Sakei ngho seh lemchan sawizauna

SAKEI NGHO SEH LEMCHAN SAWIZAUNA

Lalrammuana Sailo

Lemchan  ṭhatna :

1.Plot a ngaihnawm thawkhat : Literary works reng renga tehna pawimawh tak pakhat ni reng tur chu a ngaihnawm em tih hi a ni. Sakei ngho seh pawh hi thawnthu ngaihnawm tak a ni a. Chumi avang chuan chhiartute hriatreng pawh a hlawh hle a ni.

2.Pawi hoin Thanhawla an man thu hre mah ila a tan dan vel a lang lo a. A tan dan leh a tlanchhuah dan chanchin chu Thanhawlan min hrilh hre leh mai a. Hei hi a ṭha hle. Lemchan sei lutuk tur a titawi a. A hmang fuh hle a ni.

3.Lemchan chu a chana chan tur a nih angin a thawnthu pawh chantuala chan mai theih tur a mamawh a. Chumi kawngah chuan ‘Sakei ngho seh’ hian harsatna a tawk lem lo. Chan 3na lan 3na-a in kang lo lang pawh hi siam rem a, hel mai theih a ni tho.

4.Inbiakna tawngkam hman danah a tiṭha hle. A hunlai a mite ṭawngkam hman awm a hmang thiam. Vanhnuailiana’n thu pehhel tul deuh a sawi dawn a , “Thil awmzia chu i a ni” a han tiphawt te hi a thiam hle mai.

5.A hun lai khawtlang nun a tar lang ṭha. Lal leh upate hoin thubuai an rem dante, mahni maia thu titlu ṭhin an nih loh dante a tar lang a. Tin, sal chungchangah pawh kan pi pute kha an intiduhdah lem lo bawk tih a hriat theih. Thanhawla paw’n Thantlanga a awmna nula a ngai thei hial a ni.

6.Technique hman fuh chang a nei ve. Hun remchem kawngah Thanhawlan a tanna chanchin a sawi let finthlakzia kan sawi tawh a. Tin Drama-a  a changtute phunrukna (aside) kan tih ang hi chan 1na lan 2naah Zairemi rilru puanchhuah nan a hmang fuh hle bawk.

Lemchan  ṭhat tawk lohna :

1.Chan 1na hian phek 67 zet a awh a. Chu chu mi tam takin ideal length of drama-a an ngaih phek 80 han hnaih thuak a ni. Hei hian he lemchan ziaktuin lemchan kalphung a hriat tawk lohzia a tarlang chiang hle. Chan khatna lan khatna hian pawimawhna a nei lem lo. Chan khatna hrim hrim hian mizo khawtlang nun a tarlang  tih loh chu a lemchan a tana han ṭangkaina a nei tam lo. Thil chuangtlai leh lemchan tiseitu mai a ni.

2.Drama ziah dan kalhmang hrim hrim hi a hrechiang lo hlein a hriat a. Chan leh lan ṭhen a ngaih miah lohna hmuna ṭhen a nei ṭhin. Chan 2na lan 3na, lan 4na leh lan 5na te hi hmun khat (lal inchhung) a innghat niin hun inzawm reng a ni a. Lan hrana ṭhen ṭulna a awm lo.

Tin, lan khatnaa tlangval ho inbuan laia a changtute a rem dan hian a phek a tichhah a, mi thusawi inang reng chu a hrang diat diatin a sawi tir kher zel. Tin kut beng rite, chang tum ri (phek, phak , phuk, phuk, phuk )te nen lama a han ziak tel zel te hi chu a ti lutuk ve deuh a ni. Chan 3na lan 3naah inkang lai a lang a, hei phei hi chu a chana chan chi ni pawhin a lang lo.

3.He lemchana mizo khawtlang nun lan dan  hi a ngaimawhawm hle. Mizo lal leh upa, khawtlanga roreltute an lang mawl lutuk a. Thubuai rem kawngah pawh an hniam hle. Tlangvalte hi an lang hur lutuk a. An ti ti duhzawng ber chu zahmawh a ni a. Lalnghenga’n  Zairemi a theih thu a sawi lai pawhin tlangval ho chuan “A hlim! A ti ! Fawii! a nuam!” an lo ti a nih kha. Tin Lal leh upaten Zairemi te thubuai an ngaihtuah laia tlangval ho lo au bengchhengte hian lal leh upate zahawmna a tilang hniam hle. Dengin hmeichhe mangang au ri a hria a, aw lo chhuahna lam pawh chiang takin a hria a, mah se a mipa kalpui Rothanga, Pachhunga leh Thanhrangate ho chuan an ngaihsak zui lo.

4.Ṭawngkam zahmawh a tam lutuk hi he lemchan hlutna tichhetu pakhat a ni bawk. Tlangval hoin zahmawh an lawmzia kan sawi tawh a. Lalbelate, Keikawla te hoin Zairemi serh awmdan en sak an duh tlatte pawh hi thubuai rem tumna aiin hmeichhe zahmawh hmuh chakna vang a ang zawk. Chawngbawnga hmanga “Hmeichhe mawng leh chappui mawngah dep lovin pa rei tak a awm theih loh” tih thu a han sawi te hi chu a ngial a ngan hle mai. Tin Sakei huaiin a beihte a ei dan hi a mak hle. Sepui a seh a, a beng khinghnih, a hmui leh a serh a ei a. Lalnghenga a seh pawhin a serh bawr a ei leh a ni.

5.He lemchanah hian ṭah leh hla phuah hi an awlsam em em mai a. Hei hian a lemchan hi a ti lem ṭhin. Chan 1na lan 7naah pawh Zairemi chu Hawla te inah a va kal a, Hawla ngaiin ava ṭap a. Chan 3na lan 1naah Hawla a lo haw tih a hriatin Zairemi  chu Hawlate inah a lo kal a, Hawla chu a vuan a,a ṭap a. lan 4naah Vanhnuailiana, khawkhata lal ber meuh pate ngaia lunglengin a ṭap a. Hetianga lunglenga an awm pah hian hla sei tawk mawi leh nalh tak tak an phuah thei reng bawk a. Thanhawla phei chuan awlsam tein tlar 3 hla, chang sawm a phuah mai.

6.Zairemi, khawkhat nula fel ber ang hiala langin ṭhian mumal a nei lo hi a mak hle.. Thanhawla hmu tur pawhin Thanhawla ṭhianpa Rothanga a pan tawp a nih kha. Ṭhian chu nei se a ṭhiante a hmang ngeiin a rinawm.

Tin Zairemi lan dan hi a chang chuan a awm ang lo mah mah ṭhin a ni. Thanhawla te ina lenga a ṭah thu kan sawi tawh a. Thanhawla rulin a chukin ṭumin Zairemi chuan Thanhawla chu a chhaih fiam reng a, tin a nuin inhmuh falna hun a siam sak bawk. Thanhawla hliam tuar pawh hi Zairemi hnute khawih thei khawpin a harh ṭha a. Mahse tlangvalin an zawn haw leh tho si. Zawn ngai nih hi tlangvalte tlawm lakna ber a ni ṭhin.

7.Thanhawla dah chungnun a tum lutukna lamah kan mizo chanchina mi hmingṭha Vanhnuailiante, Thawmvunga te ho hi a dah hniam phah. Thawmvunga te hi a dah mawl em em a, Zairemi serh ringawt an buaipui a nih kha.

8.A changtuten hamṭhatna an tawh theihna tura midang, misual ni miah lo, thil tihsual nei miah lote hmanruaa hmanga tawrh tir an ni ṭhin hi thil ṭha lo tak a ni, He lemchanah pawh hian Thanhawlan Zairemi a neih theihna turin Thangtinkhuma, Hrangkima fapa chu savawm a seh tir ringawt a. Miin vanneihna an chan theihna tura misual ni miah loten hrem an tuar ṭhin hi khuarel dan kalh thil ṭha lo tak a ni.

 

 

Leave a Reply

Your email address will not be published. Required fields are marked *

error: Content is protected !!