Thi nge muhil? – Lal Ramhluna Ralte

Matthaia 9:24 “Chhuak rawh u; naupang chu a thi lo ve, a muhil a ni zawk asin,” a ti a. Tin, anni chuan amah chu an nuihsan ta mai a.”

Ringtuten thihna hi chi hnihin kan sawi a. Thenkhat chuan ‘thi’ tiin kan sawi a, thenkhat thung chuan ‘muhil’ tiin kan sawi bawk.

Bible pawhin mitthi chu ‘thi’ emaw ‘mitthi’ tih leh ‘muhil’ tiin a sawi bawk. Sawi dan chi hnih awm mahse an inkalh lo a ni tih kan hriat a tha awm e. Inhnial chiam chiam pawh a tul lo vang.

Pathian rilru leh mihring rilru a dang em a ni.
Pathian chuan,” Ka ngaihtuahte hi i ngaihtuahte a ni si lo va, i awm dante chu ka awm dan a ni hek lo,” a ti.(Isaia 55:8)
II-Petera 3:8 ah pawh, “Lalpa ngaih chuan ni khat hi kum sangkhat ang a ni a, kum sangkhat pawh ni khat ang a ni,” tih a ni a.
Mihringte thlirna leh Pathian thlirna hi a inang lo thin em a ni.

Lazara thih thuah Lal Isuan,
“Kan thian Lazara chu a muhil ta a; a muhil kai harh turin ka kal dawn a ni,” a ti a. A zirtirte khan minung muhil pangngai emaw a sawi an ti a, “Lalpa, a muthilh tawh chuan a dam leh ang chu,” an ti mai a. Isua erawh chuan a sawi chu an hre thiam lo tih a hriatin, an hriat fiah theih nan fiah takin an hnenah, “Lazara a thi a ni.”a ti ta a ni.

Mihring ngaihtuahna atang chuan mitthite chu kaih thawh rual a nih tawh loh avangin thi tih loh theih pawh a ni lo. Pathian thlirna atang thung chuan mitthite chu a kaithawh theih avangin muhil ang chauh an lo ni reng a. Muhil tia a sawi hi Pathian lam thlir dan a ni.

Hotu pakhat fanu thi pawh kha, Lal Isuan, “a thi lo ve, a muhil a ni.” a ti a. A kaitho nghal mai a ni. Isuan, “Naupang chu a thi lo ve, a muhil a ni zawk e,” tia a sawi nuihsantute khian mihring thlirna atangin an thlir vang a ni.

Chuvangin kan chungah thihna a lo thlen hian mihring ngaihtuahna atang chuan hnuleh awm lo, tawp hlen der angin hre mah ila, mihring tana tih rual loh chu Pathianin a tih theih avangin, muhil kaihthawh angin min la kai tho leh dawn a ni zawk. Chuvangin thihna avanga beidawnna thinlung pu mai lovin, Lalpan a kai tho thei a, a kai tho leh dawn a ni tih hriain beisei bovin i awm lo ang u. Thihna leh Thlan thiltihtheihna hnehtu Isua hnenah i tlu lut ang u. Krista êng atanga thihna thlirtute phur chu a zang bik thin asin.
Pathianin malsawm rawh se.
Tuk chhuah nuam u le.

Leave a Reply

Your email address will not be published. Required fields are marked *

error: Content is protected !!