Social media-in Mizo poetry-ah nghawng a neih dan – Lalrammuana Sailo

SOCIAL MEDIA-IN MIZO POETRY-AH NGHAWNG A NEIH DAN
(Kum 2000 hnu lama Mizo poetry bik beh chhana chhuina)

-Lalrammuana Sailo

Thuhmahruai : Social media hi khawl thiamna (computer technology) hmanga inkawm khawmna, ngaihdan inhrilh tawnna, thlalak leh video te inthawn tawnna hmanrua a ni a. Sawi fiah vak ngai loin kan hre thiam mai awm e. Tun dinhmuna social mediaa kan hmelhriat lar zual te zingah Facebook, Youtube, Instagram, Twitter, Telegram, Pinterest, Snapchat te leh a dang tam tak a la awm thei ang. Mi malin emaw pawlin emaw website siama thu leh hla an dahna te pawh social media huang chhungah kan khung thei a. Facebook a rawn lar chhoh hmaa Mizo zinga social media lar tak pakhat chu misual.com a ni a. Misual.com-ah hian thlalak te, thu ziak hrang hrangte dah luh niin chhiartu leh sawi zuitu pawh a ngah ṭhin hle a. Amaherawhchu he social media lun tak ṭhin hi rei tak  chhung a thi hman a, tunah hian tihnun leh tuma thar thawh mek a ni. Hei hian a lantir pakhat chu social mediaa thil dahte hi nawh reh theih a nih ang bawkin a website chawp pawhin tihtawp theih a ni bawk.

1.A ziaktute : Heng social media hmanga hlahril dahtute hi a tlangpuiin kum lamah pawh tlema la ṭhalai deuh zawk an ni a. Mipa leh hmeichhia an tam ve ve a. Chutih rualin rual u deuh zawk zingah pawh a phusa pawl eng emaw zat an awm bawk. Tharbawihi Colney (Lalzuia Colney fanu), Lalvensangi Chawngthu, Zothanpuia (Azoa) te, Ramlawt Dinpuia, K. Rohmingliana, Zairemthanga, Puipui Mizo Ziakmi biru tih te ho pawh hian an dah  tam viau bawk.

[adToAppearHere]

Social media hi poetry lama tui miten inpawl khawmna hmun atan an hmang. A langsar zual zingah Zaikungthar bu thum chhuah phahna MIPOTY (Mizo Poetry Society) chu sawi hmaih chi a ni lo ang. Tin, Youtube lamah Rohmingthanga channel ‘Mizo tungchaw’ leh K. Rohmingliana channel ‘Valpuia Kingbawl’ te chu hlahril lam dah nasa ka hmuh theihte an ni a. Tin, social media buk pakhat instagram-a Chicks Magnet neitu Loretta Khawlhring chuan ‘Thu tawi leh ril Chicks Magnet’ tiin 2019-ah poetry bu a tichhuak a.  Hriatpuia Kion chuan “Mi tin thawnthu” tih a bu hminga hmangin 2020-ah a chhuah bawk a. Tin, sap ṭawnga tihchhuah lamah Rdp tihchhuah Secondhand Scars chu 2019-ah tihchhuah a ni a.   Tun dinhmun (3.3.2020) ah hian Poetry lam an tarlan nasatna Chicks Magnet hian zuitu sing riat sang riat chuang a nei a (88K), post liketu hi post pakhat zelah 5000 – 7000 velin a chawh rual theih ang. He page hi 2016 April ni 12 a siam ṭan a ni (Khawlhring 7). Tin, thu tawi te te, poetry huanga khung theih dah ṭhintu ‘Mizo viral’ instagram chuan zuitu sing li, sangnga leh zali chuang (45.4 K) a nei mek bawk.

2.A ziah chhuah dan : Poetry tam tak chu dan leh dun awm lo (free verse) a ziak a ni a. Tam tak phei chuan thupui pawh a nei lo a, a chhinchhiah duh tan chuan a phek number chu a chhinchhiahna tur a ni mai. Rhyme hman tlanglawn tak chu tlar tawp thluk ri inang (end rhyme) a ni a, internal rhyme a awm zeuh zeuh bawk. Entirnan Boyz of God hlaah chuan “Eng ber kha nge i tuina group? / I thil post leh like an thlir deuh thup” tiin rhyme nalh tak kan hmu a. Tin, hla tam takah chuan hawrawp pui leh hawrawp te hmanna bik a awm chuang lo a, tlar hmasa ber a nih avang emaw tlar tin bul ṭanna a nih vangin emaw hawrawp pui hman a ni chuang reng reng lo. Heng zingah hian Chicks Magnet lehkhabu te, Secondhand Scars te leh Evermore te chu a langsarte zinga mi an ni. Tin, hla ziaktu leh chhu chhuaktu tam tak hian hla tlar khatna zawhah coma-in an khar a, tlar hnihnaah semicolon an hmang a, tlar thumnaah coma an hmang leh a, tlar lina chu full stop-in an khar ṭhin. Hetiang hian hla tam tak chu chhut a ni a, semi colon hman hun miah loah pawh tlar hnihna a nih avanga semi colon hman a tam. Tunlai hla chhuak tam takah thung chuan heng thu chhinchhiahna (punctuation marks) te hian ngaih pawimawh a hlawh tehchiam lo a, ṭhenkhat hla ziakah phei chuan coma leh fullstop pawh a awm lem lo.

Tin, social media lamah hian thlalak nalh tak takah thu (caption) mawi tak tak nemkai a ni ṭhin a, an incheimawi tawn ṭhin a ni. Hetiang hian tunlai poetry tam tak chu ziakin social media a pho chhuah a ni a. A bua chhuak zingah pawh Evermore buah chuan hetiang hian thlalak leh thu hmehbel kual a ni bawk.

3.A ziah chhuahna ṭawngkam : Hla thu ni mang lo tia mi tam takin an sawi leh sel hmanga hla ziak an awm laiin thenkhat chu hla thu un tak tak hmang an awm bawk a. Entirnan, Hriatpuia hla “Hmelṭha” tihah chuan “Pianphung leh lan danah sawisel bo i ni a,/ Siamtu kutchhuak tivultu i ni” (tlar 6&7) tiin ṭawng tluang pangngaiin hla a ziak a. A tlangpuii tun hnaia chhuak hlate chu keini ang takngial pawhin zo ṭawng dictionary rawn loin kan awm thei a ni. Tin, thupui thlan a inang lo ang bawkin ziak chhuahna tawngkam atana thlan pawh a inang thei lo. A ṭhenin zo ṭawnga an ziah laiin a ṭhenin sap ṭawngin an lo ziak a. Zo ṭawnga ziak zingah pawh a kar laka saṭ ṭawng thumal zep tam tak an awm a. Tam tak chu social media ṭawngkam leh internet ṭawngkam a ni. Mangheta chinzah phuah “I sms zunzam”  tihah te chuan “Hi, good morning, morning” tihte a tel tawh a. Hei hi hranghluite hla leh tunlai hla a danglamna kawng khat a ni. Chutih rualin Mizo hla thu ṭha leh un tak taka ziak an la awm bawk.

R. Zairemthanga chuan hnam dang ṭawnga hla han phuah vel chu choak arawn chang tawn chan chang riauin a hria ni maw, heti hian tihelna hla a han chham a.

Zai hla kungah thiampûr chaw a khûai ang kâi ten,
Ruang kâwr vãr êng mingo kûngah tlang an thana,
Dawvankai-a chhiahbawi changin zai an sa e.
Huanglai lûm-a zai hla kuanah an inngaia,
Âwn-a chang tawn ak-i lunglawm an iang leh țhin.

Anpai thiam hla nau ang chawia dawi ang dilin,
Hrâng hrim mi kâwl an inchana chung ler lur hian,
Zai tam tuah dun a harsa e țha bûngdawntuai,
Pipu zai hla ser ang châmin țang a vuan si,
Ai ang châma lungril lûmtu a dang ta e.

[adToAppearHere]

Tiin Facebook lamah leh Whatsapp lamah a pho chhuak a. Whatsapp group pakhata a dah hnuah a lo chhiartu pakhat chuan zai thiam leh hla phuah thiamte deusawhna nia ngaiin insualpuiah a cho thu a sawi a.

4.Social media hi subject pakhat a tling : Sawi tawh angin social media kaihhnawiah hian hla a chhuak nual mai. Boyz of God-in Facebook hla an nei a, Kimkimi’n “Inbox” tih hla a phuah a, B. Zonunsangin ama phuah leh sak “SMS” a tichhuak a.  Mangheta chinzah phuah “I sms zunzam” tih te pawh kan nei. Naupangte nen chhamhla tih bua Joseph Lalṭanpuia hla “SMS NGE PHONE CALL” tihah chuan message han thawn te leh mi kan phone te hian mi tam takin phone kan hmang si a, kan inbiaknate hi engtin nge vanah khian an insut loh theih le” tiin mahni tawka a ngaihtuah buai ve em em thu a phuah a ni.

Social media lo chhuah hmaa Mizo hlaah te chuan lehkhathawn chu palai bawngte tiin khua hmun loa awmte leh in hmu thei lote inbiak pawhna ber a ni a. Lehkha thawn chu harsatna kara leng mi pahnihte inbiak pawhna hmanrua a ni ṭhin. Liankanglova hla “|huam ang ka do lo che” tih hla chang linaah chuan “Kei chuan ṭhuam ang ka do lo che valmawi/ Ka chun leh zua chhimtlang thli ang/ An hrang chuang e kan karah hian/ Palai bawngte tir ṭhin ang che…” a lo ti a. Tun hun, social media khawvelah erawh lehkhathawn aia rangin duh berte aw ri leh hmel kan hmu zung zung thei tawh a. Ramlawt Dinpuia pawhin a hla “165” ah chuan

“Biakpawh che tumin ka phone ka khawih reng a,
I hnen thlen tumin hawrawp ka rem chhen a,
Hnaih che tumin theihtawp ka chhuah a – ral aṭang hian!” (tlar 5-7)

tiin lehkhathawn aia phone khawvela hla phuahtute an luhna chu a lo nemnghet ve bawk a ni.

Khaikhawmna : Sap ṭawng a ngai anga hman zui hi Mizo hnam leh Mizo ṭawng tan a pawi thei em tih hi ngaihtuah ngai tak a ni. Khawvel inhman ṭawm ṭawng (universal language) tiin internet leh phone  leh thil dang dang sawi ve mai hi thil ṭha awm taka lang, hlauhawm thei tak si a ni a. Thil pakhat pawm zam hi thianghlimna hloh tawh nula/tlangval ang nihna a ni a, thil pakhat pawm zamna hian thil dang zel pawm zamna salah min hnuh luh awlsam vang a ni. Mizo hlaah chuan “Good morning” tih te hi chu awm lo se thil ṭha zawk a ni ang. Thil chhinchhiah tlak ve tak pakhat chu a bua tichhuak hlahril phuahtute zingah sap ṭawnga ziakte chuan sap hming an nei fo mai a, ṭhenkhat phei chu an hming ziahah Mizo hming tarlang tel miah lo pawh an awm.

Tin, a tir lama kan sawi tawh angin hla phuahtu tam ber chuan dan leh dun awm loin (free verse)-in hla an phuah a. Chutih rualin an hla phuahah chuan tlar tin hawrawp hmasa ber chhiar theih tura rem khawm (Acrostic) leh tlar tawp thumal ri inpawl (end rhyme) chu hman tlanglawn a ni em em a. Hei hian hla phuahtuten a awlsam zawnga hla an phuah nasatzia a tilang kan ti thei ang. Dan leh dun awm loa hla phuah hi lawm hrim hrim zawng ni ila, acrostic leh end rhyme te pawh hi awm mang lo ve tur tho niin a lang. Zalen taka hla phuah hi a ṭha a, chutih rualin hla ziarang leh phuah dan kalhmang tam tak entirnan sonnet te, ballad, epic leh a dang dangte, chhamhla ṭha ziak tura hriat atana ṭha tak tak alliteration, allusion, metaphor, repetition, simile leh adangte tuipui phak tur khawp pawhin kan hre lo niin a lang a. Miss thlannaa thlan chhuahten an mi ngaihsan ber zawhna an dawn chhang tura ngaihsan tur hre tur pawhin tu chanchin mah an hre mumal lo a, chhan loh aiah ka nu/pa an ti ang deuh hi a nih theih. Mizo zingah chuan Mafaa te, Nununa Renthlei te, F. Lalzuithanga te ho hi poetic technique hrang hrang hmang lawr pawl an ni awm e.

Chutih rualin social media hian tun dinhmunah chham hla bik huangah chuan a chhe lam aiin a ṭha lamin a let tam takin nghawng a nei lian a. Social media thu leh hlate miin an lo chhiar hian thu leh hlaa mi tui a siam chhuak a, tin a chhuahtu tan pawh intihchakna ṭha tak leh infuih phurna ṭha tak a tling a ni.Kan chhiatpuina aiin kan ṭhatpuina a tam zawkin ṭangkai taka hman zui zel pawh hi kan tum mai zel mai tur niin a lang.

LEHKHABU RAWN

Dinpuia, Ramlawt. Rawlthar Awrawl. Aizawl: Technosys Offset, 2018.

Hrahsel, Lalnunpuia. Tleirawlte nen chhamhla. Aizawl: Technosys Offset, 2013.

Khawlhring, Loretta. Thu tawi leh ril Chicks Magnet. Aizawl: Gilzom Offset. 2019.

Kion, Hriatpuia. Mi tin thawnthu. Aizawl: Gilzom Offset, 2020.

Lalzuithanga, F. Thinlung Luangliam (Wings of Poesy). Aizawl: Mizoram Publication Board. 2012.

Mizo Poetry Society. Zaikung thar  Vol 1 – 3.

Niji. Candle. Evermore. NP

[adToAppearHere]

Nunmawii, Anita Vl. Aikaih. Aizawl: TM Offset Printing. NP.

Rdp. Secondhand Scars. Aizawl: Gilzom Offset, 2019

Renthlei, Lalnunpuia, Hringnun. Aizawl: Mizoram Publication Board. 2017

Rinawmi, Debbie. Purloined Emotions. Kanpur, India. Radiant Publication. 2017.

Thanmawia, R.L. Zanlai thlifim. Aizawl: Din Din Publication. 2016.

Vanlalhumhima, Jacob. Damdiai (Poems of a teenager). Aizawl: Mizoram Publication Board, 2016.

Note: Ha paper hi Literature Club, Govt. Hrangbana College-ten One Day National Seminar on ‘Recent Trends of Mizo Literature, March ni 11, 2020-a an buatsaih ṭuma chhiar chhuah a ni.

Leave a Reply

Your email address will not be published. Required fields are marked *

error: Content is protected !!