Tattoo leh Kristian thalaite – Biakhmingthanga Ralte

“Mitthi avangin in taksa in zai tur a ni lo va, in intiṭial tur a ni hek lo; kei hi LALPA chu ka ni,” Leviticus 19 : 28.

Tun ṭum chu Tattoo hi ka rilruah a lang ve tlat mai a, ṭhianpa Gilbert Renthlei, Lungleia miin Makedonia Chanchinbu, Oct. 28, 2012-a Tattoo chanchin a ziah ngaihnawm tak hi a tlangpuiin ka’n post teh mai ang. Rinnaa unauten in hlawkpui tur thu a nih phawt chuan tu thu ziah pawh hi ka rawn post hreh dawn lo tih min lo hriatsak dawn nia.

Sakhaw kaihhnawih : Hnam ṭhenkhat chuan sakhaw biakna kawnga “taksa inṭial” hi hmanlai aṭanga an lo chin tawh ṭhin a ni a. Sakhaw biakna nena inkungkaihna neia an taksa inṭialtir an ni. Sakhaw lam thil ni lem lo, intihmak duh ve hrim hrima banah te, taksa khawi lai laiah te emaw, milem chi hrang hranga inṭial hi an awm ve tho bawk a ni. Tattoo hi Pathian duh loh leh phal loh a ni, “Mitthi avangin in taksa in zai tur a ni lo va, in intiṭial tur a ni hek lo, kei LALPA chu ka ni,” tiin thupek a lo chhuah daih tawh a ni, (Lev. 19 : 28).

Tattoo chu engnge ni? : Tattoo awmzia chu a mawlmang thei ang bera sawi chuan mihring taksaa reh thei tawh lo tura thu emaw milem emaw ziah kai hi a ni ber awm e. Hriau emaw Tattoo ziahna hmanrua emaw hmangin mihring vun an thai ṭet a, chumiah chuan a pigment thlak turin rawng an thun tel a. A lo dam leh hnu chuan an thai ṭehna thla zul zuia rawng lo awm khan milem awmze nei a rawn siam ta ṭhin a ni.

A lo chhuahna hmasang aṭangin : Hmasang lunghriam hmangtute hun (neolethic age) aṭang daih tawhin Tattoo hi hnam hrang hrang culture-ah a lo bet tlat tawh a, a tlangpuiin “ramhuai biakna leh ramhuai chhinchhiahna” atana hman a lo ni ṭhin. Japan ram Ainu hnamte, North Africa-a Berbers hnam te, Newzealand-a Maori te, Nigeria rama Hausa hnam te, Kurdish tribal etc. te hian Tattoo hmanga hmai ziah ran hi an ching hle. Hetiang deuh bawk hian Africa, South America leh Asia chhim chhak lam ram hrang hranga cheng hnamte chuan taksaa Tattoo chhut hi hmasang aṭangin an ching hle a ni. Heng hnam hrang hrang hian Tattoo hi thlarau khawvel nena inbiak pawhna hmanruaah te, ramhuai laka inchhanhim nan te, ramhuai hnawhchhuah nan te an hmang ṭhin a ni tih hi hriat hmaih hauh loh tur a ni.

A rawn lar chhuahna : Tunlai Tattoo te hi a rawn lar chhuahna bul chu kum zabi 16-na vela Europe rama Lawngpu (Euopean Sailors)-ten Pacific Ocean-a thliarkar hrang hrang (Polynesia) te an tlawhpawh hun lai aṭanga inṭan nia hriat a ni. Polynesian thliarkara hnam mawl hovin an sakhua puithuna atana an lo hman ṭhin Tattoo hi heng Lawngpute hian la chhawngin Samoan ṭawnga “Tatau” tih chu a hming atan phuahin “Tattoo” tih hming hi vuah a ni ta a ni.

A rawn lar chhuah dan : A chunga kan sawi tak ang khian Tattoo chu a rawn lar chho ta zel a, mahni thiam ang angin thil chi hrang hrang chhut kai chu an uar zel a, eizawnna atana hmang Tattoo chhut thiam pawh an awm chho ta nawk mai. Kum 1870 chhovah indonaa sipaite leh mi tângte chhinchhiah nan te, hmangaihna leh lungngaihna te, thil pawimawh bik chhinchhiah nan te leh chhan dang tam takah Tattoo hi chhut a ni. Lâr lam a pan zela, tunah chuan Fashion (incheina) chi khat a nih tawh mai bakah intihmaksak nan te an hmang uar chho ta zel a. Music Industry-a zaithiamten an rawn hman uar aṭang phei chuan ṭhalaiteah a tla na em em mai a ni.

T.V. Show thlengin an vawrh lâr : Kum 1990 chho aṭangin Tattoo hi ṭhalaite zingah a tla na zual a, fashion chi khat anga ngaih a ni tawh. Hetih rual hian Tattoo chhut dan kawng hrang hrang hmuhchhuah chhoh belh zel a ni bawk a, Pop Culture rawn luhchilhin Television Show thlengin Tattoo hi vawrh lar a ni a. A&E channel Linked tih te, Miami Ink, L.A. Ink tih te leh artist lar Kat Von D te chu ṭhalaite chuan kan hre viau awm e.

Tattoo nei an pung zel : Tun kum 20 chhung hian ṭhalaite zingah Tattoo hian hmun pawimawh tak a luah a. Kum 2006-a Journal of the American Academy of Dermatology-in a zir chiannaah phei chuan American ṭhalai kum 18 – 29 zinga 36%, kum 30 – 40 zinga 24% leh 41 – 51 inkar zinga 15% te chuan Tattoo an nei tih hmuh chhuah a ni.

Tattoo leh hriselna : Taksaa Tattoo chhu kai tur hian vun tiṭeta, taksaa rawng zuk phum luh a ngaih avangin fimkhur loh chuan hriselna atan a pawi thei hle. A tlangpuiin Professional Tattooist te chuan hmanrua tithianghlimin vawi khat bak an hmang ngai meuh lo. Chutih laiin ṭhalai Tattoo chhu tam tak hian Professional Tattooist an pan thei kher lo va. Ṭhiante nena inchhutchawp sak leh hmanrua inhman pawlh mai mai te hi thil awm thei a ni. Hetianga Tattoo chhutna hmanrua hman fimkhur loh avangin mi tam takin Herpes te, Hepatitis te, TB te, HIV/AIDS hial pawh an lo tawrh phah thei a, an tawrh phah tawh reng a ni. Celebrity lar tak Pamela Anderson Lee pawh hman deuh khan Tattoo a chhuttirna aṭangin Hepatitis a lo kai tawh a nih kha.

Hmanraw him lo Mizo zingah : Mizo ṭhalai tam tak pawh hian thiam “inti” leh ṭhian ṭhenkhatte Tattoo chhuttir kan ching hle. Tun hma deuh phei kha chuan Compass leh hriau te kha hmanraw lar tak mai a ni a, a rawng siam nan Fabric Paints leh Siai te kha an hmang ṭhin kha a ni a, a him lo hle mai. Hetianga Tattoo chhu ti septic leh si, pân so liai luai te, ser nung insiam ta zawk etc. te an awm phah ṭeuh reng a ni.

Tattoo a reh thei em ? : Tattoo hi hun engemaw chen chu tihreh theih tawh loh thil a ni ṭhin a. Mahse tunah chuan khawvel thiamna sang chho zelah a tihreh theih dan kawng hrang hrang a awm ta. Amaherawhchu, Tattoo tihrehna senso hi a hautak em em a, a duh nazawng tana ban phak erawh a ni lo tih hi kan hriat a ṭha awm e.

Tatto chhute an inchhir : Tattoo chhuttir zinga a tam zawk hian a hnuah inchhirin tihreh an duh leh tlangpui ṭhin niin zirbing mi te chuan an hmu chhuak a ni. Tleirawl phur laia ngaihtuah chiang mang lo va Tattoo lo chhuttir ve ngawt te, rilru nat lai leh lawm over laia Tattoo lo chhut ve ngawt te, mi lar tu emaw ngaihsan over laia an taksaa an hming lo chhu kai ve ringawt te hi an inchhir tlangpui ṭhin.

Tihreh a har : Taksaa Tattoo tireh leh tur hian Laser hmanga tihreh (Q Switched Laser Therapy) emaw Intense Pulse Light Therapy emaw taksa hmun danga vun la chhuaka, bel hnan emaw te tih a ngai ṭhin a. Tattoo tireh tur hian pawisa tam tak sen a ngai a, chu achhapah a na em em mai bawk a, hnimhlum hial te hman a ni thin a ni.

Tattoo khapna : Tattoo hi a lar viau e ti lo chuan ram hrang hrangah Tattoo nei te hi an chep riau lawi a. Ram ṭhenkhatah chuan Medical lama thawk tur te, Police Officer tur te, Nurse, Doctor tur re, Hottela thawk tur te, Law Firm-a thawk tur te, Zirtirtu tur etc. atan te Tattoo nei ho hi an duh tawh lo a ni.

Mizoramah pawh an chep : Mizoramah ngei pawh Tattoo nei te hi an chep chho zel mai. Zep lo va sawi chuan Tattoo nei te hi hmuh dan leh ngaih dan deuh hi kan society hian a nei deuh a ni. Thisen pek dawn pawhin Tattoo nei leh nei lo uluk takin chhinchhiah an ni a, a nei chu thisente uluk zawka test ṭhin an ni. Nurse zir tur te, Pathian thu zir tur te leh hna ṭhenkhat atan te Tattoo neite hi hnawl an ni mek a ni.

Kridtian Ṭhalaite leh Tattoo : Kan ram Kristian Ṭhalai tam tak zingah taksaa Tattoo chhukai engemaw zat an awm a, ngaihtuah chiang mang lo va lo chhukai pawh an ni mai thei. Kan Bible hian Tattoo chhut leh chhut loh turah min zirtirna kan hmu tam lem lo bawk a, chuvang chuan ṭhalai tam takte hiain an pawisak loh phah niin a ngaih theih. Chutih rual chuan Tattoo chungchangah hian kan Bible hi a ngawi mai mai bik lo, Leviticus 19 : 28-ah chuan, “Mitthi avangin in taksa in zai tur a ni lo va, in inṭial tur a ni hek lo, Kei LALPA chu ka ni,” tiin thupek a lo chhuah daih tawh a ni.

Setana hmanrua : Tattoo hi Setana hmanraw pawimawh tak mai a ni a, Setana biakna nen hian a inzawl thuk hle bawk. Tunlaiah pawh mi sual buru pui pui leh maksak tak taka inchei duh te, mi ngaihsak hlawh duh (attention seekers) teah Tatto hi a tla na em em mai a. Chutih laiin ṭhalai fel tak tak leh sipai bang tam tak Tattoo nei kan awm ang.Hetianga Tattoo nei biai buai te hian khawtlangah ngaihhlut an hlawh lo chho zel a ni.

Isuan chhandam turin a iai lo : Isaia 59 : 1-ah chuan, “Ngai teh u, Lalpa kut chu chhandam thei lo turin tihtawiin a awm lo va,” a ti a. Eng anga sual leh bawhhlawh pawh ni ila Kristaa kan chhandamna leh rinna kawngah Isuan chhandam turin Tattoo neite hi a iai lo. “Tupawh ka hnena lo kal chu ka hnawt chhuak tawp lo vang,” a ti si a, (Joh. 6 : 37). Chuvangin Lalpa ban chu Tattoo neite chhandam thei lo turin a ban chu tihtawiin a awm lo. Tattoo nei rawngbawlna nei mek pawh tam tak an awm tho a ni. Amaherawhchu, rilru thianghlim lo pu chunga Tattoo chhu te chuan “piantharna” kawngah : thu hriatthiamna leh ṭawngṭainaah te an hnufum duh bik tlat ṭhin. Piangthar hnungtawlh zingah Tattoo chhu Lal Isua phatsan an tam zawk zel nia maw le.

A tawpna ber atan chuan tunlai thu lar tak WWJD (What Would Jesus Do?) “Isua ni se, engtinnge a tih ang?” tih hi thil kan tih dawn reng rengin kan rilruah lo lut hmasa ṭhin se, Isua duh loh tur ang hi chu ti lo ila, kan tisa leh thlarau tan pawh hian a lo him nge nge ṭhin a ni tih i hre thar leh ang u.

Leave a Reply

Your email address will not be published. Required fields are marked *

error: Content is protected !!