Thangchhuah nana sa kah ngai – Mizoram Images

THANGCHHUAH NANA SA KAH NGAI

Ram lama thangchhuah nana sa kah ngai nia hriat te hi sawi dan a inang lo deuh a, kan chenna mual a zirin tlemin a dang hret hret pawh a ni maithei. A tlangpuiin tumpang (ramsial emaw Sele emaw) te, savawm, sakhi, sazuk, sanghal te hi thangchhuah nana kah ngei ngei ṭul a ni a, mi ṭhenkhat chuan tumpang aiah saza sawi tel zawk te pawh an awm. Tin, miin ‘thangchuang’ atan rulngan leh muvanlai te an kap bawk ṭhin a. Hetiang sa thangchhuah pain a lo kah tel chuan pialral a luhna kawngah a sazuk kah chungah chuangin sazuk ki hreuah chuan rulngan chu a inkual ruah ang a, chung lamah vanlaizawl aṭangin muvanlai chuan thlawh huala lo vengin ropui taka pialrala lut turah an ngai a ni. Heng sa kan sawi takte hi miiin a kah kim chuan ram lama thangchhuahpa a lo ni tawh ang a, khawtlangah pawh mite ngaihsan, dinhmun zahawmah ding tawhin a thih hnuah pawh pialrala lut ve tur a ni tawh a ni.

Thangchhuah nana sa kah ngei ngei ngai zingah savawm hi sahrang kah mai harsa tak a ni a. Miin savawm a kah loh avanga thangchhuah thei lo a nih chuan savawm aiah zamphu a kap ṭhin a. Chu chu savawm aihin a ai a, savawm kap anga ngaih an lo ni ṭhin a ni. Tin, in lama thangchhuahna kawngah pawh hian sekhuang leh khuangchawi hi a hautak em em a, pa tam zawkin an tlin lo a. Thangchhuah nih an duh ve si, pumpelhna kawng an siamsak a, chu chu ‘zankhuang‘ an vuah a. Sial chal ve tawk tak an talh ang a. Thil ṭul dang an tih zawh hnuah chuan Thangchhuahpa an ni ve thei a ni.

About the author

Leave a Reply

Your email address will not be published. Required fields are marked *