Ropuiliani mizia zirchianna

Ropuiliani mizia (character) zirchianna

Lalrammuana Sailo

Lehkhabu hming – Lalnu Ropuiliani
Lehkhabu ziaktu – Laltluangliana Khiangte
Genre – Drama

Aizawl lal, Lasavunga fanu Ropuiliani hian pasal a tan Chhim lal fapa Vandula a nei a. Chhim lama tlang hrang hrang an chuan hnuah a hun tawp lam chu Denglung khuaah an hmang a. Ropuiliani hi a pasal Vandula thih hnuah kum li vel chauh a lal hman a. Mahse a pasal thurochhiah vang leh ram a hmangaihna vangin thih thlenga British doin hnam tan a martar a ni.

Ropuiliani hi Aizawla Sailo lal ropui tak Lalsavunga fanu a nih avangin amah pawh a induh ngalh mai a. Chhim lam lalten vailian an hlauh em em lai pawha a pasal fuih huaisentu leh kawng tinrenga ṭawiawmtu a ni. A pasal thih hnu pawhin vailian do a bang duh lo a, chumi avang chuan British sorkarin an man a. A thih thlengin Rangamati Jailah a tang a ni.

Ropuiliani huaisenzia leh paukhauhzia hi Bawrhsapte pawn an hmu chiang hle a. Hmeichhia a nih vang ngawta zuam chi a nih loh zia an hria a. Kumpinu sorkar hnuaia Mizo lalte an intukluh hnu pawhin Ropuiliani chu a inpe ve duh lo a. Mahse sorkarin a phiar ru a, a lal ṭhutthleng a hum zo lo a, a rilru erawh a tlawm ngai lo.

Laltheri leh Ropuilianite mizia hi a inang lo hle a. Laltheri chuan hnamchawm tlangval ni mah se a hmangaih miau avangin Chalthanga chu a kawp a. Hnamchawm hmuhsitna leh en hranna a nei lo. A u Ropuiliani’n Laltheri leh Chalthanga inngaih thu a lo hriatin, “Laltheri em em tak hi chu aw! Ngaih chu sawi loh hnamchawmte chu biak pawh biak lek loh tur. Lal chhungkaw hming tihliautu chuan tuar tawh se. Lal chhungkua chu lal chhungkua kan ni. Tumahin an nihna hai suh se” a han ti a. Chalthanga’n Laltheri a ngai hi Laltheri chhungten ngaithiam loin Chalthanga chu an thah sak a. Laltheri chuan Chalthanga sun nan saruak leh ngheiin a awm a. A nawrhna leh huaisenna chuan Sailo lal rilru sak leh induh tak mai chu a ti nem ta a ni.

Ropuiliani ve thung hi chu inti sailo nu nghut mai a ni a. Ani chuan inneihnate pawh hmangaihna vang lam aimahin nihna vang lam a thlir a. ‘A hmangaih em?’ tih aiin sailo (lal chhungkaw) thlah a ni em? tih chu a ngaipawimawh a. Rin thu han zep I la, Vandula kher lo pawhin Ropuiliani hi rawn be ta se, Sailo tlangval a nih phawt chuan a  rem maiin a rinawm.

He lemchana Ropuiliani mize duhawm lo tak kan hmuh chu  hnamchawm hmusit tak anga a lang hi a ni. Chung chu he lemchana a ṭawngkam aṭanga a mize lo lang a ni. “Sailo lal nula zu sem ka hre ngai lo. Laltheri pawn a sempui hek lo vang. Hnamchawm zingah ka khawsa thei nang. Lal fapa leh mi ṭhate tih hleih loh, hnamchawm tlangval kaihkuahin ka chai thei lo, an zingah ka lam dawn lo.

“Lal chhungkaw zahawmna leh dinhmun kengkawh zo lo ka nih dawn ai chuan engkim chan ka huam. Lal fapa, Sailo kungpui aṭanga zichhuak chu ni lo se, Vandula pawh hian ka hmel hlim a hmu ngai lo vang. Thlahtu bul chena chhuichet dawl tak, chhuan tam takte bulpui ni tlakin ka ring a, chhawmdawl ka hnial lo mai chauh a ni” Chan 1na lan 4na. He lemchanah hian Ropuiliani hi a character a khawng lutuk a, a ngaihzawnawm loh a. A chhiartuten Ropuiliani tawrhna hi kan ṭawmpui hman lo.

VANDULA THUROCHHIAH  : “Saplala thuhnuaia kun tur kan ni lo va, ka ram chhungah inrawlhna tur reng an nei lo. Zan mitchhin pawh lo tawk ta tehreng ila, an Vailian pawh hi hlau reng reng suh u. An thuhnuaia kun turin chhia pawh chham miah tur a ni lo…. A tawp berah I pa duhzawng pawh a ni a, keia ngaih dan pawh a ni bawk. He ram hi kan ram a ni a, midang pek a thiang lo. Vailianho duh duha thaikawi theih kan ni lo. Lal kan ni a, lal dinhmuna din tur a ni. Hmeichhe awmnem zawk I nih avangin zam suh la, chakna chu thinlungah a awm. Fim takin thil ngaihtuah la, hruaitu ṭha tak I ni mai ang.. Kan ram aṭang hian mi dang chu kan khalh chhuak zawk tur a ni. Pi leh pu aṭanga thurochhiah ngai pawimawh mite hi an hmuingil ngai e” Chan 4na lan 1na

ROPUILIANI’N VAI LIAN A DO  ­: Hneh dawn lo mahse a ngaihdanah chuan  “Do pawh do lo a ral laka han tlawm nghal ngawt mai chu, sailo lal tihah a mawi lo” a ni. Chan 3na lan 4na

A upate a fuihnate hi a pui hle mai. “Khawhar sawi ma ta che u. Rorel tura lo chhuah khawm ṭhin zawk tur alawm. Mual liam hnu kohkir tum chu awrawl a kham thlawn mai a ni. Vai tirhkoh akara hnamchawm lehnghalin thu ṭha ka sawi e, an rawn ti chhen hi ka be peih lo viau a ni (Dara leh Satinkhara a sawina) … Vai lian pawh ni  sawm sarih rawh se, an thuhnuaiah vawi khat te pawh ka intulut dawn lo. A ram leilung luahtu kan ni.” Chan 4na lan 2na.

Vailian chuan manin Lunglei panin an zawn chhuak a. A zawntute chu a inher tir a. A hmangaih a ram chu a thlir a, a lungchhia a. “Ka rei maw! Fate u, chhantu nei lovin maw in awm dawn?” a ti hial a. Chan 5na lan 2na

Satinkharan sawrkar thupek anga chhiah an chawi a ngaih thu a hrilh chuan Ropuiliani chuan “Heti ang thupek siamtu chuan min rawn hmu rawh se. Kan tu leh fate tlang danga lal zawng zawng chungah pawh he thil hi kenkawh ka remti lo… Kan pi leh pute hun ata he ramah hian lal kan ni a.Tu hnenah mah chiah kan la chawi ngai lo, buhchhun eiin sachhiah te kan dawng zawk ṭhin.Mi puakphur turin ka khua leh  tuite ka thehchhuak thei lo. Ka tan chuan an thahrui sen miten an hreh ngai lo va, lal in sain an hnatlanga a, kawng tinrengah lal an ṭanpui ṭhin.Vai puak phurh nan ka khuaten tha an seng lo vang.. A tul hunah chuan mahni ram  chhanin thih ngam lu kan pu tur a ni ngai e… Lal ṭhutthleng ka luah chhung chuan leh ka dam chhung chuan ngaihṭhain an awm bik bawk hek lo vang. Vai lian dodal hi dam chhan asin!” “But a man is not made for defeat. A man can be destroyed but not defeated.”

A fapa Lalṭhuama hnenah heti hian a thih dawnin thuro a chhiah a. “Tharumin min hneh mah se, kan rilru chu an hneh chuang lo, tih hi lantir ka duh. Sum leh ropuina aiin ka ram zalenna ka thlir zawk. Kan ram min chhuhsaktute hian ngaihdam min rawn dil hma chu in vai chaw hi ka ei tawh lo vang… He taksa hian a pianna ram a chhan a, a chhanchhuak zo lo  a nih pawhin a thlawm chuang lo, tih hria ang che… I pa sira mu tur ka ni a, I pa thurochhiah kenkawh avanga hetia awm ta hi ka ni a, nang pawhin I nu thurochhiah chu I puitlin tur a ni”.  Chan 5na lan 4na.

MIDANGIN ROPUILIANI AN SAWINA :

“Kum 70 lai a ni tawh. Mahse sailo lal dang aiin a huai zawk emaw tih tur a ni. A hmel pawh a zam angai lo” (Dara Chan 4na lan 3na) “Kumpinu sawrkar thuchhuak kalh zawnga che ngam awmchhun a ni. Tharuma kan vau beh ngawt loh chuan helna a chawk chhuak mai ang…Ropuiliani hi a hla thei ang bera kan thawn bo loh chuan, helna chu kan hmetmit  thei lo vang. Lung in chhungah pawh awm se, a la dam a ni tih an hriat ringawt pawhin an rilru a la lawm ang a, a mantute min hua ang a, helna a chhuak leh thuai ang… A hmel an hmuh ringawt pawhin vailian an huatna hi a kaitho leh ang. Hmeichhia a ni a, pitar a ni bawk a;mahse, pasalṭha huaisen leh mi tumruh  ber  a ni. Kan thawnbo loh chuan kan ngam lo thuai ang… Ropuiliani hi lal a ni. Mahni insitna reng reng a nei lo. Lal thisena bual a ni tih hi a awm dan leh a ṭawngkam tin aṭang hian a hriat a ni.” (Seksiara Chan5na lan3na)

“Ka nu chu ropui takin a lo hawng leh a, hnehtu a ni a, a dote hneha lo kir ani.. Ka nu Ropuiliani hi Rangamati Bawrsap chuan , lal ropui tak a ni a, chawimawi a phu a ni” Lalṭhuama. Chan 5na lan 5na

(Note: He thuziak hi M.A zirlai kan nih (2011 – 13) laia kan rem khawm ve a ni a, tun hnuah thlir dan dang a bihchiangtu ngei pawhin neih theih a ni)

Leave a Reply

Your email address will not be published. Required fields are marked *

error: Content is protected !!