RL Kamlala chanchin – R. Laldinsanga

Past History of R.L. Kamlala

-R. Laldinsanga

Mizorama Kristianna a lo luh hma leh luh hnu aṭang tawh khan, Mizote hian zai kan ngaina hle a. Hla phuah thiamte hi kan pi leh pute pawh khan an lo ngaisang em em ṭhin a ni.Kristianna a lo luh aṭang khan kan Mizo hla thu leh thlukte a lo danglam ta a. Kan hla thu leh thlukte pawh Kristianna mil zawngin kan siam rem chho ta zel a ni.

R.L.Kamlala hi Mizote zinga hla phuah thiam berte zinga mi a ni a. Amah avang hian kan Mizo thu leh hla phuisuiin ṭhangtharte tan sulsutu pawimwh tak ni a. A hla thu leh thlukte hian belh chian an dawlin Mizo rilru mil zawng taka siam a nih vang hian, Mizote tan chuan a hluin a ngainatawm bik hle a ni. Hla lam chauh hi a phuah lova, thu ṭha tak tak a ziak bawk. Amah hi Pathiana inpumkhatna ngaisangtu a ni a. Miretheite hamṭhatna leh zalenna ngaisangtu a ni. Amah ang Mizoten kan nei hi kan vannei hle a ni. Amah avanga Mizoten thil hlu kan neihte hi chhiar sen rual a ni lovang.

Mizote tan a rohlu chhiar sen loh hnutchhiahtu R.L.Kamlala hi Mizote rilruah a thi leh ngai tawh lovang.

A pian leh murna : R.L. Kamlala hi kum 1902 ah Kawnpui ram, Sihpui piah, Kawnoui Zophei ram Ngurlenah piang a. A pian kum hi chiang taka hriat a har hle a , lehkhabu ziaktu tam ber chuan kum 1902 a piang anga an ziak laiin, a chhungte chuan 1901 a piang niin an sawi thung a. Amah hi Lutzathanga leh Chawngkimi te fapa upa ber a ni. Pianpui unau pathum, mipa pahnih leh hmeichhia pakhat a nei a. Pu Kamlala te chhung hian an thlahtute thui tak thleng an chhui thei a. Pu, R.L.Kamlala thlahtu bul chhui theih chinte chu- [adToAppearHere]

Mangthanga’n Mangkhaia a hring ,Mangkhaia’n Thawnglura a hring a, Thawnglura’n Mangula a hring a, Mangula’n Mangropuia a hring a, Mangropuia’n Manghuliana a hring a, Manghuliana’n fapa pahnih Mangthangvunga leh Zathata a hring a, Mangthangvunga’n Mangruma a hring a, Mangruma’n fapa pahnih Kairum leh Thangkhawlala te a hring a. Kairuma’n fapa pahnih Lutzathanga leh Saitulera-te a hring a, Lutzathanga’n R.L. Kamlala a hring a.

Zirna lam : Pu  R.L. Kamlala pa Lutzathanga hian a fapa hi lehkha thiamtir a duhs ak em vangin, a pian thlak veleh pencil a humtir nghal a. Lehkha zir lam hi a rilruah tuh ngheh sak tlat a duh avangin kum 5 mi lek a nih laiin pencil leh lehkhapuan a leisak a. Ziak dan turte a zirtir ṭhin. Hetiang ang pa, zirna leh thiamna ngaisang mi a nei hi a vannei hle a ni. Heng hun lai hian an khuaah lehkha thiam pawh an la awm lo. Kum 10 mi a nih aṭangin an khaw lehkha thiam awmchhun Hangpawla chu Private zirtirtuah an la a, chumi hnenah chuan chhiarkawp bu II-na thlengin a zir a. Mau a lo tam tak avangin an khua, Mangselvunga khua chu an darhsan ta a. A zirna chu a chhunzawm thei ta lo a ni. Mautam dam kum 1912-ah a pa Saitulera khuaah an pem a. Chutah chuan a zirna a chhunzavm leh a, mahse an zirtirtu an sawn leh tak avangin a zirna chu a tawp leh ta a ni.

Kum 1918-ah Kolasib-ah Taihranga sikulah a lut leh a,1919-ah chu sikul aṭang chuan Lower Primary exam a pass a. Kum 1920 leh 1921 chhungin Aizawlah Middle English School-ah a lut a, Lal fa Rawsawt (Chief sons’ Ration) hmuin Upper Primary, chutih laia pawl ruk chu a zo leh a. A zirna chu a chawlhsan leh rih a. Kum 1923, May ni khat aṭangin 1925 thlengin Kolasib-ah zirtirtu hna a thawk a. Chuta ṭangin 1926-ah ama khua ngei Kawnpui-ah an sawn a. Kawnpuia zirtirtu hna a thawh chhung hian private-in Middle English, chutih laia pawl riat chu kum 1929-ah a exam a, 1st Division-ah a pass leh a. Pathian thlaraua danglamna nasa tak a neih avangin 1932-ah chuan zirtirtu hna chu a bansan leh ta a. [adToAppearHere]

Kristianna kawngah : R.L. Kamlala hi naupangte  (kum 5-8) a nih laia  Zosap khaw fang, Pathian thu sawi a hmuh chuan a rilru a khawih hle a. Vai lema chan leh Zosap lema chante hi a chak zawng tak a ni. A pain Kekawrtlawn dum a ṭhuisak a, chu chu hain Zosap lemah a chang ṭhin a. Upate chuan Zosap tiin an ko fiam ṭhin. Chutih lai chuan Pathian thu hre lo mahse Pathian thu awih chu mihringte pian chhan leh awm dan tur reng niin a hria a. Pathian thu awih nih chu a chak em em a ni. Chutih lai chu an an khuaah Pathian thu awih pakhat mah an awm lova. Kum 1912-ah a ṭhian naupanghote sawm khawmin, ‘Hawh u, Pathian thu i awih ang u,’ tiin ṭawngṭainate a neihpui ṭhin. Chutih lai chuan Naupang Thu-inchhang bu chauh hi a nei  a, chumi buah chuan tawitein ṭawngṭaina a awm a, chumi hmang chuan an ṭawngṭai ṭhin. Chawlhni (Sunday) pawh a hre dik hlei thei lova, a rin tawk tawkah an chawl mai ṭhin. Naupang thukhawchangah upate hriat an hlau em em a. Tirhkoh khawfang te pawh an in hriattir ngai lo. Hengte hi a ruk tein an ti ṭhin a ni.

Kum 1912-ah a pa Saitulera khua a an luh chhoh chuan Kristian tlemte an lo awm a, chutah chuan a tel ve nghal a. Kum 1917-ah Khwserh-suang tlang an kai chho a. Tirhkoh Selkhuma a lo awm a, chutah pawh chuan a tel ve zel a ni. Aizawl sikula a zirlaiin, 1920-ah Nisapui Presbytery-ah a tel/ kal ve a, chuta  ṭang chuan Pathiana lunglenna tak tak a nei ṭan ve ta a ni.

Pathian Thlarau-a a ruih lai hian miten Pathian Thlarau ni lovin Ramhuai thlarau changah an ngai tlat a. Lalin a mantir a. Ṭhingkawltuk an buntir a, chumai duh tawk loin pawna a chhuah pawh an phal sak lo a ni. A Lalpa angin thi ve rawh se an ti a, Kross-ah nilengin an phuar bet a, nisaah an pho a, a tihel nan a hmaiahte bengin chil te an chhak khum a, silai ten kap tur angin an tin a, an tih ṭhaih a ni. Chutih lai chuan vawi khat mah a ṭawng chhuak lo. A thu sawi chhun chu, amah nghaisa tura an tih Thangzuala hnenah chuan, “Zuala hian min lo hmangaih ber a nih hi,” a tih chu a ni. A sawisatu ngei hian, “Hetiang khawpa mi ropui ka lo nghaisa hi Pathian nghaisa tlukin ka in ngai,” a ti a ni. Pu Kamlala fapa Lalhuma hnenah mittui tla zawih zawihin ngaihdam a dil hial a ni.

RL Kamlala Kros-a an phuarna hmun. Tunah chuan Synod Compound a ni tawh. He hmun hi Bualpui khaw chhung RL Kamlala thlan awmna chhak lawk a ni.

Pu R.L. Kamlala hi Pathian thu a ding nghet tlat, Pathian tana nun ui lo ber, Pathian thu dik nia a hriatah chuan ding nghet tlat mi a ni. Pathianah chuan mi ṭha leh mi chhia an awm chuang lova, mi ṭha leh mi chhiate inpumkhatna ngaisangtu a ni.

Hla phuah leh thuziak lamah: Pu R.L. Kamlalan Pathian aṭanga thilpek ropui tak a dawn chu hla phuah hi a ni. A hla phuah zawng zawng, Kistian hla leh a dangte, Ralte ṭawnga a phuah zawng zawngte hi 100 chuang lai niin an sawi. Pu R.L. Kamlala hian a hlate hi chi hnihah a ṭhen a, ‘Kristianna hla’ leh ‘Mihrinna hla’ tiin a vuah hrang a. ‘Mihrinna hla’ tihte hi a mihring mihrinna rilru leh ngaihtuahna hmanga a inpuanchhuahna, a tuina lam zalen taka a phuahna a nih avangin, “Ka hla chuam” tiin a sawi nghe nghe ni. Kristian hla ṭhenkhatte hi chu Ralte ṭawnga a phuah hmasak Mizo ṭawnga lehlin lehte a ni bawk.
[adToAppearHere]
Mizote hi Kristian kan lo nih hnu a kan Mizo ṭawng leh hla ngei hmanga Pathian hla lo siam hmasa bertu chu Pu Patea, Khawbung ni a hriat a ni a, a dawttu chu C.Z. Huala a ni. A pathumna chu Pu R.L. Kamlala hi a ni. C.Z. Huala chuan heng anni pathum Mizo ṭawnga Pathian hla phuah hmasa bertute zingah hian Kamlala hi chu hla phuah thiam tak tak (Born poet) an tih ang hi niin a hria a. Pastor Liangkhaia pawhin Kamlala hlate hi a duh em em ṭhin a, a ngaisangin a ngaihsanzia a sawinaah pawh, “Heng kan hla phuahtu zingah hian Pu Kamlala hian thilpek chu a dawng zual ang,’ a ti a ni. A hl phuahte hi a chhiar a chhiar ngawt pawhin hnang tah thiam tak kut chhuak ang maiin a dakin a dak thlarh mai a ni tiin an sawi hial a ni.

Pu Kamlala hian kum 1921 aṭangin hla a phuah ṭan a, a hla phuah hmasak ber chu, ‘Rinin thlir thiam ila,” tih hi a ni. Hla phuah chu kum 1950 thleng khan a la nei zeuh zeuh nain a hla phuah runpui ber chu kum 1921- 1930 inkar kha a ni. Kristian hla a phuah vanglai tak hian a rilru kaihruaitu ber pakhat chu a phuah hun laia kan Mizo Kristian hlabu leh Sankey bu kan tih (Sacred songs & Solos, compiled Dr. D. Sankey) te hi a niin a lang. Ama kut ziakah phei chuan a hla phuahte reng reng hi Sapṭawngin a thupui (Title) a dah vek zel a. A kut chhuak han thlir a thil pakhat a hman uar em em mai chu hawrawppui a ni. Thil eng pawh,Van lan thil emaw, Pathian laka chhuak, Pathian nihna leh a zepui sawi lanna atan Hawrawppui hi hman ṭulin a hre tlat ṭhin niin a lang.

Hla reng reng hi a lo chhuahna bul chu lawmna emaw, lungngaihna emaw a ni chawk ṭhin a. Lawmna ai mahin lungngaihna leh khawharna hian hla hi a tichhuak tam zawk fo ṭhin. Kamlala hlate pawh h lungngaihna lam hla deuh vek a ni a. A tan chuan khawvel nun chhung chu lungngaihna hlir, lungngaihna hlir a ni. A nunah pawh hian hlaa chantir tur hlimna leh lawmna thleng khat hle a. A thlen chhun pawhin a cham rei lo hle ṭhin.

Kamlala hi hla phuah thiam chauh ni lovin Mizo ṭawng pawh hmang daihzai thiam em em a. Pathian thu ril leh thuk, a chatuan remruat khawvel awm chhung zawg zawg sermon, mi thiamten an sermon sen loh tur leh sawi fiah tawk hleih theih loh tur Genesis aṭanga Thupuan thleng thu laimu awh thu tlemte hmanga kheh chhuak thiam a ni.

Aw min hrilh rawh thukna ropui,
Ran thleng leh ṭhing anchhe dawng leh
Vana Lallukhum a inzawm,
Lei Eden leh Salem thar nen,

[adToAppearHere]
tiin. He hla chang hi Patea, Khawbung c huan a lo hriatin mak leh ropui a ti hle a ni ang, ‘Umm, hei hian hla zawng zawng a phuah zo ta, phuah tur kan nei ve ta lo,’ a ti hial a ni. Ralte ṭawngin hla tam tak phuah a, Mizo ṭawnga lehlin a ni hlawm a. Ralte ṭawnga a hla phuah pakhat han tarlang ila,

VAN NGAIH LA

1.Van khih Angel zniin a hol, O Elshadai fakin,
Halleluia, Halleluia tiin an au rual uh.

Leimi i loi kim hun ang thlirin ka ngai zual a,
Halleluia tiin O Salem tharah.

2.Innghahna khawvelah hin na ngui, beramno in a ti,
Vanah na lal khuntheng am touchun n chol 1ing.

3.O, kei ka muanna ber a hi, chau va ka ngui pohin,
A chakna roupui chuh ringin vanah ka leng teding.

4.Mangaihna lal roupui na thi, a riang ka lung damna,
Kumkhuain a tharin a lang, fakna a sang zel ing.

Pu Kamlala hla, Ralte ṭawnga a siam lehlin ṭha tawk lo deuh pakhat chu, Hla Thar bu No 12 (H1imna ni ropui chu a eng) tih chang 3-na kha chang 4na a ni a. ‘He kawlkilah te lo thoin’ tih a ‘He’ kha Mizo ṭawnga awmzia tak tur chuan, ṭhahnem ngai leh urhsun tak a mite au angin, ‘Aw kawlkila mite lo thovin’ tiin hmang ila a awmzia a dik zawk a ni.

R.L. Kamlala hian hla phuahah hian theihna (talent) a nei ṭha hle a ni ang, hla pawh amaha a lo kal tawh chuan a phuah rang thei hle a ni awm a. Zirtirtu hna a thawh lai, a hla phuah runpui lai khan an sikul vawi thum a hel chhuah chuan hla pakhat a phuah hman zel a ni, an ti hial a ni.

Kawnpui leh Bualpui khu a tana thil hlu tak pakhat, Khawserh-suang tlang an tihah khian Lunghlum lian tak mai a awm ṭhin a. Pi leh pute chuan a changin kawng thlangah, a changin kawng chhak lamah kal sawn kal sawn thei niin an sawi. Gorkhali ho phei chuan Pathianah an ngai hial a, an ru ta daih mai a. Tuna Kolasib-a a Vai Mandir-ah khuan an la dah reng a ni. Kamlala’n a pa Saitulera hnenah, ‘I ram chhunga thil hlu tak awm eng vangin nge vai i lak tir, la kir leh rawh’ tiin a ngen a. A pa’n a lo uksak pui vak loh avangin a ṭah phah hial a ni. A ui em avangin Chawilung tih hla hi a phuah ta hial a ni.

Kamlala hi mi thil chik mi tak ,a hla phuahte pawh fel tak leh chiang tak a vawng ṭha dim diam mi a ni,a kut chhuak ang chiaha miten an chhuah duh dawn loh phei chuan, ‘Lalpa-ina mi kawltir ve hlate hi chu chhuah tel ve lo law law se ka duh zawk’ ti hial khawpa ngaih dan siam ngam a ni. Sapho tan John Milton-a hlu em em ang hian kan Mizo hla phuah thiam R.L. Kamlala hi Mizote tan chuan a hlu em em a ni.

R.L. Kamlala hian hla chauh a phuah lova, thu ziak lamah pawh pa ngaihsanawm tak a ni. Thlarau Entlang tih leh Pialral zawn thu tih te phei hi chu ngaihnawm tak leh belhchian dawl tak a ni. Jeremia Ṭah Hla leh Solomon-a hlate pawh a letling bawk a ni. A thu lehlinte pawh hi chhiar a nuain a mar ṭha hle a, belhfak awm tak vek a ni.

R.L.Kamlala, Mizote zinga hla phuah thiam hmingthang, Kawnpui khuain kan lo nei hi kan vannei hle a ni. Kan ngaihhluta kan chawimawi a phu hle a ni. Kan chawimawiin kan ngaihlu lo zawk hle niin a lang. Hla phuah thiam hmingthang Mizote tana Rohlu chu 25th May 1965 khan, a dam laiin thu leh hlaa a fak ṭhin Lalpa chu chatuana fak hlen turin khawvel a chhuahsan ta ni.

“R.L. Kamlala hlate hian mi lungngaite hnemin, beiseina thar  a siamsak a, Mihring nun hi a siam thar ṭhin avangin theihnghilh ni a awm lo ang.”

 

Lehkhabu leh mi rawnte: [adToAppearHere]

1.R.L.Kamlala kut chhua k – Siamkima Khawlhring

2.Zalenna ram – Siamk ima Khwlhring..

3.Mizo zinga a ber kaite- Upa, K.Thangsiama

4.Kawnpui Hmarveng Kohhran chanchin – Lalbiakliana

 

Mi rawnte:

1.Upa, Malsawma, Kawnpui venglai

2.Pu Lalhuma, s/o R.L. Kamlala, Bualpui [adToAppearHere]

Leave a Reply

Your email address will not be published. Required fields are marked *

error: Content is protected !!