-Lalrinchhana

INTRODUCTON

Ropuiliani hi 1820 chho velah a piang a. 1895-ah Rangamati jail ah a thi a ni. Ropuiliani lehchan hi Dr. Laltluangliana Khiangte ziah a ni.

Ropuiliani hi a pa chu Lalsavunga a ni a. A pasal chu Sailo lal fapa Vandula a ni. Ropuiliani hi a pasal thih hnuin kum li emaw vel a lal a. Sailo lal ropui tak a ni a, a induh em em mai a. Vai len lai pawhin  a pasal fuih huaisentu a ni ṭhin.

A huaisen em avangin Bawrhsap pawhin Mizo lal ho zingah chuan an huphurh ber leh tawhkhirh an tih ber a ni. Hmeichhe awmnem zawk mah ni se Mizo lal dangte pawhin inhumhim nan an hman ber a ni hial a ni.

Kumpinu sawrkar kuta a inpek ve duh loh avangin tharum hmangin rah beh a ni a, a rilru erawh an tlawm thei lo tluan chhuak zak a ni.  A tlawm duh loh avang hian tun thlengin Mizo lalte zingah hriat zui hlawh ber pawl a ni ta hial a ni.

I.Chan II (Lan 1):

Vanapa:

1.Remhriat hi chakna a ni a, remhre tur chuan ngun taka ngaihtuah a ṭul ṭhin.”

Lalsavunga leh a upate’n Hmar ho beih an duhthu an sawikhawm laia a sawi a ni a. Thil engpawh mai hi tawngpawng basa ngam ngawt lova fimkhur taka tih a ṭha a ni tih a sawina a ni.

II.Chan III (Lan 5):

Vandula:

1.”Thawma tihzam theih chu mi sawihzep a ni. Mi dawihzepin thudik a hre pha lo. Thil engpawh hi fiah hmasak zel tur.”

Bengkhuaia Sap ho lakah a tlawm thu an sawi lai a ni a. Sap hoin an vau zam a, sap naupang an man leh silaite pawh an chhuh let leh vek tawh a ni. A tak ram thlen hma hauha Bengkhuaia a han tlawm ta mai chu Vandula hian a dem em em a ni. Ani chuan Sapho nena inbiaka, a ṭul chuan indo mai pawh a ngam thu a sawi bawk a ni.

III.Chan IV (Lan 1) :

Vandula:

1.”Hmeichhe awmnem zawk i nih avangin zam suh la, chakna chu thinlungah  a awm. Fim takin thil  ngaihtuah la, hruaitu tha tak i ni mai ang.” Feminist perspective aṭanga thlir lovin, “Mihring nunah eng nge a zirtir?” tih hi han thlir ila. Hmeichhe awmnem zawk pawh ni sela huaisen taka a ram humhalh tura a din tlat chuan mi chak tak a lo ni mai dawn a ni. Shaggy hla Strength of a Woman tihah chuan

She’ll put a smile upon yah face

And take you to that higher place

So don’t you under estimate

The strength of a woman.

a lo tih ang hian he lemchanah hian Ropuiliani hi Mizo lal dangte tan beiseina siamsaktu angin tarlan a ni a.

Ni 17.9.2018 a MNF party-in Robert Romawia Rawite an lawm luhna inkhawmah Zoramthanga’n, “Congress aṭangin chherpui a la rawn kal dawn.” a tih ang deuhin Ropuiliani hi a hun laia Mizo lalte meichher kengtu a ni ta reng a ni.

2.”Kan ram hi kan ram a ni a,… Pi leh Pu aṭanga thurochhiah ngai pawimawh mite hi an hmuingil ngai e.”

Patriotism kan hmu a. Cambridge dictionary chuan Patriotism chu,”the feeling of loving your country more than any others and being proud of it.” tiin a sawifiah a. He Vandula ṭawngkamah hian chu  Feeling chu kan hmu a ni. A thih dawna a thuchah hnuhnung chu a nupui fanaute leh a khua leh tuite sahimna aiin an lal ram venhimna a ni a.

Mahni ram venhim duh avanga thite hi tun thlengin khawvelin a la ngaisang reng a. ‘Martar’ tiin a ko ṭhin. Roopuiliani pawh tun thlengin leh ṭhangthar lo la awm zel turte pawhin an hre zui reng tawh dawn a ni.

IV.Chan IV (Lan 2)

1.Ropuiliani:

1.”Mi zara nung hi an tawrhhlelhawm duh viau reng a nia.”

Nu leh pate chawmhlawm, nu emaw pate emaw dinhmun sang taka an din avanga lo chapopui ve ngawt an awm a. Helaia Ropuiliani ṭawngkam hi tunlai ṭhalaite khawve hlimthla tarlanna ṭha tak a ni.

2.”Inrem an duh chuan buaina siam lo mai rawh se. Buaina a chhuah chuan inrem a harsa tawh ṭhin. “

A lalram rawn chuhpui lo tura a ngenna ṭawngkam hi a tawi felin a fun kim hle a ni. Thu bul nghut anga lang si, a phena tui tam tak pai si hi Ropuiliani character nen hian a inhmeh hle a. He lemchan thawnthu ziaktu themthiamna tarlangtu a ni.

3.”Vawikhat i tawlh chuan, i tawlh i tawlh zui tawh ang.”

“Once a Blue, always a Blue” tih ang deuh hi a ni a. Saplala thu kha vawi khat a zawm chuan a hnu zelah pawh a zawm zel loh chhan tur a awm lo a. Miin a vawi khat tih chhin aṭangin a lo ching chho zela, a tawpah chuan ruihhlo bawihah a tang ta ṭhin ang deuh hi a ni.

V.Chan V (Lan 2):

1.Seksiara:

1.”Rilru huai chuan thil a ti thei mai zel a. Ropuiliani pawh hian mi chaklo niin a inhre ngai lo.”

Kum 1930 a Gandhi’s Salt March  kha tun thlengin khawvelin a la hria a. Mahatma Gandhia’n zalenna a sualna atana a chet lakna hmasa a ni. A tumruhna leh a huaisenna avangin India chu British rorelna lak ata a zalen ta a ni.

Rilrua huaisente chu an dingchang ṭhin a. Chak lo zawk anga an lan chang pawh a awm ang. Nimahsela an rilru paukhauhna mi thiltithei takah a siam ṭhin a ni. Chutiang bawkin Ropuiliani pawh hi a hun tawp thlengin Sap ho lakah a tlawm duh lova, anni pawhin an hlauh ber a ni ta a. Mizote bengah hian Ropuiliani hming hi a la ri bang thei bik lo a ni.

1.Ropuiliani:

1.”Nang hmai hnih neia phiarrutu, verther chhuaha ram ar rawn khai lut a, kamsira tur pai reng mihring. Mahni ram phatsantu mi hmuingil ka hre ngai lo. Ngawi chip cham rawh.”

Chhan eng vang pawha mahni ram phatsantute hian an zahawmna an hlauh a. An hlutnate chu thaibovin a awm ṭhin. Football khawvelah pawh thui takin a dik a. Sum an um avanga Club dang an pan hian a hma aiin an tlahniam sawt ṭhin a ni.

2.”Fin kherk chhuah a, phiarru a, pawng laka hnehna hi dan kalh a ni. Dan kalha che reng reng chu misual a ni.”

Rule of Law chuan, “Dan thumhun hnuaiah mi zawng zawng hi an leng tur a ni”, a ti a. Kum zabi 16 naah khan Samuel Rutherford chuan The Divine Right of Kings beih na atan a lo hmang tawh a. “Lalte chu he khawvel dan hian a khuahkhirh ve lo.” tih ngaihdan chu a paih thla a ni.

Hetiang chiah hian dan chungah hian tumah an leng lo a ni tih hi helai thu hian  a tarlang a. Dan chunga leng an awm chuan ram leh khawtlang inrelbawlna a lo buai a. Helna te a lo chhuah phah ta ṭhin a ni. French Revolution  aṭang pawh khan kan hmu thei awm e.

VI.Chan V(Lan 3):

Ropuiliani:

1.”A bo a bang awm lova tlawm hmin der mai zawng nakinah ṭhangtharten min rawn dem dah ang e.”

Mihringte rilruah hian, a bik takin vantlang chunga lengte hian , “Nakin zelah mite’n engtin nge min sawi ang?” tih zawhna hi an nei lian hle ṭhin a. John Maxwell Edmonds-a’n, “When you go home, tell them of us and say: For their tomorrow, we gave our today.” a tih ang deuh khan Ropuiliani pawh hian ṭhangtharte’n an rawn sawi zui dan tur a dawn thui hle a ni.

2.”Milem chu chawimawi chiam pawhin a ropui chuang lo. Bawi ropui ka hre ngai hek lo. Ka ram leh hnam phatsan a, mi bawiha awm turin vawi khat mah min thlem tawh suh.”

Seksiara’n Ropuiliani chu inlamlet a, tlawm turin a thlem a. Ropuiliani chuan chu chu ram phatsan naah a ngai a. A hlutna chu a hlauh phah dawn niin a ngai a ni. Mahni induh tawkna hian mihring hlutna a vawng nung a. Sap ho bawiha awma, an rawng bawl sak ai chuan ropui taka lung in a tan  a thlang ta zawk a ni.

Dramatic devices kan hmuhte

1.Narration:

Narration chu lemchan sawifiahna a ni.

A bul aṭanga a tawp thlengin Narration hi hmuh tur a awm a ni.

Chan 1 (Lan 1)-

Aizawl lal in: Lal Lalsavunga leh a khawnbawl upate an lo lang a.

1.Chan IV (Lan 5)-

Satinkhara: Ka pi ka lawm e. Min duhsak ta hle a, lawmthu ka sawi e. Kan pute pawh an lawm ngawt ang. I chungah ka lawm e.

(An chhuak a , kaiṭen a kan lai takin Hnawnchheuva chuan a kap let tawp mai a,ka chhawn lovin a thi a, a ruawng chu dai pawnah an hnuk chhuak a, hnahin an khuh a, an kalsan ta a.)

  1. Choir:

Zaipawl an ni mai a.

1.Chan I (Lan 2)-

Pasalṭhaho:   Ngho var e, ka dawnah e;

Kei chu zan mu ka chhing love,

Mual ling e, leng hnuaiah e,

Sai lian kal lai ka thlawh awk e,

  1. Aside:

Aside chu lemchan changtu pakhat, midang awm ve reng laia, biak bik pawh nei lova  a ṭawngchhuah hi a ni a, changtu dangte pawhin an chhang kher lo.

Chan I (Lan 3)-

Paho: Kan tlangval lai a va ngaihawm em. (17)

4.Verbal irony:

Thusawituin a thil sawi, a sawi dan letling leh zawmze hran daih nei hi a ni.

*Chan IV (Lan 5)-

Ropuiliani: Vawiin tlaia i man theih zat zat vawk leh ar man ang che,… Kal rawh u, va inzui chhuak rawh u.

Satinkhara: Ka pi, ka lawm e. Min duhsak ta hle a, lawmthu ka sawi e. Kan pute pawh an lawm ngawt ang. I chungah ka lawm e.

*Chan V (Lan 1)-

Dara: Ni lo, I damdam mang lo tih ka lo hria a. Damlo kan tura lo kal ka ni zawk. Hei arpui tui lai awm atan ka rawn kensak che.

5.Situational irony:

A changtuten an thusawi ang ni miah lova thil an tih leh an thlen tir hi a ni.

*Chan IV (Lan 5)-

Ropuiliani: Vawiin tlaia i man theih zat zat vawk leh ar man ang che,… Kal rawh u, va inzui chhuak rawh u.

Satinkhara: Ka pi, ka lawm e. Min duhsak ta hle a, lawmthu ka sawi e. Kan pute pawh an lawm ngawt ang. I chungah ka lawm e.

(An chhuak a , kaiṭen a kan lai takin Hnawnchheuva chuan a kap let tawp mai a,ka chhawn lovin a thi a, a ruawng chu dai pawnah an hnuk chhuak a, hnahin an khuh a, an kalsan ta a.)

6.Soliloquy:

‘Phunrukna’ te pawh an ti a. Lemchangtuten midang awm ve loh laiin an rilrua an thil veite an sawichhuak ṭhin a. Chu chuan a thlirtute rilru puthmang a kaihruai ṭhin.

*Chan V (Lan 1)-

Dara: Mikhual pawh min ngaihsak chang ta lo.

(Chhuah pahin a phun ru a.)

Hetia an buai phili lai hi nanchin tur a nih hi.Naktuk zan lamah pawh an la buai chhunzawm ngei ang. Rawng takin hawng ila,… fuh dawn khawp e.

CONCLUSION

Lalnu Ropuilaini lemchan thawnthuah hian a ziaktu hian a changtute milin an ṭawngkam a siam thiam hle a. Ropuilaini chu Sailo lalnu ni awm rengin a ṭawngkam pawh a khauhin amah pawh a indah sang tawk hle tih kan hmu thei a.

William Shakespeare-a chuan a lemchan thawnthua a changtute hmangin mihring nun a thlir dan a pholang ṭhin a. He lemchan thawnthuah pawh hian a ziaktuin mihrin nun a thlir dan hi a tarlang ve bawk a ni.

Bibliography

  1. Abrams, M.H.. A Glossary of Literary Terms (Third Edition). Taj Press, New Delhi. 2009.
  2. Khiangte, Laltluangliana. Lemchan khawvel 1. Felfim Computer. Aizawl. 2017.
  3. Khiangte, Laltluangliana. Theory of Literature(Bu Thar). Lois Bet Print & Publicaton. Aizawl. 2017.
  4. Laldinmawia, H. Literature Lamtluang. KL Offset Printers. Aizawl. 2018.

Leave a Reply

Your email address will not be published. Required fields are marked *

error: Content is protected !!