Thinlung sak tikeh theitu Pathian thu thiltithei – I – Biakhmingthanga Chhangte

“Pathian thu hi a nung a, thil a ti thei a, khandaih hriam tawn eng ang ai pawhin a hriam a….” Hebrai 4 : 12a.

“Pathian Thu” thiltihtheihzia Pathian thu a chunga kan tarlanah hian a lang chiang ber awm e. Pathian thuin thil a tihtheihzia kan hre tlangin he lai thu hi kan sawi tam ang hehuin kan nunah kan la lutin a takin kan chhawr lem hlei lo va. WhatsApp Gospel Group ṭhenkhata hetianga Pathian Thu Thiltithei mahni nuna hmanga, a natna dam ṭhin leh mi tam tak amah kaltlanga damna chang ṭhin ka hriat awm chhun chu (Pathian ropui nan) Pi C. Vanramnghakliani, W/o Rev. K. Lalpiangthara, Chhinga veng Pastor hi a la ni awm e. Hetianga Pathian Thu thiltithei hmang theite hi Thlarauva piangthar, Thlarau Thianghlima chhinchhiah leh luah khahna chang, chu mai ni lovin Thlarau an nuna awm leh cheng chu englai pawhin timit lo va chhem alh reng te hi an ni fo. Chutiang taka Thlarau Thianghlim nena nitin zan tina inpawla, Bible chhiar leh ṭawngṭaina neia Thlarau chu chhem alh ṭhatute chuan Pathian thu thiltithei hi an hmang a, Thim lal Kulh an su chim a, hnehna an chang ṭhin a ni. Keini hi engnge kan an ve le, kan thu sawi aṭangin Pathian thu thiltithei kan sawiin tunge thlarauvah tisa leh thlarau damna chang awm ve tawh le? Kan inenfiah a va ṭul tak em. Hetianga Pathian mi, Pathian thu kam hnih khat lek sawia, mite thinlung hneha, chhandamna ropui tak an chan tak dan te kan inenfiah nan i han sawi teh ang.

Khualzin hnialhrat : Dr. H.A.C. Malan, Switzerland, Geneva khuaa rawngbawltu chuan Paris-a a zin ṭuma zin ve pakhatin Kristianna thu-ah a hnialpui vak thu a sawi a. Dr. Malan-a chuan a chhanna reng rengah Pathian thu (Bible thu) chauh a hmang a, thu dang a sawi belh duh miah lo va. Chung Bible thute chu a hnialpuipa chuan engahmah a ngai duh lo zel a. A tawpah chuan, “I Bible hi ka ring lo a ni, khang hmanga mi hnial reng kha engnge a ṭulna?” a tivin hlur ta mai a. Dr. Malan-a chuan, “Ani chu ka ni tih in awih loh chuan in sual nei rengin in thi ang,” (Joh. 8 : 24) tiin a chhang leh mai a. Kum a liam leh hnu chuan Dr. Malan-a chuan a hriat ngai vak loh hnen aṭangin lehkha a dawng a, “Thlarau ngunhnam chuan mi vit tlang chuk a. Engtik lai pawhin chem hriam chu hêl ka tum reng a, nangmah ngei pawh van lam hriam hmantir loh che ka tum teh reng nen min vih belh ta zawk a, nangmah sûal lo vin Pathian zawk ka lo sûal tih min hriat chhuahtir ta a ni,” tiin. A lehkhathawn tawpah chuan kum kal taa Paris-a a zinpuipa hming a lo chuang a.

“Thlarau ngunhnam Pathian thu chu” Eph. 6 ; 17.

Mi hnialhrat Olney-a : Khitiang deuh chiah khi ring lo mi (Skeptic) lar tak Burt Olney-a chuan a tâwk a. Mi hnial hrat Burt Olney-a chuan rawngbawltu la valai tak hnenah, “Bible hi dik lo thei lo a nihna hi ka pawm lo,” a ti a. Rawngbawltu chuan, “Mihring tan vawikhat thih ruat a ni. Chumi hnuah rorelna a awm ang,” (Heb. 9 : 2) tiin a chhang a. Olney-a chuan, “Thih hnuah rorelna a awm lohzia ka fiahsak thei che,” a ti leh a. “Mahse, mite chu an thi si a,” tiin a sawi nawn leh mai a. “Inhnial theih pawh a ni lo ve,” tiin Olney-a chu a hawi tau sak a. Lungawi lo tak chungin, “Bible thua inhnial tur chuan i hre tawk lovah ka ngai che,” a ti ta ringawt a. Tlangval chuan, “I tidik mai thei, mahse, mihring tan vawi khat thih ruat a ni tih hrereng ang che,” a ti leh ringawt a. Chumi zana Olney-a ngaihtuahna luahtu chu, “Rorelna,” tih chauh a ni ta mai a. Amah inthiam lohna chiang tak a neih hma chuan a thluakah chu thu chu a ri ta tluk tluk mai a. Zingah thovin hmanhmawh taka kalin chhandama a awm ve theih dan tur Pathian mi chu a zawt ta ruai a.

“Chuvangin, Lalpa, sipaihote Pathian chuan heti hian a ti : Chutiang thu chu in sawi avangin, ngai rawh, i kaa ka thute chu meiah ka chantir ang a, heng mipuite hi thingah, tin, a kang zo vang Jer. 5 : 14.

Ram pum hlauh Desperado : Pathian thu thiltihtheihzia hi a ropuiin a mak a ni. South Africa hnam mawl zinga missionary tura Robert Moffat-a a kal lai khan mi pakhat Hottentot Desperado-a (Afican-ho koh dan) kha ram.pum hlauh a ni a. Cape Town khawpui Governor pawhin a lu man atan Doller 500 pek a tiam nghe nghe a ni. Desperado-a chuan a lu ruh chu tui in nan a lo hmang mai ang tia an vauva an sawiṭhaih chung pawhin Moffat-a chu African hnamte zinga Chanchin Ṭha hril turin a inpe a. Pathian venhimna ring chung leh Chanchin Ṭha thiltihtheihna hmachhuanin he missionary huaisen leh tum ruh hian heng hnam mawl leh kawlhsen tak te chu a kaa thuchah awm nen chuan a pan ta a. Chu a rawngbawlnaa amah zuitu hmasa ber chu Africa mi mawl, sual buru tak mai, mi sual hmingthang Desperado ngei kha a ni ta tlat mai. A nun a lo danglama Kristian zaidam leh tlawm tak nia Moffat-a’n Cape Town khawpuia a rawn hruai kir chuan, an Governor mak ti lutuk chuan, “Thil mak a ni. Khawvel thil mak pariatna a ni,” a lo ti hial a ni.

“Chanchin Ṭha chu….thiltihtheihna leh Thlarau Thianghlim leh nasa taka…a lo thlen zawk kha” 1 Thes. 1 : 5.

Pathian thu thiltithei chuan misual thinlung, lung anga sak chu tui angin a tinem thei ṭhin a ni. Chuti khawpa Pathian thu thiltithei, mite thinlung khauh tikeha siam ṭha thei chu a takin kan hmang ve dawn lawm ni? Kan taksaah natna awm te hi kan tuar ngawt ngawt mai em ni? Nge damdawiina kalin Doctor kan pan mai? Kan englai emaw a lo natin “A vuakna vualte chuan tihdamin ka awm tawh,” tia vawi tam sawiin kan natnate chu thu thiltithei chuan hneh kan tum mai dawn lawm ni. Minluhlulte thinlung sak a tihkeh sawm theih chuan thu thiltithei hmangin kan hneh ve thei dawn lawm ni?? I kaa thu thiltithei a dah tawh kha hmang ve rawh le.

Leave a Reply

Your email address will not be published. Required fields are marked *

error: Content is protected !!