Sanglianthanga hla ‘Aw Kraws’ bihchianna – Biakhmingthanga Chhangte

“Heng hi hria ila; kan mihring hlui chu a hnenah khenbehin a awm ve ta, sual pu taksa chu tih borala a awm theih nan, tun achinah sual bawia kan awm lohna turin,” Rom 6 : 6

“Kraws thu chu boral mekte tan chuan âtna a ni si a; keini chhandam mekte tan erawh chuan Pathian thiltihtheihna a ni zawk e,” 1Korinth 1 : 18.

He hla ṭha leh sak nuam tak Aw Kraws tih phuahtu Upa Sanglianthanga hi May ni 15, 1954 khan Thangchungnunga leh Chantuahthangite inkarah Tlangnuam, Aizawlah a piang a. Kum 1975 khan kum 21 a nihin a piangthar a. Kum 1989-a Sateêkah Lalhmingliana, Elbethel Speaker-in Chhandamna Camping a buatsaihah a inhmu chhuak thar leh a ni.

Nupui fanau : C.Remsangliani, Aizawl Venghnuai nula Besy Choir-a zaia rawngbawl ṭhin nen November ni 2, 1983 khan an innei a, fa pali an nei. Presbyterian Kohhran, Tlangnuam, Aizawlah Nemngheh Upa a ni a. Ama pualin Album pasarih lai siam a, vawiin thleng hian a theih ang tawkin rawngbawlnaah a la inhmang zel a ni.

Hla lo pian dan ngaihnawm : “Aw Kraw” tih hla lo pian leh phuah a nih dan Amah Upa Sanglianthanga’n heti hian a sawi : “Kum 1978 a ni a, Hauruang, Lunglei bula rawngbawlna kan neih laiin zan khat chu mihring hlui thihna leh thawhlehna hi hrilhfiahin ka awm a. Lalpan “Aw Kraws” tih hla hi mi lo pe ta a ni. Kha mi zan kha chu ka tlaivar a ni ber mai.

“He hla hi Piantharna awmzia Lalpan min hrilfiahna hla a ni a. Lal Isua chauh hi Kraws-a thia tholeh ta chu niin ka lo hre ṭhin a, ninahsela Hauruang khuaa rawngbawlna kan neih lai chuan Kraws-a khenbeh kha keimah Adama thlah mi sual, keimaha intidanglam thei lo pawh hi a lo ni reng mai a ni tih Thlarau Thianghlimin min hriattir ta a. A thihnaah chuan Baptist-a awmin, A hnenah phum ve ka lo ni tih te, ka thi ve ta a ni tih te Lalpan min hriattir ve ta mai chu A va ropui em, Lalpa chu fakin awm rawh se! Engtikah mah ka theihnghilh leh tawh ngai lo vang, Halleluiah! Chu mai pawh chu ni lovin Ama rual vekin kaihthawhin ka awm a, A thawhlehnaah chuan nun thar ka lo nei ta! LALPA chu fakin awm rawh se,” tiin Upa Sanglianthanga hian “Aw Kraws” tih hla hi Pathianin a pek dan ropui tak chu a sawi a ni.

Kraws chhuanga chawisangtu ringtu : Ring lo tute chuan kan rinna hi thil ho mai mai, âtthlak leh thil awm tak tak lo ring mai mai ni te pawhin min ngai a ni thei. Mahse, Lal Isua hmu chiangtute chuan Kraws hi an chhuanga, inngaihtlawmna nun nen khawvel mite tih ve theih loh hi anni chuan an ti thei ṭhin a ni. Chuvangin, Krista thu chu miten sawichhe ṭhin mah se, min chawisangtu a ni a, ka chhuang zel fo zawk dawn a ni tiin Lalpa hmu chiangtute chuan an lo ti tawh zawk a ni.

“Kraws thu chu boral mekte tan chuan âtna,
Chhandam fate tan Pathian thiltihtheihna;
Aw Kraws miten hmusit ṭhin mah se,
Min chawisangtu, ka chhuang zel fo vang che.”

Adama thlah ânchhedawng chu Mi Thar : Adama thlah sual kan nihna aṭanga chhandam kan lo nih theih nan Lalpan a Fapa mal neih chhun min pe a, kan tan thing ânchhedawng Krawsah thiin a tuar a ni. Lal Isua rual ngei khan khenbehin keini ngei pawh hi kan lo awm ve a. A thawhlehnaah chuan kan tho ve leh bawk a ni. Adama thlah sual kan nihna zawng zawng (Adamic nature) chu kha Krawsah ngei khan tihboral a ni tawh. Mi thar kan lo ni ta! Lalpa chu fakin awm rawh se!

“Anchhedawng thing Krista thihna chu,
Ka thihnaah Lalpan min puan sak ta;
Adama mihrinna chu hlip thlain,
Krawsah ngei chuan min tiboral ta si a.”

I tana Krista thihna chu i haider dawn em ni ? : Chutia Lal Isua thihnaa thi ve a, tholeh Lal Isua nun thar a lo nei ta chu Upa Sanglian thanga chu a lawm em em mai a. Chu tlanna hlu tak chu la hre ve lo, A thihna ṭawmpuia a thawhlehnaa kaihthawha la awm ve lote chuan; Lal Isua Kristan an tana A nun zawng zawng hlana Kraws lera a thihna leh a thawhlehna chu ṭawmpui ve se min ti em em a. Chu tlanna hlu tak chu mimal bil tan ni lovin he khawvela mi zawng zawng tan a ni asin! Krawsa thia tholeh ta kha Lal Isua chauh hi a ni lo va, “Nang” leh “Kei” leh “Khawvel” mi zawng zawng hi kan ni. Chuvang chuan he khawvela “Nun Hahchawl” nei tur leh Lal Isua Chhandamna changa, “chatuan nunna” nei turin Lal Isua thihna leh thawhlehna chu haider lo va, A thihna Krawsah ngei chuan thi ve a, A thawhlehnaah ngei chuan tho ve a “nun thar ” duhawm tak nei turin Upa Sanglianthanga hian kum 1978 daih tawh khan Hauruang khua aṭangin he hla thu hmang hian min lo sawm lawm lawm tawh a ni. I la haider zel dawn em ni?

“Krista thihnaa thi ve tawhte chuan,
Tholeh Krista nunna an chang ngei ang;
He dinhmun hi Lalpan i tan ngei chuan,
A siam che hi i haider dawn em ni?”

Tlawmna Kraws, Pathian thiltihtheihna : Lal Isua thihna Krawsa thi a, tholeh Lal Isua nun nei tawh tute chuan an thinlunga an mihring duhdan leh ngaihdan awm ve ṭhin chu, ‘Lalpan a duhdan zawkin rorel rawh se’ tiin an thinlung chu an dah ruak vek tawh zawk a. Thil eng pawh an chungah thleng se Lalpa rorelnaah chuan an lawm zel tawh zawk mai a ni. Lalpan an thinlunga ro a rel theihna tura an thinlung chu an dah ruah phal vek ṭhin avangin, amnahniah Lalpan hna a thawk thei ta ṭhin a. Anmahniah chuan Pathianin hna a thawk a, ro a rel an phalna avang chuan anmahniah chuan Pathianin hna thawkin; Pathian thiltihtheihna thinlung neitute an lo ni a. Anmahni ngei chu Pathian thiltihtheihna chu an lo ni ta a ni. Pathianin anmahnia ro a rel ṭhin avang chuan engkimah an lawm zel tawh zawk a. An mihring mihrinnain a tih theih tawh loh tlawm a ṭul hun apiangah pawh, Pathian thiltihtheihna anmahni chu an nih tlat tawh avangin an tlawm thei fo ṭhin a, nun tlawm tak leh thlamuanna neiin engkima lawm zelin

“Aw Kraws, Aw Kraws
Pathian thiltihtheihna,
Aw Kraws, Aw Kraws
Ka va ngaisang che em”

tiin hlim takin an damlai nun hi an lo hmang ṭhin a ni.

A hla thu hi a chang mal te tein a indawtin kan sawifiah nghal zel a, a hrana tarlan ṭul tawh lo vah ngai mai ang. A tawp ber hi a thunawn a ni.

Source : 1. Hla Lar 110, Vol – I  By V. L. Luaha Renthlei, Mission Vengthlang, Aizawl
2. Upa Sanglianthanga Hlate  By H. Lalduhsanga, Maduha

Leave a Reply

Your email address will not be published. Required fields are marked *

error: Content is protected !!