Ramsa chunga tih thiang lo te – Ramsa chunga puithuna

RAMSA CHUNGA TIH THIANG LOTE

Mizo pi ieh pute chu ramchhuah hratin sa leh sava chungah kuthlei viau ṭhin mah sela kawng lehlamah chuan sa chungah pawh puithuna hrang hrang an nei a. Sakah thiang lo khawih an duh loh thil tam tak a awm a, chungte chu chhura buh thlirin i lo thlir thuak thuak ang:

Vapuai no chawm lai reng reng tihhlum an duh ngai lova, sahuai an sawisa ngai lova, sahuai sawisa chu an thih hunah an thi ṭha thei lova, rei tak hreawm tuarin an awm ṭhin an ti. Hemi a nih avang hian mi ṭhenkhat phei chuan a sa pawh an ei duh ngai lo. Hauhuk hi nupaa khawsa, inhmangaih leh inngai em em, ram chin neia ngawpuia khawsa ṭhin an ni a, ramsa an serhte zinga mi a ni a, an tihlum duh mai mai lova, an tihlum duh lo hulhual phei chu a ni lo. An tih hlum pawhin pakhat zawkin mi a chhiat loh nan a pahnihin an that ṭhin. Tin, tumpang khawfang an tihlum duh ngai lova. Ṭhenkhat chuan saza pawh hi an kap duh ngai lo. Saza kah chu kut a chawi duh an ti a ni. Sakei hi a chhan leh vang ṭha tak awm loin an tihlum duh ngai lo a, Fanai ieh Pawi ho phei chuan an that thiang lo a, Pathian ang deuha enin an zah em em mai  a ni. Sakei chu falin lo delh hlum pawh ni se tuibur an theh a, a ruang hlawmnaah pawh an tel ve duh lo. Heng te a nih vang leh amah hi a hlauhawm em avang hian ramhnuaiah phei chuan a hming lam ringawt pawh an hreh a, sawi a ṭul hunah pawh ‘sakei’ ti loin ’sapui’ an ti ṭhin.

Sa han kah emaw, han awh emaw te, ramsa lama kut hmui mi nih chu mi tin chak ṭheuh a ni na a, Mizo danah nupuite ruah loh lai chuan sa chungah eng mah an ti duh ngai lo thung a. Sa kawchhung hai takngial pawh an serh ṭhin. A chhan chu upain chuti ang thil khawih chu fate pian a fel duh loa an hriat vang a ni, ‘Kutchuk’ awm chhanah an ngai bawk. Heng ramchhuah leh sa beih chungchanga Mizo pi leh pute puithuna hrang hrang han thlir hian Mizote chu hnam puithu tak niin a hriat a ni.

(Mizo ramchhuah dan chanchin full text page-ah hian chhiar tur a awm)

About the author

Leave a Reply

Your email address will not be published. Required fields are marked *