah Mara rama Lailen khua pêlin Khu-mi khaw tê tak tê Aungtalein-ah Pathianni a hmang a. A tukah Chhimtuipui bawk zawhin Arakan Hill Tracts leh Mizoram inrina Prehwis a thleng a, ni khat a châm a. Kea rei lo te an kal hnuin lawng têin an kal a. Chumi hnu chuan Taung mual chho takah khawsik chungin kein an kal a, Tongkolong khua an pan a, ni 19 July 1923 (Thawhlehni)-ah Tongkolong khua an thleng.

[adToAppearHere]

Thlalera vak ka lo nih hi,
Ding leh vei bo tawnin;
tih hla hriat hlawh tak, Zofate zingah thawnthu ngaihnawm taka sawi kumkhua tûr a nih avangin, ni 20-21 July-a a Diary ziak hi a kimin i lo chhiar ve teh ang.

Zirtawpni, July 20, 1923 :
Tlangval pakhatin ka hlawh min zawt a. Hei hi anniho zingah leh mi dang hnenah pawh an thil zawh fo a ni a. Patlaian a chhang thiam ber thin.

Tongkolong aṭangin zing dar 7:30-ah kan chhuak a, darkar hnih thum vel chhûng chu kan kal tluang khawp mai. Hmun pakhatah kawng pêng a lo awm a, kawng pakhat chuan Serkawr a chhun a, pakhat zâwk chuan Longban. A ram mi, puakphurte chu khaw kar hlat dân zawh ṭhin an ni a. Mahse kan khaw chhuahsan tâk nge hla tawh zawk, kan la pan tur khua? ti zâwnga zawh a ni. Chutiang chuan kan han zawt a, an inhnial phah hrep ta nghe nghe.

Lui kan thleng a, a kamah mei chhemin thingpui kan lum a, chaw kan ei nghal bawk. Chuta ṭang chuan kawng chu ngil taka zawh tur a nih leh nih loh kan zâwt a. Zîng aṭang tawh khân kal fâlin hma ka hruai zel a, chutianga kal zêl chuan kawng eng emaw chen chu ka tluang hle. Mahse pêng dang a lo awm leh a, chutah chuan ka pêng sual ta a ni.
Chutiang kawng pêng a awm thu chu tuman min hrilh lawk si lo.

Eng emaw chen ka kal hnu chuan, ka zinpuite nghâkin ka ṭhu châwl ta a, mahse tumah an lo lang rêng rêng si lo! Kawng ka bo a ni ang tih ka hlauthamâwng ,an ta a. Kawng dik zâwk man turin ka kir leh a. Chumi hmun chu lo zau a ni a, an kih thluk thing luang hrawl tak tak a lum rum mai a. Kawng pêng kha ka thleng leh a, eng emaw chen ṭhuin ka lo nghâk leh rih a. Mahse ka zinpuite thâwm rêng rêng ka hre ta si lo!

Tichuan ding lama pêng kawng chu zawhin tlângah ka lawn chho a, mahse khua a hlat ka rin avangin ka kir leh a, a tlai tawh viau a, min thim hnan mai dawn si! Vei lama pêng zâwk chu zawhin mêl chanve dâwn lai ka kal thung a, mahse ka rin ngam ngang loh avangin ka kir leh ta zawk a. Tunah zet chuan ka mangang ta! Khaw panna ka hmuh hlauh beiseiin thing luang a lum rumna loah chuan ka vak lut a, mahse engmah ka hmu lo.

Ka nghah hmasakna kawngah bawk ka kir leh a, chuta ṭang chuan râla thlâm ka hmu a, ka pan ta ngawt a. Mahse tumah rêng an lo awm lo; ka au vak a, tuman min chhâng hek lo. Ka thil ken chhun chu inhrûkna (towel) chauh a ni mai a.

Ka zinpuiten emaw, an mi tirhten emaw min rawn zawn ngei beiseiin, thlâm kawtah chuan raw lerah ka towel chu ka tar a. Ruahpui vanawnin min rawn nang a, han mai tum lovin a baw hawk hawk mai a. A han deuh hnu chuan thing ṭang roah ka rawmawl tarin kawngpuiah chuan ka va sawh bur a. Thlâmah chuan nawhalh ka han zawng a, a hlimthla pawh ka hmu lo. Ka hak lai kekawr, kawr leh ka lukhum chu ka kawl chhun a ni.

Zân a ni dêr tawh a, a vawt ṭan hle. Zân reia a vawh tûrzia ka ngaihtuah lai chuan, lehlamah thosi leh vaihmite an tlem phah thung ang tiin ka suangtuah a. Mahse duhna lai laia an sehna tur hmun a tam em avangin, ka inhiat zankhua a ni ber. Lung ka lukham a, muthilh chakin a chângin ka zangthal a, a châng leh ka ṭhu thung a, a châng leh ka tawm thul. Zing khawvar ka nghahhleh em em chu ka beisei aia hmain a lo thleng ta hlauh mai!

[adToAppearHere]

Inrinni, January 21, 1923 :
Zing dar 5 vêlah thlâm aṭangin ka chhuaka. Nimin tlaia ka kîrna lui kaiah bawk ka kîr leh a. Min zawngtute lokal beiseiin chutah chuan ka nghak a, darkar hnih chhûng zet ka mu a.

Zânah chuan ka zinpuite pawh an lo chi-ai ve hle a lo ni a. Khaw pakhat an han thleng a, chutah chuan ka lo awm an ring a. Min hmuh tak si loh avangin chuta ṭanga mel 7/8 vela hlâ, kristian awmna khua panin an thawk chhuak leh a. Chutah chuan le, nihliap pawh far tlang khawpa tam ruahpui vanâwnin a nang a. A thim em em a, an nawhalh bâwk chu an khawnvartui ken chuan a chiah a, an meitalh ken chu hmangin khawnvar chu an chhi thei hram a. Ṭhenkhat mut tawh hnuah khua an thleng a.

A tûk varṭianah min zawng turin an lo thawk leh ta a ni. Ka thawmhnaw phurtu, an khaw lama haw lehte leh min zawng tura kalte an lo thlen chuan lui kamah ka lo awm a. Min rawn au a, ka chhâng a. Pakhat chuan, “A va han lawmawm em! a ti a. “Kei pawh ka lawm ngawt asin, ka lawm takzet a ni,” ka ti a. Pakhat chuan a iptea chawfun a pai chu a kawk zauh a. Kei chuan thigpui ka chak ber zawk a. Khua aṭanga min zawng tura chhuak ve mi pahnih chu an han au a, an lo thleng ve thuai a. Anni chuan thingpui leh biskut ram chi (crackers) an rawn keng a, a va han tui tak em!

Khua (Kaisih) chu mel 5 vela hlâ, chho deuh hlir, khaw thlen dawn phei chu kikawi tak a ni a. Kan han thleng chu min lo lawm hle a. Kristianho, puitling leh leh naupang rualte chuan min rawn chibai hlawm a, an lawmzia chu ṭawngkain an sawi hlei thei lo a ni ber. An khaw bul lawka Maraho pawh ka thleng dawn tih an hriat avangin ar pahnih leh banhla tam tak kengin an lo kal a, min rawn pe a, an va tilawmawm tak em!

Heta Kristian khaw hrang hranga inbawkhote hi Champhai vel aṭanga lut deuh vek, Sula lui kawr hnâr dil kam leileta siam tuma pêm lut an ni ber a. Mi rawn bawrtu naupangte chuan enkawltu an mamawh hlein a lang. Henglaiah hi chuan Kristian nuna nun a harsatzia te min hrilh a. Mahse chuti chung chuan an chheh velah Pathain thu hrilin an kal chhuak a, ringtu awm lohna Mara khaw kawtthlerah te thu an sawi ṭhin a. Baptisma chang duh pawh an awm….

Heti chin hi duh tâwk mai ila. He hla sawi hlawh tak, tìtî ngaihnawm keng leh a thu hman pawh inhnial laih laihna tling hi, Zosaptharan kawngboa rilru hrehawm tak, thosi leh vaihmite seh zankhuaa a tuar hnu leh, rilṭam leh tuihâl a tuar hrep hnua a thinlung chhungril ber aṭanga lo hnâm, a thil tawn leh a tuarna te a leihbuakna, van ram nen a thlun zawmna, a satu apiangte rilru khawih hla a tling a. A tuartu tuarna chu Zofate tân chuan malsawmnaah a chang ta hlauh thung a ni.

Tirhkoh a hruai pahnih Patlaia leh Kuaichika leh mi dangten an hmuh chuan hla a lo phuah mêk a. Chuti a nih chuan he hla hi ‘ni 21 July 1923 zingah’ a phuah tihna a ni.

Rev. P.D. Sena sawi dan chuan, “An han ṭawngṭai tê tê a, chumi zawhah a hla phuah chu a han sa ta a :

Thlalera vak ka lo nih hi,
Ding leh vei bo tawnin;
Ka Pa in a lo hnai a ni,
Tiin ka beisei thin.

A chângin dinglam ka peng ang,
A chang pawh vei laman;
Tichuan pen zelin min kai la,
Paradis ram thelng chuan tih lai a han sak thlen meuh chuan, a Tirhkoh hruaite rilru chu a khawih em em avangin an ṭap zawih zawih mai a ni,’ a ti hial. A ni, vawiin thleng hian Zosapthara tuarna hriat thiampuitute pawh he hla an sak apiangin an thinlungah mittui a luang fo ṭhin – (Zosapthara pp -43-48).

Mizoramah kum 10 pawh awm ṭhaṭhum hman lova, hming hliau taka a hnâ chawlhtir a nih hnuah Chanchin Ṭha dam chhûnga vahvaih pui turin kan sawi tak ang khân Zosapthara chu a zam mai lo va, a nuam leh hrehawm sawi chuang lovin a pianna sap ram thlahlel zo lovin, a hna thawh pawh chawlhsan chuang lovin,
Chuchuan ka lung a leh teh e,
Chhiarsen loh awmna khian; Kalvari thihna chawimawite,
Pawl ka duh- fak ve nan.
tia khawhar tak chunga a lo thlir ṭhin hmuna châwl turin August ni 6, 1939ah chuan he lei hrehawm hi a kalsan ta a ni. A ma hla ngei hian hnu han khar ila :

Kan Lalpa hmunah chuan,
Kan inhmuh leh hma loh zawng; Pathianin min veng se,
Kan inhmuh kan intawh leh hma-zawng.

[adToAppearHere]

Leave a Reply

Your email address will not be published. Required fields are marked *

error: Content is protected !!