ṬAWNGṬAIDAMTHEI ….

(Note : He article hi a ziaktu Dr. Hrekima phalnain mizoramimages.com chuan kan chhuah chhawng a ni. Title ah ṭawngkam pakhat chu telh loh a ni)

-Dr. Hrekima

Nu pakhat thil min hrilh hi a mak ka ti khawp mai. A hrisel loh avangin damna a zawng nasa. Daktawr tam taka a beidawn hnuah ṭawngṭaidamthei pakhat an pan ve a. A mut zangthaltir a, a natna dam nan chuan a chunga a rawn bawh a ngai ta miau si a! A rawn dung bawh hnua a chet zui leh dan aṭang chuan han dawh zui zel chi niin a hre lo a, a nem tho zawk mai a! Dam chu a duh. Mahse damna tura a paltlang tur chu a dikin a hre lo a ni.

Chupa lah chuan, “Thlarau a zalen lo,” te a la tizui ta a ni awm asin! An kal laia kal ve tleirawl pakhat chu a bawh rei khawp mai a, a mawngbawr te chu a tiche vel a ni awm e! A sawi zel dan phei chuan chhul cancer te phei chu va ‘hawlh’ kher a ngai a ni awm e! Ṭawngṭaidamthei se.y tak a nih awm hi!

Daktawr tih ni ta se chu mipui kan pungkhawm ang a, an inchung kan vawm ang a, kawngte zawhin, ‘haw rawh se’ te pawh kan ti leh hial ta ve ang! Hmanah pakhat chu kan um haw tawh kha! Mahse ‘thlarau’ thil a nih chuan tuman kan sawisel tha ngam si lo! Pathian thu chhuanlama thlarau hmatheh a nih tawh chuan kan pawm thui thei fu. Sawn thianghlim leh khurbing te pawh an awm nawk ṭhin em kha? Thlarau dik chin sawi ngam khawpa huaisen hi a har fu a ni ang, kan puithiamho lah hi an ngawi ṭhuap zel mai si!

Ṭawngṭai dam theihna hi a va hlu em! Ka dam loha ka pa’n min ṭawngṭaite hian ka ngaih a tha hliah hliah a, ka dam sawng sawng ṭhin. Ka fanu dam lo mangangin, “A pa, ṭawngṭai rawh,” a tih ṭuma hnukulh ṭeuh chunga ka ṭawngṭai hnu lawka ka fanu muhil ta siai siai mai te kha aw! Mangan vawrtawpah chuan Pathian bak hi pan tur an vang khawp!

Ṭawngṭaidamthei pawh ka pawm. Pathian hian hmanrua a ngah em! Mi hman bik te, hmun hman bik te pawh a nei ngei ang. Daktawr te hrilh fiah phak rual loha Pathianin ṭawngṭaidamthei hmanga a tihdam tawhte an tam. Rin loh ngam chi a ni lo. Awih loh phal chi a ni lo. Daktawrte beidawn tawhna leh a neih zawng zawng senga damna zawnga la dam chuang lo hmeichhe thiput kha Tidamtu khan a tidam chiang em!

Damna kan duh luatah hian khaw hmu lo leka kal erawh a hlauhawm. Mi sawi apiang, mi pan apiang, mi fak apiang, a mak apiang, mahni inzuar tlawr thiam apiang pan ngawt hi a fuh loh ṭum a awm thei ang. Daktawr kan pan tur pawh hi ‘a dik em?’ tih hi chhui lawk fo a ṭha. Ṭhianpa Jacob-a khup zaitir tur rengin a zir uluk hmasa nasa em! Doctor inti zingah hian doctor lem an awm thei. Khawia zir nge, eng ang thiamna nei nge tih te hi chhui hreh lo teh ang u. Inzuar uar tak, ‘doctor’ tih hming pu pakhat hi mi pakhatin, “He pa hi, matric pawh a pass lo,” tiin min hrilh a. Tak tak ni maw?

Daktawr hna hi Medical Council-in an thiamna a pawmpui, thiam tawka an ngaih, thawk tlaka an chhinchhiah chin chauhin an thawh a thiang. Thiamna reng reng hi eng Council-in emaw, eng University-in emaw ‘a thiam e’ a tih chin hi pawm a ni ṭhin. Chutiang sawi tur mumal awm lo ‘mi thiama inchhal’ hi an hlauhawm thei. Daktawr hoin an pawm loh ‘daktawr lem’ te pawh an awm fo reng a ni. Mi mangan leh buai remchanga chuha ‘remchang’ lo zawng ve reng te pawh an awm thei mai thei asin!

Ṭawngṭaidamthei hi a ‘tehtu’ an awm ve lem hlei lo a. Council tih ang reng pawh an nei ve bawk si lo! A tehna ber tur chu ‘an tih dan, an nungchang, an rah chhuah’ aṭangin a ni mai ni awm tak a ni! Hmana ka hmelhriat pakhat chu ṭawngṭaidamtheiin, ‘khawnvartui thirfian khat ni tin in turin’ a chawh pek a. Ka phalsak lo ve tawp! Nawalh bawk tiat lek DDT ineitirte pawh ka hria!

Hman deuh khan Doctor lem an tih mai, nula saruaka thla lak sak ṭhin an sawi tawh kha maw le! Mi nu lo veh thlem mai ṭhin te pawh an awm kha. Tidamtu ‘lungte phum ching’-te pawh an sawi ṭhin kha! Hmeichhe chhul tha loa inngai ho lah hian an pan duh phian zel an ti! An lo zen ril deuh pawhin ‘chhul lam a nia’ tiin a turah kan ngai tho si a ni awm e!

Kha nu thil min hrilh aṭang khan ka’n titi zui ta mai mai a nih hi. Damna kan zawnna lam hi a dik em tih hi ngaihtuah fo a ṭha. Daktawr ṭha lo leh a lem an awm thei ang chiah hian ṭawngṭaidamthei se.. deuhte pawh an lo awm ṭhin si a!

Leave a Reply

Your email address will not be published. Required fields are marked *

error: Content is protected !!