Thian chhan thih ngam rawlthar huaisen Lalmalsawma

-Achawia Renthlei

Kum 2019, țau thla chawlhkar khatna a ni a. Govt. Vengthar M/S Kolasib a zirlaite leh zirtirtu te pawh session thar atan sikul an lut țan a. Zirtawpni (Dt.5/4/2019) chuan chhûn chaw chhumna tur buaipuiin zirtirtu te leh zirlaite chu sikul-ah an hnatlang a, khua a țhat avangin a lum hle mai a, chawhma chhung an thawh hnuin chawhnu herah chuan sikul an bang ta a.

Kolasib Vengthar a khawsa Pu Lalthanzama fa pali zinga upa ber Lalmalsawma, Gov’t Vengthar M/S-a pawl 8 zirlai chu, sande sikul-ah chuan kumin a senior department zir țan a ni. Naupang thuawih thei tak, țawng tam lem lo, a nu leh pate Kuthnathawk a ei zawng an nih avangin inchhung chet leh sekrek khawihah pawh a nu leh paten an rin ber a ni. Hemi ni a an sikul bang pawh hmun dang a leng kawi lovin in lam panin a hawng nghal a.

David-a chetsualna tuikhuah, Kolasib Vengthar

A sikul kalpui naupang țhenkhat erawh chu khua a lum avangin Kolasib Vengthar thlanmual mawng a dîlah chuan cheng turin an liam thla hlawm a. An zinga pumraw lian ber David K. Lalthantluanga, Pu K. Lalnunmawia fapa chu dîl kotlang nalah chuan tawlh tlu palhin dîlah chuan a tla lut a. A kalpui naupang țhenkhat chuan chhan tumin bei mahse dîl hi a thûk bakah David-a hi a pumrua a lian a,  a kut-in a invai buai bawk nen an chhan thei lova, li thûk laiah chuan a pil ta a ni.

David-a dîl kal pui, Lalmalsawma nau chu ina a u Lalmalsawma ko turin a tlan hawng a. Lalmalsawma hian a nau au-ri a hriat veleh rang takin pawnah tlan chhuakin, kawng pangngai pawh zawh lovin an kawmthlang lam ațang chuan dîl lam chu tlan hlirin a pan nghal a. Dîl a zuk thlen chuan a kawr haklai phelh in dîlah chuan a lut a.

Lalmalsawma, naupang huaisen, tui tla chhan, tui tla chhan ngam, tlawmngai, huaisen lawmman dawng, Kolasib vengthar, Vengthar thlanmual
Naupang huaisen Lalmalsawma leh a chhungte

Lalmalsawma hi tui chên thiam tia sawi tur a ni lova. Heng lai dîl țhenkhatah hian a thûk lo laiah tunhma deuhin a lo chêng ve zeuh zeuh tawh țhin tih bak tui chên lamah sawi tur a nei bik lo a ni. Dîl-a a luh hian a kam thûk lo laiah a awm ring in a ke in a dap phawt a. A dap fuh loh avangin a huaisenna sawm khawmin a thûk laiah chuan a liluh zui ta nghal a. Li mawngah chuan a țhianpa, sikula a zirpui ni bawk ruang chu a zuk dap fuh ta a, a chhipah lain vau kam tui chîm chinah chuan a hnûk chhuak a. Tui tla David-a chu a pumrua a len em avangin helai bak hi chu a chhuah pui thei lova. Li thûk lama a luh loh nan a pawt bet a, hetihlai hian David-a hi a chatthla fel tawh niin a sawi a, a taksa te pawh a var vek tawh a ti. Naupang țhenkhat chu puitling ko turin a tir a. Puitling țhenkhat thleng hmasa te chuan dil kotlangah chuan an hnûk chhuak thei ta a ni.

Dil kama ruang, tui tla ruang, tui tla, tui tla hlum, tla hlum sar thi, sarthi ruang

Mitthi zawn, mithi zawn, ruang zawn, zual ko, mi zawn inchuh, mi zawn, dam lo zawn, damlo zawn
ruang zawn lai

Lalmalsawma hian a țhianpa David K. Lalthantluanga nunna chhan hman lo mah se a chêt dan hi a puitlingin a huaisenthlak hle a. Kolasib Vengthar Branch YMA chuan Lalmalsawma chet dan chu huaisen a tiin midang tana entawn tlak niin a hria a. Chhuanawm a tih avangin vawiin Dt. 7/4/2019(Pathianni) chawhnu inkhawm ban khan an inah lên chilhin fuihna leh chibai bukna te neiin, a kal zelna turah thil tih tur awm ang ang te tihsak an inhuam thu an hrilh bawk a ni.

thian chhan thih ngam, rawlthar huaisen lalmalsawma, Naupang huaisen Lalmalsawma, Kolasib Vengthar YMA, Huaisen lawmman dawng, Lalmalsawman huaisen lawmman dawng, Mizo naupang huaisen, thangthar te leh tlawmngaihna, Mizo naupang huaisenna
Naupang huaisen Lalmalsawma
Naupang huaisen Lalmalsawma – a chenna Vengthar YMA ten an chawimawi

Leave a Reply

Your email address will not be published. Required fields are marked *

error: Content is protected !!