Rinawmna – Sermon

-Upa K. Zalawma

“I tuar tûrte hi hlau suh; ngai teh, fiaha in awm theih nân Diabola chuan in zînga mi ṭhenkhat tân inah a khung dâwn che u a ni; tin, ni sâwm hrehawm in tuar ang. Thih thlengin rinawmin lo awm rawh; tichuan, nunna lallukhum ka pe ang che.”
(Thu Puan 2:10.)

Kan changthlan hi Smurna khuaa kohhranho tirhkoh hnena Lal Isua sawi a ni.

Smurna:
Smurna khua hi Ephesi hmar lama awm a ni a, infiamna hmun mawi tak a awm a, “Asia ropuina ( The glory of Asia) tia koh a ni. B.C 627 khan Lydianhovin an tichhia a; Alexander-an khawpui chhia chu a siam ṭha a, a thih hnuah peih fel a ni an ti.

Smurna khua hi Asia khawpui mawi bera sawi a ni a. A in sak mawizia te, kawtthler mawizia te chu a hmingthang hle a ni. Science zirna te, damdawi zirna hmun te a awm a. Zu pathian (the god of wine) temple an sa an ti.

Smurna-ah hian Judaho an tam hle a, Kristiante an hmusit ṭhin hle a ni. Tunah chuan Turkey ram khawpui pawimawh tak a ni.

Smurna hi Rom sawrkar laka rinawm ber te zinga pakhat a ni a. Kaisara biakna temple pawh an din nghe nghe a ni. Polycarp-a, Smurna kohhran hruaitu (bishop) chu Kaisara Pathiana a biak ve duh loh avangin he khuaah hian tihhlum a ni.

Polycarp-a chu hâl hlum tûrin an man a, duh sela chuan a tlan bo daih thei a. Mahse, rinawm taka a Lalpa tâna awm chu a duh zawk avangin a inmantir ta a. Hâl hlum tûra an hruai lai chuan roreltu chuan Krista phatsana, Kaisara be zawk turin a thlĕm a. Polycarp-a chuan, “Kum 86 chhûng a rawng ka bawl tawh a, ka Lalpa hi ka chungah ṭha lo takin a la awm ngai rĕng rĕng lo, engtin nge ka Lalpa, Chhandamtu chu ka sawichhiat theih ang le”? tiin a chhâng a ni. “Thih thlengin rinawmin lo awm rawh” tih thu chu Polycarp-a hian a zâwm hle mai. Polycarp-a thih hun lai hi A.D. 155 vĕl a ni a. Thupuan bu ziak hnu kum 58 emaw, 60 emaw vĕl a ni ang.

Smurna kohhran hnenah chuan Isuan, “Hmasabera leh Hnuhnûngbera, thia lo nung leh ta-a” tiin a insawi.

I tuar turte hi hlau suh:
Judaho tihduhdahna leh hmuhsitna an tuar mĕk a. Rom sawrkar tihduhdahna pawh an tuar mĕk bawk. Tuar tûr an la nei zĕl dâwn bawk a, “Hlau suh” tia fuih zĕl an ngai a ni.

Tunlai ringtute pawh hian tihduhdah te, sawisel leh sawi chhiat te kan tâwk ve fo ṭhin. Krista leh a Kohhran tân hrehawm tuar chunga thawh leh rawng bawl zĕl a ngai. Heng tuar peih lo leh hming chhiat/sawichhiat leh chân hlau kan awm em? Lal Isuan, “I tuar turte hi hlau suh,” min ti a nih hi.

Fiaha i awm theih nan:
Tihduhdahna an tuar mĕk leh an la tuar tûr chu ringtu an nih vâng chauh a ni a, Lalpan a fiahna (a tâna an rinawm theih nân) a ni tih a sawi a ni.

Kan rinawm leh rinawm loh hriatna ber chu tuar peih leh peih loh hi a ni ṭhin. Mi rinawm chuan engkim tur a huam ṭhin. Lalpa leh A Kohhran tâna rinawm tur chuan mualpho, chân leh tuar peih a ngai a ni.

Thih thlengin rinawmin lo awm rawh:
An tuarna chu Pathian hriatpuina leh phalna hnuaia tuar an nih avangin rinawm taka tuar chhuak tûra fuihna a ni. Lalpa thu ṭantu chu thih thlengin a rinawm tur a ni.

Tun laia Pathian rawng kan bawlna leh kan inpĕkna kawngah pawh hian, Lalpa hriatpui leh a duh zawnga ti kan ni em tih hi a pawimawh hle. Rawngbawltua thlan leh ruat kan nihna pawh hi lamṭang atân mai thlan leh ruat kan nih chuan, Pathian koh leh ruat kan tling lo vang a, Pathian rilru pua thlan leh ruat kan nih pawhin, kan lo pawm dân rilru kha mihring taka lansarh duhna rilru pua pawm leh thawk kan nih chuan, thihthlenga rinawm taka rawng bawl hi kan hlen zo lo ang.

Upate pawh hian min thlangtu Kohhran enkawl ai chuan mahni hna leh duh zawng avangin kan Upa rawngbawlna tur Kohhran hi kal san tawk kan awm fo ṭhin.

Rinawmna tihin a tum tak chu, Lal Isuan Petera hnenah, “….i kutte i phar ang a, mi dangin an hrĕnsak ang chia, i duh lohna lamah an kai ang che,” a tih ang nun kha a ni.

Nunna lallukhum:
Smurna khua hi infiamna hmun a ni a, a chak apiangten lallukhum/chawimawina an khum/dawng ṭhin.

Chutiang bawkin Kristiante chu tihduhdahnaah pawh, ni tina kan rinna nun kawngah pawh a tawp thlenga rinawm taka tuar chhuaktu chuan lallukhum an khum dawn a ni. Lallukhum khum tih chu ‘Chatuan nunna’ tih ang a ni. Lalpa avanga tuar chhuakte chuan chatuan nunna an chan turzia sawina a ni.

Kan mihring duhna kalsan a, min kotu duh zawnga thih thlenga rinawm taka nun hi ‘Nunna lallukhum’ channa tur chu a ni a, chu chu ‘mi rinawmte’ hnenah Lal Isuan a la pe dâwn a ni.

“Thih thlengin rinawmin lo awm rawh,
Tichuan, nunna lallukhum ka pe ang che.”

Leave a Reply

Your email address will not be published. Required fields are marked *

error: Content is protected !!