Thil tha tih – Upa K. Zalawma

THIL ṬHA TIH

-Upa K. Zalawma

Rinna avânga khawngaihnaa chhandam in ni si a; nangmahni thawh chhuah a ni lo va, Pathian thilpêk a ni; thiltih avâng a ni lo ve; chuti lo chuan, miin an chhuang dah ang e. Thil ṭha ti atân Krista Isuaah chuan siama awmin, ama kutchhuak kan ni si a; chu thil ṭha tih chu kan awmna tûrin Pathianin a buatsaih lâwk a ni. Ephesi 2:8‭-‬10.

1. Thil ṭha ti tûra Krista Isuaa siam kan ni:
Tirhkoh Paula hian chhandam kan nih dân leh Pathianin min chhandam chhan helai chângah hian a sawi a ni. Thuthlung Hlui lamah chuan dân bawhchhetu chuan ngaihdam a nih theih nân thiltihin – inthawina hlanin ngaihdamna a hmu ṭhin. Chutianga thiltisualtuin Puithiam kal tlanga ngaihdamna a chan ṭhin chu lo la kal tûr Lal Isua thil tih leh a hnathawh lo entir lâwkna a ni. Lal Isua a lo kal khân Juda sakhaw hruaitute’n an lo hre thiam lo. Paula chuan Lal Isua rinna avanga khawngaihnaa chhandam in ni, inthawh chhuah emaw, in thiltih vang a ni lo ve, Pathian thilpêk a ni tiin Ephesi khuaa mite henah a rawn sawi ta a; a sawi zêlnaah thil ṭha ti atân Krista Isuaah chuan siama awmin, Pathian kutchhuak (Handwork) kan ni a, chu thil ṭha tih chu kan nunpui tûr a ni ta zâwk e tiin a sawi ta a ni. Khawngaihnaa chhandamte chuan, an mahni Chhandamtu tân thil ṭha an ti tawh tur a nih chu.

Engnge ni thil ṭha chu?: Mi dangte mamawh tih sak leh puih an ngaih huna puih hi thil ṭha tih chu a ni. Mi hàng naupang pakhat hi a nu thih ngamin a dam lo va, sahbawn leina tur takngial pawh an nei si lo va, dawr pakhatah sahbawn chu a la ru ta a. Dawr nghâktu chuan lo hmuin a um a, pâwnah an in nangchîng a, thuneitute hnena report a tum laiin mihâng khualzin nu pakhain a lo hmu a, a thil lâk man chu dollar 15 a ni a, chu nu chuan a pawisa dollar 20 chu a pêk sak ta a. Chu naupang hnenah chuan lehkha ziak “Pe chhawng zel rawh” tih chu a pe thung a.

[adToAppearHere]

Kum 20 hnuah chuan chu nu chu zai a nih loh chuan ni rei lo te hnuah thi mai tur dinhmunah a lo awm ta a. Tumah hmelhriat leh ṭanpuitu tur a nei si lo. Chutih lai chuan naupang thil a tihsaka kha doctor a lo ni tawh a, chu nu hnenah chuan lo kalin a mamawh zawng zawng chu a tum sak tur thu hrilh pahin a naupan laia thil a tihsak leh a nu nunna a chhanhim sak thu te, a nuin mi dang ṭanpui ve tura a hrilh thu te hrilhin, “Pe chhâwng zel rawh” tih lehkha a pek ngei kha a rawn pe let ve lah ta a ni.

Mi dangte tana thil ṭha ti ve tura Pathian siam kan nih hi a takin i nunpui ve ang u.

2. Krista Isua aṭanga thil ṭha tih a pawi mawh:
Krista chuan phût lêt nei lovin kan tân thil ṭha tiin a nunna hial a hlân a. Chutiang chuan ringtute chuan Isua aṭangin, Isua rilru pu chungin thil ṭha kan ti ve tur a ni.

3. Thil ṭha tih chu kan nunphung pangngai tur a ni: Kan changthlanah hian, “..chu thil ṭha tih chu kan awmna turin Pathianin a buatsaih lawk a ni,” tih kan hmu.

Mahni tâna ṭha tur lama ṭhahnem ngai ṭhin khân, mi dangte tâna thil ṭha tih kha kan nitin nunphung tur a lo ni ta a ni.

Mihring chungah mai ni lovin, ram leh hnam leh khawtlâng tâna thil ṭha tih hi kan dam chhan pakhat a ni tih kan hre reng tûr a ni.

Politics kheltute pawhin mahni sahmim tihpuarna atân chauh ni lovin, kan ram leh khawtlang tâna thil ṭha leh tlo tûrin hna thawk ila, kan thil tih leh hnathawh rêng rêng hi Pathian malsawm tlâkin thawk ila, thil ṭha kan tih chuan kan taksa leh khawtlang, ram leh hnam tâna ṭha lo tur chu kan ti dawn lo tih a chiang sa mai a; Kan ram hian hma a sawn ang a, mipui dinhmun inthlau lutuk tur hi a ziawm ang a, kan thawhchhuah midang tâna chhenfâkawm a lo ni ve thei tawh ang a, khawvel ram zau zâwkah Chanchin Ṭha puan darh hna kan thawk tam thei bawk dawn a lo ni.

Perawh u, tichuan pekin in awm ang. Lk 6:38

[adToAppearHere]

Leave a Reply

Your email address will not be published. Required fields are marked *

error: Content is protected !!