Sangi Inleng lemchan thlirna

SANGI INLENG LEMCHAN THLIRNA

Lalrammuana Sailo

Mizoten mi dangte ennawm tura tih lemchan kan chan hmasak ber kum 1912 December ni 26 te ngaihtuah chuan Mizo tawnga lemchan bu tihchhuah hmasak ber kan neih inkar (1912 – 1962)-ah kum 50 chuang lai mai a tla a. Kan lemchan a bu a tihchhuah hmasak ber Sangi Inleng leh Liandovate Unau tih lemchan Lalthangfala Sailo-in kum 1962-a a tihchhuah hi Mizo lemchan a bua chhuah hmasa ber a ni a, chu  pawh chu mamawhna avanga ziah a ni. Chutih rualin he lemchan hi Mizo lemchanah chuan tun thlengin a chhuanawm berte zing a mi a la ni ta reng a. A ziaktu thiamna a fakawm rualin lemchan thawnthu lama kan la pachhiatzia entirtu pawh a ni thei.

Sangi Inleng hi a ziaktupain thuhmahruai lama a sawi ang hian tragedya tawp tura duan, mi tu emaw ngenna avanga Comedy-a tawp ta a ni a. He lemchan ziaktu hian a changtute a din danah leh an inbiakna ṭawngkamah zirtir nei rana han ṭawngtir leh han thununna langsar tak a awm meuh lo a, awm lo tawp erawh chu a ni lo. Mizo zinga thuziaktu tam tak chuan mihring nuna nun dan tha inzirtirna lam leh inkaihhruaina lam  hawi zawnga changtute an ṭawnga an chettir ṭhin laiin Sangi Inleng-a a changtute hi chuan chung thil chu an rawn tlansan ta a ni.

Lalthangfala Sailo lemchan hian mizo lemchan ziaktu dangte aia that bikna riau a nei thin a. Chu chu Chan khatna Lan khatna awmze nei a din ṭhin hi a ni. Greek ho lemchanah te, English ho lemchante kan thlir chuan chan khatna lan khatna hian a thawnthu awm dan tur, a hawi lam thui takin a tilang thin a, chu chuan thawnthua thil lo thleng leh thei te leh tragedy nge comedy tur tih thlengin min hriattir thei a ni.

Lalthangafala Lemchan thawnthu kan en chuan chan khatna lan khatna that thinzia kan hmu ang. Sangi Inleng, Liandovate Unau leh Sual man chu thihna tih lemchanahte hian a ziaktuin lemchan sawi hawn a thiamzia a lo lang a ni. Sual man chu thihna tih lemchan thawnthuah hian chan khatna lan khatnaah Rothangliana, mi hausa tawntaw  leh misual pahnih an lo lang a. Rothanglianan Hrilmawii a ngaizawng a, Hrilmawii chuan Rothangliana aiin Lalramliana a duh zawk si a. Chutiang a nih avang chuan Lalnghakliana remruatna angin Hrilmawii chu rukbo mai an tum tih kan hmu a.

Liandova te Unau lemchanah chan khatna lan khatnaah Liandova te chhung rethei tak chu pa berin a boralsan dawn a, chutiang boruakah chuan Liandovan a pa thi tur a biakna tawngkamte chuan Liandova nu chu fate hmeithaipui turin rin ngam a nih lohzia a tarlang tha em em a. Chuta Liandovan a pa a biakna chu, “Ka nu hovin rei tak kan awm thei dawn em ni? Ka nun rei tak min awmpui peih dawn em ni?” Hei mai a la ni lo, hmeithai pitar Pi Fangi ṭah hlate leh Tuaisiala ṭawng a buang maite hlei hlei hian Liandovate unau hmabak thimzia a tarlang tha hle a ni.

Sangi Inleng pawh hi khing kan sawi tak lemchan pahnih tluk deuh thawa chan khatna lan khatna awmze nei a ni. Kanghmun khuaah zanah Ngura te nupa an lo lang a, an fanu tan Inleng / Hranga palai Kunga leh Bela kan hmu zui a. Thangi chuan khaw dang hawi thei lek loin chung inleng palaite chu a lawm a. Ṭha takin ngaih ṭhat thlak takin la inbe ṭha leh turin inlengte chu an thlah a. Mahse Sangi chuan Hranga neih a tum lo va, Hranga lo leng pawh kawm duh loin a mutsan a ni. He lana palaite lo lang hian Sangi tan leh thawnthu tan harsatna a rawn siam a. Thil thleng thei leh thil lo la thleng tur min suangtuah thiamtir a. Chu chuan chhiartute hnenah a thawnthu ngaihvenna min siam a. Rilru seng lo thei loin min siam a, a lehpek a nghahhlelhawm ta hle a ni.

Ramthanga te chhung lemchan K. Saibela ziak kan chhiar chuan Lan hmasa ber lan khatnaah chuan Cashier leh Ramthang leh Vala te kan hmu a. Cashier chuan Ramthanga chu thla hlawh cheng 450 a pe a. Chute mai chu chu he lanah hian kan hmu a. Ramthanga leh Cashier hi vawi khat ve ve an ṭawng a. Vala phei chu  a tawng ve lo. Ramthanga pawh hian a “A kim e, ka  lawm e,” tih bak thil dang sawi a nei lo. He thu ka han sawi duahna chhan chu  lemchan ziaktu tam tak talent nei tha tak takten lemchan kan ar khaw thim dai thin vang a ni. William H. Hudson chuan An introduction to the study of literature tih lehkhabu a ziahah chuan, “We have, to begin with, some Initial Incident of Incidents in which the conflict originates” “The purpose of the introduction or exposition is to put the spectator in possession of all such information as is necessary for the proper understanding of the play he is about to witness” a ti a. Lemchan lo thlirtu chuan eng lam hawi nge an thlir a, tu chanchin nge an thlir tih rang taka a hriat loh chu, eng buaina nge lo la thleng thei tih lamin a lo hre thei ang a. Chu chuan nasa takin a thawnthuah a hruai lut thei ang.

Chutih rual chuan literatureah chuan dan tak tak zam theih a ni lo tih erawh kan hre theuh ang a, tihdan phung tlangpui a zawm chuan huang khatah kan khung leh mai thin. Chan khatna lan khatna pawimawhna pawh hi kan han sawi chiam a, Shakespeare-a lemchan Macbeth te pawh hi kan en chuan lan khatnaah chuan dawithiam pitar hoin Macbeth hmuh an tum thu kan hmu a, a rapthlak viau a, chhui zui deuh loh chuan a tangkaina mai hmuh thiam a harsa ve tho, mahse heng mite hian Macbetha nun an thlak danglam dan kan chhui zui chuan chan awmze nei tak niin kan sawi leh thei ang. Miin thil eng pawh lo ziak se la, a chhiartuin ngaihnawm a tih phawt chuan a hlutna chu sawi bo theih a ni tawh lo.

Sangi Inleng – Tragedy nge Comedy

Lemchana Tragedy kan tih hi mawlmang taka sawi chuan lungngaihna a tawp chi lemchan hi a ni. Literature a huang dang ang bawkin Tragedy hi Greek ho chinchhuah a ni a. Aristotle-a chuan “Tragedy chu nunchan entirna lemchan tluantling khunkhan tak a ni a. A thu kalhmang chu tawngkam mawi taka remkhawm mahse chham lova chan theih si, lainatna leh hlauhna chawk thova, thintawt ut ut tiveng hawk thei bawk si lemchan hmuhnawm hi a ni” a ti. A tir lamah chuan Tragedy-a a changtute atan hian mi langsar Lalte, Lalnute leh an thlahte emaw, mi hausa leh mi challang tak takte chauh hman thin a ni a. Mi rethei leh hnuaihnung zawkte hian vanduaina leh harsatna tam tak tawk vein mi khawngaih pawh hlawh ve bawk thin mah se la mi ropui leh an thlahte tlakchhiatna hian mite nunah nghawng a neih  nasat zawk avangin leh a thlirtute rilru a hneh hma zawk avangin Tragedy-a a changtute atan hian mi challang takte chauh an hmang thin a. Amaherawhchu hun a lo  inher danglam zel a,tun hnuah hi chuan mi hnuaihnung zawkten changtu ber dinhmun an luahna tragedy te pawh kan nei ta zel a ni.

Tragedy chuan mihring nuna a thim lam, a manganthlak lampang hi min hmuhpui thin a. A khawih ber lainatna leh hlauhnate chawk tho zet hnua mi tihhlim leh hi a ni. Engtin nge tragedy chuan hlimna min pe kan tih theih? A chhan chu mihring nun leh a harsatna tawh thinte hriat thiamna leh pawm thiamna min pe a. Mi lian leh hausa pui puite pawh an tla chhe ve thei a ni tih min hriattir rualin mi retheite tan beiseina a siam tel a. Nasa taka ngaihtuahna kan lo sen ve avangin mihring nun kan thlir thiam phah a, chu chuan a tawpah hlimna min siam a ni.

Sangi Inleng lemchan ziaktu Lalthangfal’n Thuhmahruaia a ziah hi en ila, he lemchan kal dan chu a chiang nghal thei mai. “A tira ka tum dan chuan, a thawnthu hi, lungngaih thlak taka tawptir tum ka ni a; mahse ka thianpa Lalzarliana’n “I drama ziak hmasa ber a ni a. Khawngaih takin tragedy chuan titawp lul suh,” ti meuhvin mi ngen avangin, lungngaih thlak taka tawp tir lovin, hlim taka tawp turin her rem hram ka’n tum a, rem leh rem lovin, thu hlimin ka tawptir ta a ni.”  Tichuan he lemchan hi tragedy ruangama duan, mi dangte hmaizahna avanga comedy tawp dan anga tawptir a ni kan ti thei.

He lemchan hi ngun taka kan thlir chuan Romantic tragedy tur ni zawk awm tak a ni a. Thawnthua a changtute thlan danahte, thil thlenna hmun (a setting te) leh inbiakna tawngkam te, changtute nun leh a lemchanin hun a hman chhungte ngaihtuah hian romantic tragedy tur a ni a. Mahse sawi tak angin Sangi, thi tura duan vek tawh chu Lalzarliana kaltlangin Lalthangfala hian a chhan chhuak ta a ni.

He lemchanah hian Muana leh Sangi te hi inngaizawng mah se Chan VII na lan IIIna tih lohah hi chuan Muana leh Sangi te hi vawi khat mah hmai chhana an inbiakna kan hmu lo a, an inbiakna kan hmuh chhun chu an lehkhathawn atangin a ni. Chumi avangte pawh chu a ni ang e, Muana leh Sangite inngaihzawnna hi kan tuipui ve hman lo a. An inkara harsatna lo thlengte pawh hi kan khawngaih nep deuh niin a hriat bawk. Thawnthuah a ni emaw lemchan huang chhungah a ni emaw hetiang taka a changtute inhmu har leh inhmu tam lo hmuh tur avang hle awm e. Lianchhiari’n “Kan va tih luatah lengin ka zir sual e, Ka pa vanhnuai thang tur, a than ni bang kir e” a tih ang deuh hian tragedy nihtir a tum luatah a thawnthu hi a tihmelhem zawk ni pawhin kan sawi thei ang.

He lemchanah hian thil tisualtuten an thil tih sual phu tawka an tuarna emaw inchhirna Dramatic Justice/ Poetic justice a awm leh si lo a. Sum ngainat vanga khaw hmu lo, mahni fate nun pawh mualpho taka siamtu Thangi hi a sualna phu tawk lungngaihna leh inchhirna a tawk lo.

Tin he lemchanah hian a changtupa emaw changtunu ber (Hero or Heroine) tia han chhal ngam mihring an awm lo hi a ni. Muana hi engti kawng mahin changtupa nihna dinhmun han pek ngam tur chi a ni lo a, a chezia leh tawngkam chhuak hi Hero tia han chhal tur a ni lo tluan chhuak zak a. A hmangaih ber Sangi mi dangin chhuhsaka palai an tirh pawhin inthiarfihlimsan mai a duh a; Mawii hnen aṭangte pawhin Sangin a hmangaihzia a hria a. Chuti chung chuan Sangi chu tlanbosan tumin a pute khaw lamah a kal a. Muana nun hrim hrim kan thlir hian Hero-tena an neih ang mi bik nihna (quality) hi a nei ve lo. A tawpa Sangi sakei puk atanga chhanchhuaktu anga a lang pawh hi ngun deuh zawka ngaihtuah chuan sakei hian Sangi hi a beih mai loh vang zawk niin a lang a. Sangi hi Muana hian chhanchhuak lo pawh ni se mi dang hian an chhan hman tho a rinawm. Sangi hi Muana aia huaisen zawk leh a hmangaih a neih theih nana bei nasa zawk ni mah se Heroine han tih tur em chu a ni si lo. Hranga nena an inneihna tur lak atanga tlanchhiat a tum danah, Sakei inseh hlumtir a tum dan hi a huaisen viau a tih theih rualin a chak tawh lohna lantirtuah pawh a sawi theih.

Misual (Villain) : Thangi nunchang kan sawi tawh a, buaina bul ber a ni. Hranga hi palai tirtu ni mah se la misual han tih tur chi a ni em? Sangi mitmei hmuh ve deuh vanga palai tir ve chawt mai a ni zawk lo maw? Chan khatna lan khatna a Thangin Hranga palaite, Kunga leh Bela hnena Hranga leh Sangite inkawm dan a sawiah chuan “Nizan pawh khan Hranga nen chuan an inkawm a, ka zai e te an ti a, an hlim teh asin, lehkha ka zialtir e, te an inti a. Hranga pui hi a zaidam bawk a, a lo leng hruah hruah thin tak asin maw le” a ti a. Muana pawh hian Sangi hi rin ngam har a ti ve deuh a niang. “Mi mitmei hmu lovin mipain chuti ringawtin mi kan kawm ngam hleinem. Hranga chuan a nghing a hmu a ni mai a lawm” a ti a. Heng thilte ngaihtuah hian Hranga hian palai tirh ngam chhan hi a nei ni awm takin a ngaih ve theih!

A reng reng thuah Kanghmun khawtlang pawh hi an che ho ve reng reng a. Sakei hliam a awm a, chu sakei huai chuan an ran vulhte a khawihsak an hlau a. Hmeichhe ho pawh tui chawi takngial pawn an kal ngam lo a ni a. Chuvangin sakei chu an um a, pukah a lut a, khawkhat ve meuh, silai pawh an nei tawh a, mahse luh chhuah ngam pasaltha an awm lo a, a la hriat thiam theih viau. Amaherawh chu hriatthiam harsa zawk chu  he sakei hliam an luh chhuah ngam loh hi chang zui loin an hawsan vek mai a. Hei hi chu he thawnthu ti awihawm lohtu pakhat a ni. Chutih rualin Hliri erawh Sangi felzia tilang tura duan a ni a, a nihna pawh a hai lo hle, a tum hmunah tak a lo tum chat chat thin a, lemchan ziaktu themthiamna lantirtu a ni.

Leave a Reply

Your email address will not be published. Required fields are marked *

error: Content is protected !!