Rit phurh inchhawk tawn – Upa K. Zalawma

RITPHURH INCHHÂWK TAWN

Upa K. Zalawma

Unaute u, mi, sual eng pawh a tih lai phâwkin awm sela, nangni thlarau mite u, “Thlêmna ka tâwk ve dah ang e,” tia invêng ṭha chungin chutiang mi chu thuhnuairawlh takin tungding leh rawh u. In rit phurhte chu inchhâwk tawn rawh u; chutichuan, Krista dân thu chu in zâwm a ni ang. Galatia 6:1‭-‬2.

Galatia 6:1,2-ah hian Paulan sual laka invêng chunga mi, suala tlu leh chak lote chu zăwldawh taka ṭanpui tur tih a sawi a. Chutiang ti thei tur chuan mahni lam inbih chian a ngaih thu chang 3-5-ah a sawi leh a ni.

Mi, sual engpawh a tih lai phâwkin awm sela:
Heta ‘sual’ tih hi a ṭawng bul lamah chuan ‘paratoma’ an ti a ni awm e; chu chuan ‘tih palh sual’ a kâwk an ti. ‘Phâwk’ tih hi ṭawng bul lamah chuan ‘prolempthe’ an tih lehlinna a ni a, ‘sual ti lai man, nangchîng’ tiin KJV leh RSV chuan an letling an ti. “Miin thil engpawh lo tisual ta hlauh sela,’ tih ang vel a ni awm e.
Tum sa reng vâng leh tih dawklak vânga sual ni lovin, thlemna do zawh loh vanga insum zawh loh thila sual palh ta a kawk an ti.

Chutianga sual palh chu a hnuah an inchhir leh hle thin. Hei hi Kristian tam berte sualna ang chi a ni.
(Tunlaia kan smart phone hmang pawh hian suala tlu tura thlêmna hi a tam hle mai, kei ngei pawh hian ka tawk fo va, ka hneh lo dawn dawn ṭhin. Zan rei lamah phei chuan miin min zuam leh zual a, sex hmanpuia sawmna te hi a lo kal fo ṭhin. Hmanraw ṭha hmang hian Setana hian ringtute hi min va buan nasa ṭhin em!)

[adToAppearHere]

Nangni, thlarau mite u, “Thlemna ka tawk ve dah ang e,” tia inveng tha chungin chutiang mi chu thuhnuairawlh takin tungding rawh u:
Sual leh a titute chunga Kristiante rilru put dân tûr leh thil tih dân tûr ṭha hetah hian a sawi a. Sual ve lo ngei tura mahni pawh invên tur a ni. Chutiang chung chuan rin loh taka lo tisualtute chu hmusit lo leh zăwldawh taka ṭanpuia, an tihsual hmaa an dinhmun anga ding chhuak leh vat thei tura dawm kan tum tur a ni.

A tisualtu nembet zâwnga sual huat hi a ṭha lo ang bawkin, sual tipunlun zâwnga a tisualtute lainat pawh a ṭha chuang lo. Sual tipalhtute tân mi fel lutuk kianga awm a hahthlâk a, mi ti mai mai kianga awm a manganthlâk a, mi tui firfiak kianga awm lah a khamawm a; thlarau mi nih vanga thuhnuairawlhte kianga awm erawh chu a nuamin a hahdam thlak a, insiam ṭhat leh pawh a sam nge nge ṭhin (Rev. C. Rosiama).

Mi chak lo leh hnung tawlte dimdawi taka tun din an ngai:
Mi an thiam lohna leh an bawhchhiatna te hmusit zâwng emaw, nuih zat zâwng emaw, thinur leh hau zâwnga tih hian hneh an har a, an ṭhatna tûr thinlung taka duh sak chunga dimdawi taka tun din tum tur a ni.

Keimahniah hmangaihna rilru a awm chuan kan hmel leh ṭawngkamah miin an hre mai a, kan thu pawh an awih awl zawk thin. Mi an thil tisual lai kan phawk a nih pawhin, midangin an hriat pun kher lova siam ṭhata simtir tura kawng zawnpui hi a ṭha a ni.

Keimahni pawh inven fimkhur a ngai:
Mi sualna siam ṭha tura an tih ang tihpui phawta hruai chhuah tum hi tluk ve awl tak a ni. An sualnaah kan tel ve ang tih hlau tak chung sia hruai chhuah tum tur a ni. Midang siam ṭha tur hian rinawm a ngai a, miin an thuruk an sawi chhuah ngamna khawpa rinawm nih tum tur a ni.

(Mi insual lai ṭhelh te hi, a ṭhelhtuin kut tuar hlauh a awl. Ṭumkhat chu ka zan lêng haw hian mi pakhatin zurui pakhat a lo sawisa lai hi ka hmu hlauh mai a, an inkarah dingin ban ka phar a, ṭhelh ka tum a, a lo khawihtupa zawk khân tih palh anga ngaih theih siin ka luah min hnek ta vak vak mai a, a ṭhelhtu kha an insualnaah chuan tel ve mai awl tak a ni.)

[adToAppearHere]

Ritphurh inchhâwk tawn tur kan ni:
“In ritphurhte chu inchhawk tawn rawh u, chutichuan Krista dan chu in zawm a ni ang.” (6:2)
Heta ‘ritphurhte’ tih hian taksa, rilru leh thlarau tihrehawm thei nun phurrit engpawh a kawk thei an ti. Mi tinin kan nun phurritte min chhawktu tur kan duh theuh va, thûk taka inhriatthiampui hi inchhawkna ṭha tak pakhat chu a ni. Inhriatthiampui tak tak hnuah chuan a ṭul anga inpuih zui dân tur pawh a hriat theih a, a ṭul ang taka inṭanpui chu damdawi a tling a ni. Phurrit phurte chhawk hi Pathain hna a ni. Sam 68:19-ah chuan, “Lalpa, kan phur ni tina min phurhsaktu,’ tih kan hmu a, Lal Isua thusawi ri mawi ber zinga mi chu, “Nangni thawkrim leh phurrit phur zawng zawngte u, ka hnenah lo kal ula, keiman ka chawlhtir ang che u…,” tih kha a ni (Mat. 11:28ff). Chuvangin ritphurh kan inchhawk chuan Krista dan kan zawm tihna a ni. Mosia Dân chuan phurrit a siam a, Krista dan chuan phurrit a chhâwk thung a ni (Rev. C. Rosiama).

Mizo hnam nuna mawi tak pakhat chu hnathawhnaa mi phur chhawk sak ṭhin kha a ni. Pakhat lehah chuan ṭanpui ngaite ṭanpuia chhawm chhuah kha a ni bawk. Chhiat ni ṭhat nia kan inṭanpui tawn ṭhinte hi phurrit in chhawk tawnna pawimawh tak chu a ni.

Tun laiin chhung tin deuhthaw hian nupui pasal inkarah emaw, fate enkawl chungchangah emaw, ni tin khawsakna leh ei zawnna kawngah emaw phurrit kan nei theuh awm e. Chu bakah kan Kristian nun kawngah kan Bible châng thlanin a sawi tum tak zawk hi phurrit inchhâwk ngai hi kan nei deuh theuh ang. Chutiang inchhâwk tlâng tur chuan mi dang nihna leh dinhmun inhriatthiam pui a, hmangaihna thinlung leh zawl dawhna nena inchhawk tawn theih ṭhin a ni.

Kan thinlunga kan vei, sawi chhuahna remchâng awm si lote hian phurrit min siam fo thin. Chûng ang hunah chuan kan vei zâwng zâwng sawi chhuah vekna tur inhawngtaka min lo dawngsawngtu hnena kan inbunchhuah hian chhawk ang huaiin kan hahdam sawng sawng ṭhin. Hei hi hriat reng a, mi phurrit chhawktu ni turin, sawitu ni lova, ngaithlatu ṭha ni turin i inphahhniam ṭhin ang u.

Mi nena kan inkawm rêng rêngin thu sawitu zawk nih kan tum tlat chhung chuan keimahniah hahdamna an hmu lovang. Mi thusawi ngaih sak a, inhawng taka kan lo ngaihthlak sak chuan, an rilrua an vei rûk zawng zawng nen an inbun chhuak ang a, an ritphurh kan lo chhâwksak a lo ni dawn a ni.

Mahni chhungte thu aiin mi dang thu awih hi nuam kan ti zawk a, kan dik lohna pawh chhungkuaah ai chuan mi hrang lakah kan puang duh zawk fo ṭhin; heihi mihring zia a ni. He ti hi a nih avangin ritphurh inchhawk tawn turin Lalpan min lo siam reng a ni tih hi i hre thar leh ang u.

“Ngaithlatu ṭha chu Counsellor ṭha a ni.”

[adToAppearHere]

Leave a Reply

Your email address will not be published. Required fields are marked *

error: Content is protected !!