SUM SÊN TAM NGAI LO MI ȚHA

– Rev VL Nithanga

Lalpa chu ka chakna leh ka phaw a ni a, Ka thinlung hian amah chu a ring a, tichuan puihin ka awm a.

Mahse, Olympics Games-ah hian, kum za lai kal ta hmalamah kha chuan Minute 4 chhûnga mêl1 tlân thei tumah an awm ngai lo va. Khatih laia mithiamte pawhin minute 4 chhûnga mêl1 tlân chu mihring nih phungin a tlin lo hrim hrim tih chu an ngaihdân a ni a. Chutih lai chuan Roger Bannister-a chuan, minute 4 chhûnga mêl 1 tlân chu theih a inring tlat a, a tum bawk a. Tichuan, Olympic games hun a lo thlen leh chuan a bei ta a. Minute 4 chhûng chuan mêl 1 chu a tlân ta mai a. Khawvêlin mak a ti ta a ni. Tichuan, minute khat chhûngin mêl 1 a tlân theih tih finfiahtu an lo awm chuan, a hnu kum 10 lek chhûngin mi 336 lai munute 4 chhûnga mêl 1 tlân thei an lo awm hman der a ni. Tunah phei chuan chutiang mi chu an tam leh lutuk ringawt tawh a ni.

Reiek khaw bula Khuangchêra pûk khu, hmânah kha chuan tumah an lût ngai lo, luh tlang theih tih pawh an hre lo. Khuangchêra kha a lût tlang ta a, lukawlh râwtin a dam loh phah a, miin an hlau va, tumah an lût zui ngai lo. Mahse hun rei tak liam leh hnuah Sapnu pakhat leh a thuihruaite an lût tlang leh a. Chuta tang chuan Mizote pawh an lût tlang zui ta zêl a, tunah phei chuan a hman hman an lût tlang ta zêl a ni ta ber mai. Theih loha ngaih kha, a theih zia tilangtu an awm chuan a lo awlsam leh em em zêl si a.

Tunah hian MLA kan inthlang leh dawn hnai ta. Sum tlemtê sengin a tlin theih tih tilang chiangtu Zoram hian a mamawh hle mai. Tunah hian Election Commission-in Election senso tur a phal zat chu Candidate pakhat tan Nuai sawm hnih a ni a. Kei chuan tam ka ti lutuk. Chutih rual chuan mi hausa candidate țhenkhatte chuan nuaih sawmnga, nuaih za dawn dawn an insêng ral leh ang a. An sen ral khuh lêt leh nân an Bial chhûng development sum tûr an keih thla țhen leh ang a. Tun ang zêla kan ram hi a kal chuan Capitalism luipuiah kan pil thûk tulh tulh dâwn a ni. Thingtlâng mite chu Capitalist-hovin sumin min inlei siak zêl tawh mai dawn a ni. Thingtlâng mite chu Capitalist-ho pawisa khelhna field kan ni ringawt tawh ang.

Tunah pawh hian MLA chuh tûr chuan sum tam tak neih a ngai tih hi mipui mimir ngaihdan a ni tawh a. Mi rethei tan tih ve ngam chi a ni ta lo. Hetiang anga kan ram hi Capitalism tuipuia a pil duai duai loh nan, MLA inthlan lo awm turah hian, pawisaa inlei tlin tum hauh lo, hmangaihna nêna Bial chhûng siam tum tak tak mi, sum tlemtê senga in vawrh tling thei tûr kan mamawh hle a ni. Chutiang mi an awm phawt chuan ram pumpuiah vawrh darh ila, a hnu zêlah sum tlemtê sengin MLA a tlin theih tih miin an hriat chuan, sum sên tam a sawt tawh lo tih an lo hria ang a. Tuman sum an sêng tam duh tawh bik lo vang. Kan ram kal sualna chi khat chu tihdamin a awm leh țan thei ang. Thil reng reng a theih loh kan tih hi, a theihna tilangtu an awm chuan, a hnuah kan thei leh sup sup zêl a ni. “Lalpa chu ka chakna leh ka phaw a ni a, ka thinlung hian amah chu a ring a, tichuan puihin ka awm a,” tiha innghat tlat mi, Sum tlemtê chauh senga Lalpa puihnaa MLA invawrh tling thei kan ramin a mamawh a ni.

Ngaihtuah zui atan
* Mizoram hi Capitalism ah kan pil sâwtin i hria em ?
* Ram dam nan Ruralism chawh thawh a la țul ngei i ring ve em?

Leave a Reply

Your email address will not be published. Required fields are marked *

error: Content is protected !!