RAWNGBAWLNA HLEN – RAM LEH HNAMAH

K. Zalawma

Nang erawh chu engkimah fîmkhur la, hrehawm tuar la, Chanchin Ṭha hriltu lam hna thawk la, i rawngbâwlna kha hlen rawh. 2 Timothea 4:5.

Khawvêl êng in ni e. Tlâng chhîpa khaw awm chu thuhrûk theih a ni lo. Miin khâwnvâr hâlin hrai hnuaiah an dah ngai lo, a dahnaah an dah zâwk ṭhîn; tichuan, in chhûnga mi zawng zawng a ên ṭhîn. Chutiang bawkin in êng chu mi mit hmuhin êng rawh se; chutichuan, in thiltih ṭhatte an hmu ang a, in Pa vâna mi an chawimawi thei ang. Matthaia 5:14‭-‬16.

Ringtute chuan kan ni tin khawsakna mamawh leh hmasawn zêlna tur kan ngaihtuah chung hian, kan hmaih theih hauh loh tur chu ‘Lalpa Krista rawngbawl hna dam chhunga thawk tur kan ni tih hrait reng’ hi a ni. Lal Isuan, “Thih thlengin rinawmin lo awm rawh, tichuan nunna lallukhum ka pe ang che (Thup 2:10b),” a tih kha.

Mizote hian ‘Ram leh hnam’ tih phrase hi kan uar hle mai. Hei hian Politics leh Sakhua leh Culture a huam turah ngai ila. Ringtuten Pathian rawngbawlna kan hlenna tur point thum lek lo sawi ila:

1. Politics lamah: ‘Politics’ tih chu a tawi zawngin ‘Ram awp dan ngaihtuahna, Ram rorelna’ kan ti thei ang. Pathianin mihringte hi leilung luah khat turin min siam a (Gen 1:28), ro inrèla inawp khawm tur kan ni. Khawvel sorkar hrang hrang inawp dan leh rorel dan a in ang vek lo va, tuna kan sawi tum hi chu kan Mizo ram chhûng bik leh Kristian kan nihnaa kan tih tur lam a ni ang.

Ram kan tih hian a leilung leh a chhunga cheng mihringte a huap vek a ni. Kan ram inrelbawlnaah hian Party sorkarna hmangin kan kal avangin a chhunga cheng mihring tam berte hi party member-ah kan awm a, hei hi thil sual a ni lo. Amaherawhchu, politic kan khelhna rilru hi a dik a ngai thung a ni.

Kohhrana chanvo neih chauh hi rawngbawltu nihna a ni lo va, ram leh hnam huapa mawhphurhna emaw, member emaw kan nih tawh chuan, kan thiltih leh kan awmna apiangah Pathian thu leh a duhzawnga rorèl leh thiltih hi kan rawngbawl hna chu a ni zel zawk a ni.

Kan ramin hmâ a sâwn a, mipuiin kawng tinrênga hmâ kan sâwn theihna leh inlungrualna kan neih theihna bul chu Pathian hre reng chunga dik taka engkim tih hi a ni a, kut tling lova thil neih leh rorelna fel lo te, mahni in haivura mi dang chanvo tur lak sak te hian rawngbawlna a tihmelhem ṭhin.

Ram leh hnam rawng bawlna hi Lalpa duh zawngin i hlen zel ang u.

2. Sakhuanaah : Mizo ramah hian Kristian sakhaw vuan kan tam ber a, sakhaw dang bia pawh engemaw zat chu an awm. Eng sakhua pawh hian sualna lam chu a zirtir ngai lo. Kristian zingah pawh Pâwl hrang hrang kan awm. Kan awmna pâwl chhûngah Lal Isua hnung zuia a zirtirna anga nun hi ‘Rawngbawlna’ chu a ni mai.

Kohhran khat chhûngah pawh Pawl ‘Fellowship’ hrang hrang kan awm leh a, kan awmna pâwlah member rinawm leh taima kan ni tur a ni a, pâwlin tihtur a tih ang ang tih zêl kha ‘rawngbawlna kan hlen dan’ pakhat chu a ni.

3. Culture-ah: Culture tih hi ‘Hnam zia, nunphung’ tihna a ni ber a. Hnamtinin zia leh nunphung kan nei ṭheuh ang. Kristian kan nih hmaa kan nunphung leh zia, Kristian zirtirna nena inmil chu chhunzawm a, a inmil lo lai erawh chu kalsan ngam a ngai ṭhin.

Kan Mizo Culture-a tlawmngaihna te, aia upa zahna te, nu leh pa te
thuawihna te, ṭanpui ngai ṭanpui te kha Kristian Culture nen a in mil em em a, chhawm nun zel chi a ni.

Kan Culture-a puithûna âtthlâk thil leh ramhuai leh lasi thawnthu mai mai te, zû leh khawvel thila hlimhlawp bâwlte hi Kristian Culture nên a inmil lo va, kalsan ngam a ngai.

Kûtni vângthlà hmanga nun hlui thil chi hrang hrang apply thar leh ṭhin te hian Kristian nun leh rawngbawlnaah hmasawnna a thlen lem lo. Culture hlui humhim nana show neih bâk a, a taka kir leh duha Missionary-te thleng thlenga dem duhna rilru leh thinlung put te hi Lalpa leh Krista rawngbawlna kawng tur a ni lo vang. Kristian nun chuan Krista zirtirna nena inremin hnam nun leh zia chawikânga siam ṭhain a tihmasawn zawk tur a ni ang.

Hetiang hnam nunah hian ringtu inti mi tam tak chu kan la tâng a, ṭhalaite phei chu ruih hlo leh tisa châkna sualin min bawhbet nasa em em a ni.

Heng hnam nun ṭhalai chawi kàn zêl leh a ṭha lo lai siam ṭhat hna thawh hi ‘rawngbawlna pawimawh’ tak a ni.

Kan ram leh hnam siam ṭha tur hian ‘Tlawmngai Pawl’-ten nasa takin ṭan an la a, Kohhran mite pawhin tisa leh thlarau nun siam ṭha turin kan ṭawiàwm ve a ngai a ni.

Tuna kan tih mêk bâkah Tualchhûng Kohhranin kan mi leh sate, Biak In leh Kohhran thiltiha lang ngai lo te, ruih theih thil tia khawvel nuna in hmang ṭhalai tamtakte hnên thleng pha rawngbàwlna lamah ṭan laa huang zauh a va ṭul êm!

He mi lam rawngbàwlna atân hian Counsellor rawih hi a ṭha khawp ang. Mi, harsat rûkna neite bei tûr hian huhoa bawh ngawt aiin fianriala kawm a hlawk zâwk ṭhin a ni.

Lal Isuan, Khawvêl êng in ni tiin tlâng chunga khaw awm, thuhrûk theih loh angin ringtute chu min sawi a, tlâng chunga khaw awm chu ralkhat aṭang pawhin a hmuh theih ṭhin. Chutiang chuan
Politics lama kan nihnaah te, Sakhaw rawng kan bàwlnaah te, kan hnam nunphûng kan humhalhna leh ram leh hnam siam ṭha tura kan beihnaah te miin keimahniah Lal Isua hmêl hmu thei zêl rawh se.

Hemi lama Lalpa Krista rawng bâwl kan nih hi i theihngilh lovang u khai, kan rawngbâwlna hi chawlhsan mai lovin i hlen zêl zâwk ang u.

 

RAWNGBAWLNA HLEN  – CHANCHIN ṬHA HRILAH

Nang erawh chu engkimah fîmkhur la, hrehawm tuar la, Chanchin Ṭha hriltu lam hna thawk la, i rawngbâwlna kha hlen rawh.
2 Timothea 4:5.

Tin, rinna leh Pathian Fapa hriatna kawngah, chuan thu khat vuaa, puitlinga, Krista famkimna lenzia tluka kan zaa kan lo awm hma loh zawng, rawngbâwl hna thawk tûra mi thianghlimte tihfamkim nân, Krista taksa siam ṭha tûrin ṭhenkhat chu tirhkoh atân te, ṭhenkhat chu zâwlnei atân te, ṭhenkhat chu Chanchin Ṭha hriltu atân te, ṭhenkhat chu kohhran châwmtu leh zirtîrtu atân te a pe a.
Ephesi 4:11‭-‬13.

Kohhrante hi rinna leh Pathian Fapa hriatna kawnga thukhat vuaa puitling a, Krista famkimna lenzia tluka kan awm hma chuan, mi thianghlimte famkim nan, Krista taksa (Kohhran) siam ṭha tura rawngbawlhna hrang hrang pêk kan ni a, chu rawngbawlna chu hlena a awm hma chuan thawk zêl tur kan ni. He rawngbawlna hi hlen chhuak tur chuan fimkhur a ngai tih pawh hriat reng tur a ni.

Krista Chanchin Ṭha hrilna kawngah hian mawhphurhna hrang hrang pek kan nih thu Ephesi 4:13-ah hian kan hmu a, chungte chu:

1. Tirhkoh atan: Heta tirhkoh tih hi Apostles tih a ni a, Kohhran ṭiak tir phuntu leh enkawltute an ni. Calvina chuan, “An hna chu khawvel puma Chanchin Ṭha hril a, kohhran phun a, Krista lal ram zauh a ni,” a ti.

Vawiin thlengin he hna hi mi tam takte chuan an la thawk reng, chung mite tana ṭawngṭai leh thilpêk lama lo ṭan ve hi kal chhuak ve lo te rawngbawlna tur a ni thung.

2. Zawlneite:
Kohhran tlawha vak kual ṭhin an ni. In leh lo, chhûngkua leh eizawnna an nei lo va. Zâwl thu hrilhlâwkna puan lam aiin thuhril chhuah lam an ti zâwk mah. An thuchah chu chîk taka zir leh chhût chhuah ni lovin Thlarau Thianghlim pêk a ni.

Zâwlnei nihna hi Lal Isuaah a lo thleng famkim tawh a, Lal Isua Chanchin Ṭha thuin mi tin hnena lalna a chan theih nan leh, vawiina kan nun dan hian nakin huna kan awn dan tur Biblein a lo sawi lâwk tawh mite hriattir zel hi kan rawngbawl vena tur chu a ni.

3.Chanchin Ṭha hriltu/Thuhriltu:
Evangelist te pawh kohhranhote tlawha zin kual ṭhin an ni. Chanchin Ṭha hrila vâk missionary te tia sawi theih an ni bawk ang. Paulan Timothea chu, “Chanchin Ṭha hriltu lam hna thawk la” a ti a ni (Tim 4:5). Khawvel ram tina hre lote hnêna Krista chanchin hril turte an ni. Calvina chuan, “Chanchin Ṭha hriltute kan nei hi Krista vang liau liau a ni,” a ti a. Evangelist-te hi kohhrante tân Pathian thilpêk an ni.

Tunlaia kan ṭhalai tam takte ruih hlo leh nawmchennain a chimpil mêk lai hian, Krista ram zau nâna thawk tûr thuhriltu engzât nge lo pên chhuak ve ang le?

4. Kohhran chawmtu (Pastor) leh zirtirtu te:
Heng hming chi hnihte hi hmer kawp an ni ṭhin. Kohhran ṭiak tîrah chuan thuziak leh lehkhabu a la awm lo. Khâwla chhut chhuah phei chu kun 1400 hnua lo lang chauh a ni. Hma takin tirhkohte khân Isua chanchin an lo zirtir a. Ṭawngkaa zirtirin an lo khâwl khâwm zârah ziah tur a awm a ni. Zirtirtu leh Pastorte hi mi thuhmuna ngaih an ni tlangpui a. Calvina erawh chuan a pawm zân lo.

‘Kohhran châwmtu – Pastor’ tih hi Latin ṭawnga Berâmpu sawina a ni. Kohhran ṭiak tîr chuan berâmpu anga uluk taka enkawltu a mamawh a. Isua ngei pawhin a mite tân “Berampu ṭha ka ni” a ti (Jn 10:11,14).

He lai thua kan hmuh bâkah hian Kohhran Upate hi rawngbawl tura Pathianin kohhrante a pek an nih thu hmun dangah kan hmu thung.

Kohhran tâna Pathianin thilpêk hrang hrang a pêk chhan te:
1. Rawngbawl hna thawk turin:
Grik ṭawnga, diakonia a hman avangin kuta thawh lam chi sawina niin a lang. Thu mai ni lova kohhrana mi harsa leh chanhaite chhawm chhuah hna thawh hi a ni.

2. Mi thianghlimte tih famkim nân:
Ringrute hi ‘mithianghlimte’ tih an ni ṭhin. Tih famkim tih awmzia hi – nih dân tur nihtîr, siam ṭha, thlarau chau tungding, rinna lama tlâkchham phuhrûk tihte a ni. Robinson-a chuan, “Mi thianghlimte an hna chanpual tlâk/hlen tura tiphuisui (fit),” tiin a sawi.

3. Krista taksa siam ṭha turin:
Mahni inhaivûr nân ni lovin, kohhran mimal tinin an tih tur tiin thlarau lama intichak tûra rawng inbâwlsak tawn theih nân rawngbawltu pek a ni. John Calvina chuan, “Krista taksa pêngte zîngah mi dangte puihna lo chuan tu mah mahni mamawh phuhrûk kim thei an awm lo,” tiin a sawi fiah a ni.

Kohhran din tirha an mamawh kha vawiinah pawh kan mamawh a la ni reng a, rawngbawltu pawh ringtu kan tam ang zelin kan pung ve zel bawk. Khawvel a tawp hma loh chuan Krista rawngbawlna hi chawlhsan tih a awm dawn loh avangin Pathianin a Kohhran hmanga min hûnna hmun apiangah taima takin i thawk zel ang u.

Engkimah fimkhur tur:
“Nang erawh chu engkimah fîmkhur la, hrehawm tuar la, Chanchin Ṭha hriltu lam hna thawk la, i rawngbâwlna kha hlen rawh”(2 Timothea 4:5.) tia Paulan Timothea a fuihna hi a la pawi mawh reng. Mi sawiselna aiin mi fakna te chawimawina te hian chapona tlângah min dintir fo va. Rualawhna te, khawvel ropuina leh hausakna, nawmsak leh sum leh pai îtna hian kan rawngbawlna a tihnufûm thei bawk. Mahni inkhawngaihna leh kan rawngbawlpuite aia ngaihsak loh bik nia inhriatna hi sualin a hmang duh viau bawk.

Chuvangin, kan rawngbawlna hlen tura kan tlânna kawngah hian fimkhur taka kan kal a ngai tih i hre reng ang u.

“Nimahsela, ka tlansiakna kawng ka hmabâk hlen tur leh, Pathian khawngaihna Chanchin Ṭha hriattir tur, Lalpa Isua hnen aṭanga khami rawngbawl hna ka hmuh kha thawk zo phawt ila, ka nun pawh thlakhlelh tlâkah ka ruat lo ve..”(T.T 20:24).

Kristian kal fimkhur rawh hlauhawm a hnai,
Hemi khawvela i awm chhûng zawngin;
Setana thlêmnain i vêl a dâp,
Setana hneh nân i Lalpa dîl rawh.

Leave a Reply

Your email address will not be published. Required fields are marked *

error: Content is protected !!