RAWNGBAWLNA HLEN I-NA

K. Zalawma

Nang erawh chu engkimah fîmkhur la, hrehawm tuar la, Chanchin Ṭha hriltu lam hna thawk la, i rawngbâwlna kha hlen rawh. 2 Timothea 4:5.

A rulhna ro luah tûr chu Lalpa hnên ata in hmu dâwn tih hriain, in tih apiang chu mihring tân anga ti lovin, Lalpa tân anga ti zâwkin, châk takin ti rawh u; Lalpa Krista rawng in bâwl a nih hi. Kolossa 3:23‭-‬24.

Rawngbawlna : Rawngbawlna tih hi a sapṭawng lamah chuan ‘Ministry’ tih a ni a, Rawngbawltu tih chu ‘Minister’ tih a ni. Ringtuten Lal Isua Chanchin Ṭha hril leh a Kohhran hna kan thawk hi “Rawngbawl (Serve)” kan ni.

Kohhran ṭhenkhatah chuan rawngbawltu hi kan dinhmun a inchen lo va. Minister kan tihte chu Pathian thu zir a, Pastor hna thawk thei tura nemnghehte hi an ni. A pakhat leh chu dam chhunga thawk tura nemngheh Kohhran Upa kan nei bawk. Upate hi chu ‘Laymen” an ti. Pension a awm ve lo va, hlawh an nei hek lova, Kohhran rorel leh kilkawi te, sum enkawl te kha an hna a ni.

An ni bâkah hian chanvo hrang hrang chelhtute hi ‘Rawngbawltute’ tih an ni leh a; a nihna takah chuan ringtu zawng zawngte hi kan phâk tâwk ang chin zêlah Pathian rawngbawltute kan nih vekna lai a awm. Ministerte hi chuan an aia hnuaia mite rawng an bawlsak a, Kol 3:34-a Paulan a sawite khi chu ‘Bawihte’ hnenah, an pute hna an thawk kha “Lalpa Krista rawng in bawl a nih hi,’ a ti. Mi zawng zawng hian kan hotu Pathian rawngbawl (serve) kan ni tih hi hria ila, bawihten an pûte zah tak chunga an hna an thawk angah inngai ṭheuh ila, kan chapo lo deuh ngei ang.

Hlen : Hlen tih chu “Thawk zo, tipuiling, tihlawhtling” tihna a ni. Chutichuan, ‘Rawngbawlna hlen’ tih chu Pathian leh a Kohhr an tana kan tih theih tawk anga a tâwp thlenga tih zawh kha a ni mai.

Rawngbawlna hlen – Mahni chhungkuaah : Ringtute chuan Pathian rawng kan bawlna hmasa ber chu kei mahni inchhungah a ni.

(1) Nu leh pain fate enkawl leh zirtirna ṭha leh dika kaihhruai a, an mamawh thawhchhuahsak kha chhungkuaa an rawngbawlna a ni a, an tu leh fate enkawl leh zirtir hna kha an hlen ngei tur a ni.

(2) Ṭhalaite pawhin an thawh theih tâwk apiang thawh a, inchhûng leh compound tihfai te, khawsak rêl leh bungbel tihfai te hi rawngbawlna pawi mawh tak a ni a, nu leh pa chawm thei ngei tura eizawnna nei tura ṭan lâk tur a ni.

Mi thiamte chuan, kan dam chhûnga kan thlen chin tur, kan nih tur ang chu kum 30 kan nih hian kan thleng tawh an ti a. Chu vangin Teen Ager kan nih lai ngei hian Pathian leh a Kohhran lama kan nih tur ang ni turin duhthlanna leh tum tlatna neih fel ngei tur a ni.

(3) Naupangte pawhin nu leh pa thu awih a, taima taka school kal leh tih theih ang tawka inchhunga tih tur hrang hrang etc. hmunphiah, thleng sil etc. te tih ve ṭhin tur a ni.

Chhungkua rêng rêng ṭawngkam ṭha leh hawihhawm taka in biak ṭhin a ṭha a, Buhfai ṭham leh chhunginkhawm thlahthlam miah loh tur a ni.

Sum leh paiah rinawm tur a ni a, mahni thawh chhuah loh îtna lakah in ven fimkhur a ṭha. Heng zawng zawng hi Pathian thu nen a inrem a, Lalpa rawng kan bawlna chi khat a ni tih hriat reng tur a ni.

Mahni chhungkuaa rawngbawl ṭha lo chuan, khawtlâng leh ring lo mite hnenah rawngbawlna ṭha a hlen chhuak thei lo vang.

Leave a Reply

Your email address will not be published. Required fields are marked *

error: Content is protected !!