Thil ropui, Lalpa awm lohnate – Lal Ramhluna Ralte

THIL ROPUI LALPA AWM LOHNATE.
(I-Lalte 19:11-12 )

1. Thlipui (A great Wind)
2. Lirnghing ( A great earthquake)
3. Mei ( A great fire)

Eliza chanchin atangin zirlai kan phawrh ta sa sa, i lo bih zui leh teh ang hmiang.

Eliza chu a bihrûkna Horeb tlang pûk pakhatah chuan a tawm hle hle mai a. Chutah chuan Lalpa thu a lo thleng a, “Va chhuak la, tlangah sawn LALPA hmaah va ding rawh, ” a ti a.

Chutah chuan Lalpa a lo kal a, thlipui na takin tlangte chu Lalpa hmaah chuan a rawn chhem khi a, Lungpui chu a phel rem rum a. Nimahsela thli-ah chuan LALPA chu a awm lo. (ILalte 19:11).

Pathian chu Sinai tlangah khan Mosia hmaah khawpui ri te, kawlphe te, tawtawrawt ri tein a in tarlang tawh a. (Exo. 20:18,) Thup. 10″3-4 kan en chuan khawpui ri pasarih hmangin a in tarlang tawh bawk.

Eliza hnena LALPA a inlan hmaa thil thleng hmasa ber chu thlipui na tak hi a ni. A thawk na khawp mai, tlang chhem khi phawk khawp a ni a, lungpuite chu a phel rem rum mai a ni! Ropui tak tur a ni. Nimahsela Thli-ah chuan LALPA chu a awm lo tlat!

Mite nunah engtinnge a thlen chu ka sawi thei lo va. Heti hian ka ngaihtuah thin: Lalpa chenchilh leh thlarau thianghlimin min khawih thar duhin Inkhawmpui ropuite kan buatsaih thin a. A hûhâng boruak avangin kan che a,kan insawi dual dual a, kan puak keha kan phel rem rum a, nimahsela kan nunah LALPA a thleng zo lo fo thin. Amosa’n a lo sawi ang khan, ” In kutte ka huain ka hmusit a, in inkhâwmpui urhsûnahte chuan ka lâwm hek lo vang a. A ni, in hâlral thilhlan leh in buhhlan min hlân mah ula, ka pawm lo vang a, in ran thau remhlante pawh ka ngaihsak hek lo vang a. I tingtang rimawi chu ka ngaithla lo vang; chuvângin ka lakah i hla beng chheng chu la bo rawh.”(Amosa 5:21-23) min ti thin hian ka hre thin. A boruakah, a phaw vuakah kan lo keh sawm ve a, kan nunah LALPA a thleng zo si lo! Inkhawmpui zawhah kan nunah Lalpan Lalna a chang pha zui leh thin lo fo!
Dan angin chaw kan nghei a, dan angin kan bethel a, ring tak takin kan au va, nimahsela Lalpa nen kan intawk si lo!

Speaker pakhat thusawi ka hriat reng chu, “Hmeichhia i councelling-a an mittui a tlak zawih zawih hnu pawhin ngaih titha mai suh, sual inhriatna avanga mittui tla mai chauh an la ni, simna tak tak an la thleng pha lo va, an thinlungah Isua an la senglut phal lo” a ti.
Hetiang deuh hian thusawi ropui te, hla sak ropui ten min vaw tliak fo, kan nun erawh Lalpan a sawi danglam si lo hi a pawi em em chu a ni.

Mi rethei leh chhumchhiate tan kan luang liam a, nimahsela keimahni inchawimawina mai a lo ni!
Hmangaihna(Pathian) tel lovin kan nun pawh kan thâp ngam a ni thei, nimahsela dar ri mai mai ang chauh kan lo ni si! (IKor. 13:1-3).

A dawt lehah chuan Lir na takin a rawn nghing a, nimahsela Lirnghingah chuan LALPA a awm lo!

Thuhriltu mak tak tak thuhril kan ngaithla a, Biak in pêl pêlin khawi khawiah emaw kan thên a, thusawitu lar apiang kan ûm kual a, na takin kan nun pawh a sâwi che ve. Nimahsela Thutak, Isua kan nei si lo!

Lirnghing zawhah chuan Mei a lo chhuak a, nimahsela meiah chuan LALPA chu a awm lo!

Entir hrang hrang awm thei karah Mei chuan thiltihtheihna a entir thei ang. (Isa. 47:14, Heb. 11:34)
Hriatna, thiamna, zirsanna lamah mizote hi kan thleng sang hle. Kan Pathian thu sawi dan a sang a, ril tak tak thlengin kan hrilhfiah thin. Thlarau Thianghlimin nun a khawih danglam loh, hriatna leh thiamna ringawt hi Lalpa thil tum a ni lo. Dik tak chuan kan hriatna te, kan thiamna te, kan zirsânna te hian Lalpa kan mamawh zia min theihnghilhtir thin. Pathian felna hre lova mahni felna tun din tum, Pathian felnaa intulût si lo kan tam asin. (Rom 10:3). Chutiang mite chu Thlarau Thianghlim chuan kan thiam loh min hriattir a tum a, (Joh. 16:8-11). Kan felna hian Pathian hmel a lo hliah fo thin a nih hi!

A hnuhnungber leh tawp ber ah chuan mei zawhah chuan Aw dam diai hi a lo chhuak ta.
A phaw vuak leh a boruak mai ni lo, a ropui leh thawm nâ apiang ni mai lo, thinlung chhungrila LALPA aw hriat, Lalpa a inpuan chhuah theihna tak tak nih hi a pawimawh ber chu a ni e. Englai pawha Lalpa nena inpâwl, Lalpa nena leng dûn nun chu kan mamawh tak chu a ni.
Pathian fak hla chuan-

“A aw ka hria, Chhandamtu aw,
Ka rilru-ah lawmna min pe;
Englaipawhin min veng fo thin
Lalpa fakin, a aw ka hria.” a ti.

Chhandamtu Aw hi kan hre ve tawh em le? Kan inbe ve tawh em? Kan thinlungah hmun a chang em le?

Pathianin malsawm rawh se.
Tuk chhuah nuam u le.

Leave a Reply

Your email address will not be published. Required fields are marked *

error: Content is protected !!