Rethei zawkte ngaihsak – Upa K. Zalawma

RETHEI ZAWKTE NGAIHSAK

Upa K. Zalawma

Tin, a sâwmtu hnênah pawh chuan, “Chhûnah emaw, zânah emaw ruai i ṭheh hunin i ṭhiante, i unaute, i laichînte, i vêng hausate chu sâwm suh ang che; chuti lo chuan, an sâwm ve leh ang chia, an rûl leh kher ang che. Ruai i ṭheh hun chuan pachhiate, piangsualte, kebaite, mitdelte sâwm zâwk ang che; tichuan, chûng ang chuan rulhna tûr che an neih loh avângin i eng a thâwl ang; mi felte thawhleh hunah rulh leh i ni dâwn si a,” a ti a (Luka 14:12-14.

Ruaiṭhehtu hnena thuràwn :
Lal Isuan ruaiṭhehnaa tel tûr tâna thuràwn a sawi zo va, tunah chuan a sâwmtu tân tute nge sàwm tur a sawi ve leh ta a ni. Sâwm lêtve theiturte chauh sàwm chu ruai ṭheh pawh a ni lo va, ruaiṭheh tak tak chu mi rethei, sâwm lêt ve thei lo tûrte hrai hi a ni. He thu hian mi lian, lainâ, ṭhiante leh mi hausate sàwm a khap bur chu a ni lo va, rulh leh beiseina rilru neia ruaiṭheh chu mi thil phal tih dân tur a ni lo va, mi tlâwmte sàwm tur a ni. Lâwmman hmuh beisei lova thil ṭha tih min zirtir a ni.

Juda Rabbi-ho zirtir dan chuan, “Thil pêk dan ṭha ber chu a petuin tunge a pêk hre lo se la, a dawngtu pawhin tú lak aṭangin nge a dawn hre suh se,” tih a ni ve bawk. Rulhna nei ve lote sâwmtu chu mi felte thawhleh hunah rulh leh an ni daw a ni – (Rev. Dr H. Lalhmangaiha.)

Ruaiṭheh : Hmânlai aṭangin lal ropui deuhte chuan ruaiṭheh hi an chîng a, an mite leh ram dang lalte sâwmin ni rei tak tak ruai an ṭheh ṭhin. Belsazzara pawh kha ruai a ṭhehna hmunah kut tumbungin banga thil a rawn ziak a hmuh kha (Dan 5:1-6).

[adToAppearHere]

Rom vanglai chuan an lalten Ârâwn pa thluakin ruai an ṭheh hial a ni awm e.

Mizote pawhin ruaiṭheh hi kan tih dan rêng a ni a, sechhun khuangchawi nikhuaah te, lungphun leh mo lawm niah te ruai kan ṭheh ṭhin. Tin, Vawkpa sûtnghâk talh niah pawh ruai kan ṭheh ṭhin. Heng ruaiṭheh ni hi chuan tumah sawm hmaih nei lo vin a khaw in tin an sawm chhuak vek ṭhin. Pasalṭhain sa a kah châng pawhin, a chan turin khaw chhunga in tin an sâwm vek a, a khawnâwtin sà kan chan ṭhin. Heng ruai ṭheh leh sachan niah te hian duhsak bik awm lovin mi tinin kan eiin kan chang vek ṭhin. Mi anglote hlei hlei hian nuam an ti a, rethei deuhte phei chuan mi ruaiṭheh hi an sa ei ve phâk tâwk a ni ṭhin a, ruaiṭheh hi an thlahlel hle ṭhin. Hre lovin Lal Isua duhzâwng kha kan lo nunpui ṭhin a lo ni.

Tunlaiah chuan sâwm bik kan ni ta deuh vek mai a, ran talh pawhin kan hralh vek zel ta mai.

1. Min hmangaihtu, kan chunga ṭhate chungah chauh ṭhat kan chhuah hi Pathian rawngbawlna a la ni lo:
Ei leh in buatsaihnaah te, mi dang kan khâwm nikhuaah te mi lian leh chhungkhat laina te leh kan ṭhian ṭha zualte sawm hi kan tlin tâwk a ni ta fo mai. Pathian rawngbawlna tak tak chu min rùl lêt thei lo tûrte leh pachhiate leh retheite chunga thil ṭha tih leh ṭhat chhuah hi a ni.

2. Mirethei zawk leh rualbanlote chunga kan hmangaihna thiltihte hi Pathian rawngbawlna a ni : Zoram buai vanglai – 1968 kum bul têah khân thingtlâng khua, India sipai duh tâwka an hrânna hmun aṭangin chawlhni kawr pawh nei lovin Kolasib-ah kan tlân lut a, ṭhenawm khawvêngten an thuamhnaw hâk lai min pe khâwm a, kan chhûngkuaah khân beisei tûr a awm lo chiang hle mai.

Kan tlâkchhamna min rawn phuhrûka min tuam mawitute khân Pathian hnên aṭangin lâwmman an dawng ngei ang.

Kei thingtlâng khaw Senior Dept.-a Secretary ni lai ve ngat kha, Dawrkai lian Pu Sawivela khân Kamis thar min lo pe mai leh, Diakkawn YMA hruaituten rizai thar min lo pe mai chu, chhungkyaa pawnpui inzâwna mu ṭhin kha mahniin ka’n riak hrang ve a, mi kawr hâk ang hain ka’n inkhawm ve thei ta a nih kha. Lalpa rawngbâwl an va ni tehrêng em!

[adToAppearHere]

Keinin kan ei duh loh te, kan sin kan hâk duh loh te, kan pheikhawk bun duh lohte hi mi rethei zawkte chuan an lo mamawh em em ṭhin asin. Kan ran ei atân tia ration buhfai kan lâk ṭhin te hi mi ṭhen kat chuan an lo kham khawp lo nasa mai. Kan duh lai ngei mi dang han pêk te hi a va hlu leh zual em!

Rualbanlote hlei hlei hian buhchangrum leh sa te hi an lo râwp a, Pu Thangkhuma (Ipte puara) thusawi ka la hriat reng chu, 1968 kuma Krismas kan hmannaah – “Kolasib leh Vairengte inkar hi vawk thauin khat tlat se la, ka kalna tûr chu ka ei kaw tho tho ang,” tiin vawk thau tui a tihzia a sawi kha a ni, a râwp khawp tihna a ni.

Nei leh neite induhsak tawn mai a tawk lo va, nei lo leh harsate chunga hmangaihna thiltih ngei hi Pathian rawngbawlna chu a lo ni.

3. Mi rethei khawngaihtu chuan Lalpa hnen ata lawmman a hmu ang:
Kan chângthlan – _”…tichuan, chûng ang chuan rulhna tûr che an neih loh avângin i eng a thâwl ang; mi felte thawh leh hunah rulh leh i ni dawn si a,” Lal Isuan a tih hi hre rengin mi retheite hi i khawngaih ve ang u.

Tih tak takah chuan mi felte thawh leh hmâ pawh hian Pathian hian a duhzâwng titute chu a lo rûl leh nasa khawp mai. Sum leh pai hman ngai lova hriselna kan neihte hi a va hlu em! Thil hlû leh changkâng âwt lova lungawina Krista kan neite hi a man a va tam em!

Kan chhiat kan ṭhat nia min puitu zozaite hi Lalpa hmanrua, min rulhna thil tih a lo va ni em! Dik taka thil titu leh mi rethei khawngaihtu chu sum leh pai, in leh lo chenin Lalpa’n mal a sàwm ṭhin; mi felte thawhleh huna a rulh tûr la awm bawk si, Lalpa thupêk awih leh zawm hi a lo inchhir awm loh e.

Lal ruaiṭheh chu kîl turin,
In puan var chu sin ula;
Mo hruaitute an âu ve,
Inkhâwnvar tikhat ula,
In kal nân a êng lo’ng e.

Thlarau chau tân chawlhna in nuam, Van ruai ropui an kîlna;
Rilṭam, tuihâlte lût ula,
Chatuan lâwmna in hmu ang… (Rokunga.)

[adToAppearHere]

Leave a Reply

Your email address will not be published. Required fields are marked *

error: Content is protected !!