Sermon – A hun leh hun lovah pawh hril zel rawh

A HUN LEH HUN LOVAH PAWH HRIL ZĔL

-Upa K.Zalawma

Thu chu hril rawh; a hunah te, a hun lovah te pawh bei zêl rawh; dawhthei taka zirtîr chungin an thiam loh hriattîr la, zilh la, fuih rawh. 2 Timothea 4:2
(Preach the word; be instant in season, out of season; reprove, rebuke, exhort, with all longsuffering and teaching. R.V)

Timothea hnena Tirhkoh Pawlan thu hril tura thu a pĕk hi a hrilh satliah mai a ni lo. Pathian mit hmuh leh mi nung leh mitthi ngaihtuahtu tur Krista Isua mit hmuhah chuan, a inlarna leh a ram chhâlin ṭhahnem ngai takin a hrittir a ni. Heta hriattir tih hi mawhphurhna pe/hlân tihna a ni ang.

A hun leh hun lovah pawh hril zel tur:
Tirhkoh Pawla chuan Pathian thu hi hril a ṭul ĕm avangin sawi hun leh hun lo awm chuang lovah a ngai a ni. Keini hi chuan a hun leh a hmun awmah kan ngai fo mai. Ka sermon tawi ve pawh hi Whats App group ṭhenkhatah chuan a postna hmun ni lovah ngai an awm avangin ka tilui ngam lo va, ‘Kohhran groupah chuan post loh ni se’ ti te pawh an awm a ni.

Pathian thu chuan eng hunah pawh, khawi hmunah pawh thu hril hi bei zel turin min ti a nih hi. Ziak emaw, ṭawng kain emaw, nun leh thil tih pawhin kan bei zel tur a ni ang.

)

Dawhthei taka zirtir chungin:
Lo do let te, lo hmusit te, lo ngaihsak lo te an awm ṭhin avangin Pathian thu hril chu dawhtheih leh tuar chhel a ngai a ni. A duh ve rĕngte hnena sawi leh post hi chu a nuam khawp. Duh lotu apiang kha mamawhtu an nih si avangin hrilh an ngai si a ni. Sawi mai pawh nilovin zirtir tur a ni.

Thiam loh hriattir, zilh leh fuih:
Mi, Pathian thu anga nung lote, an thiam lohzia hriat tir a, zilh leh fuih hi a har khawp mai. Pathian thu la hre lote bâkah, Kohhran mi ngei ngei te pawh hi, Kohhranin kan inkaihhruaina leh Pathianni serh leh hman dân tur chungchângah pawh Kohhran kan in kaihhruaina hi ken kawh ngam loh a awl hle. Biak in chhûng leh a compound chhûng vawn dân tur ziaka kan neih reng pawh vawng him thei lo Upa kan va tam em!

Kohhranin Doctrine kan neih te, Sacrament chungchâng te, Kristian nun dân kaihhruaina kan neihte hi Pathian thu mila siam an ni a, ringtu chuan kan zawm tura siam a ni.

Tlâwmngai Pawlte nena kan thawhhonaah pawh hian Kohhran chu a tlâwm zawkah kan ṭang ta deuh zĕl a nih hi.

)
Chuvangin Pathian thu hi hril leh sawi te, sawi tura beih te hi Rawngbawltute chuan kan tih tur a ni a, an thiam lohna hriattir te, zilh ngai zilh te, fuih ngai fuih te hi, dawhthei tak chungin kan tih tur a ni a, a hmun leh hun bik sawi lovin, chhungkua, Biak in, khawtlangah, ram rorelna leh ni tin hna thawhna hrang hrangah Pathian thu hi dah ṭha mai lovin nunpui leh hril zel tur kan ni.

Ṭawngṭaina:
Aw Lalpa, i thu hi ka awmna apianga hril a, nunpui thei tur leh, dawhthei tak chunga a mamawhtute zirtir a, zilh a, fuih ngam turin Thlarau Thianghlimin min tichak zel rawh se, Isua hmingin ka ngen a che. Amen.

Leave a Reply

Your email address will not be published. Required fields are marked *

error: Content is protected !!