Tawn loh chhimtlang saw – Zikpuii pa

TAWN LOH CHHIMTLANG SAW
Phuahtu – Zikpuii pa / KC Lalvunga

Kumsul lo vei a ni a thla khuareian,
Hmanah zuapa lenna chhimtlang;
Fan ka nuam a hrai riang hian.

Thlangah sappui ziahṭial kan zirna run hi,
Chawlh lai relin siang lam rawnah;
Ka lo hawng i hrai riang hi.

‘Chunnu min kaltir la chhim lei tual nuamah,
Hmanah zuapa senlai lungmawl
Ar ang a vaihna ram saw.

‘Chhim lei tual dai’ a min zaiin an ti maw?
Kei ka tan chuan tawnmang ram loh
A ni, suihlung min lentu.

“Dam takin chunnu kei zawng ka liam tang e,
Khawthir tlangpui, Baichi tual nuam;
A saw Leitlang lam rawnah.”

“Ka tiam love ka nau riangte tunah chuan,
Chung Pathian venin dam zel la,
I tawng ngei ang khuareian.”

“Ka tawng ngei ang kumsul khua a reiah chuan,
Mahse chunnu min kaltir la,
Kumtluang kha chen ka dawn sa.”

“Kumtluang kha chen thinlaiah lo dawn mah la,
Sappui ziahṭial kawl ang khuma;
Vaipui zar i zo hma chuan.”

“A ngai lo ve chunnu vaipui zarzo chu,
Ka pi leh pu sulhnu, lenrual
Hrai chawi dar ang ka tawn chuan.”

Pi pu sulhnu chhuia chhimtlang ram ṭuan chu,
Kei ka tan chuan kawrpui zarzo
Hnehin thinlai lunglawmna.

‘Ka hrai riangte i chunnu thu hi ngai la,
Lenkawl kan khum thil zawng kan hria;
I dawn lungrukte zawng nen.’

A ni tak e, chunnu i thu ang chuanin,
Ka nghak nang e khua rei chang tur;
Chhim tlangpui tual kan len nan.’

Dam takin awm rih la, Aw chhimhlei tual nuam,
Kum leh tharah suihlung lawmin
Dar ang ka la tawng nang che.

Lentu zopui, hmanah ka pu thangchhuahna,
Tawnmang iangin piallei karah,
Tawn lovin la leng rih la.

A her chhuak ang tawnna turni khuareian,
Thinlai lungkham ka lawmna leh
Ka dawn nin loh lungrukan.

Kum pui her liam thuai la, lo her chhuak leh la,
Min thlen ang che chhimtlang ram loh
Ka pi leh pu ram ṭuanna.

Leave a Reply

Your email address will not be published. Required fields are marked *

error: Content is protected !!