Raltiang ram – Rin Sanga (Rokunga hla) – Raltiang i kai ve ang

RALTIANG  RAM  

– Rin Sanga

(He article hi ‘Thu leh Hla’ chanchinbu June,2016 a chhuah aṭanga lak a ni a, B.A Mizo zirlaia a awm avangin leh he thu ziaktuin a thil thlir dan hi a ṭhat em avangin ṭhahnem ngaihna thilah zirlaiten an lo chhiar ve atan he huangah hian seng luh a ni a, chanchinbu neitute leh article ziaktu chungah an mi hriatthiamna kan ngen hmasa a ni e)

Bible-ah chuan, “‘heta hi’ emaw ‘saw ta saw’ emaw an ti hek lovang; ngaiteh u, Pathian ram chu in zingah a awm a ni,” tih kan hmu a. Pu Rokunga ‘raltiang ram’ ve thung chu kan zinga a la awm miau loh avangin “saw ta saw” (raltiang ram saw) a tih a ngai a ni. Kan la ban phak si loh raltiang ram duhawmna leh kan hmabak a nihzia si tih lam kan chhui zel dawn a ni. Pu Rokungan Zoram a thlir dan chuan, “a luikawr dung leh a tlang mawi, a thing zar mawi ṭhuvate zai remna” maiah duh tawk lovin, a chhunga cheng Zofate nunkhaw nawmna leh hmasawnna tluantling awmna ram thlenpui chu a ‘goal’ pawimawh ber a ni. Rev. Dr. Thanzauva pawhin Pu Rokunga ‘vision of Mizoram’ a sawinaah chuan, “Hal loten lungruala dar ang kan lenna” a tih hian khawtlang inrem, ṭang rual leh lungrual taka hmasawnna ram a thlir a… Mizo khawtlanga a beisei (vision of society) chu dik tak, inremtlang, hmasawn, nuam leh kumhlun society a ni,” a ti. (‘Mizo nih tinuamtu ROKUNGA’ p. 340, First Edition 2008) A dikzia chu sawi nawn a ngai awm lo ve.

Pu Rokungan Mizoram tana ‘vision’ (hmathlir) a neih duhawm lai bera ka hriat chu, ‘Raltiang ram’ hlaa a puanchhuah ‘development formula’ hi a ni. Chu chu ‘hriatna, thiamna, finna ram saw,’ a tih hi a ni. He hla hi kum 1944, Indopui Pahnihna boruak rit takin Mizoram leh a chhehvel ram a tuam lai hun, hriatna leh thiamna lamah pawh ‘excluded area’ a kan awm lai hun, BA leh MA pass chin pawh kutzungṭanga chhiar tham lek kan nih lai hun a ni awm e. Hriatna leh thiamna dinhmun chhuanawm tehchiam lo, kan tawng mek chu a rilru leh thinlung mitthlaa en khumin, a duhthusam ram, raltiang ram chu fiah takin a hmu thei si a ni.

Hriatna: Pu Rokunga ‘development formula’ zinga hmasa ber, hriatna hi a zira zir thiam theih ‘knowledge acquisition’ emaw, ‘study of science’ emaw tihna a ni. Saphovin “knowledge is power” an lo tih mek angin, hmasawnna bul ṭan nana thil ṭul hmasa ber chu hriatna hi a ni awm e. A phuah hun laia hriatna (science) lama kan la pachhiatzia Pu Rokunga hian a hrechiang hle ni tur a ni. Rilru tihvarna, chhia leh ṭha hriatna fim neih, khawvel ningkhawng leh midangte changkan dan hriatna, dilchhut taka thil nihphung thlir thiamna leh lehkha thiamna kawng zawng zawng te hi hriatna ramri chhungah a rin luh theih awm e; chu chu Pu Rokunga pawhin a rilrua a tum a ni ngei ang tih a rin theih. Khawvel inlumlet hmuhnawm thlira thlir mai lova, a bul a bal hriat ve tak tak tumna neih chu hmasawnna rahbi hmasa ber a ni reng e.

Hriatna tluantling tel lo chuan hnam angin kan thleng thui thei lo ang tih Pu Rokunga hian a hre chiang hle ni tur a ni. Japanese-ho chuan ram hmasawn tura an bul ṭanna chu, kum 1868-a Meiji Restoration hun lai kha a ni a. Hriatna (science and knowledge) lama hmasawn a ṭulzia hriain, an ṭhalai rualte chu thiamna kawng hrang hrang paw chhuak turin, khawthlang ram changkangah an tir chhuak chum chum mai a ni. An han huapzau na laileng khawp a, western music leh fashion lam zir tur thlengin an ṭhalaite an tir chhuak a ni. Hetia Japan-ho an han insingsa chiam mai chu, ram changkang hmasate chuan an nuihzat deuh a ni awm e. Mahsc kum sawm tam a ral hmain an hriatna leh thiamna puakchhuah chu hmang ṭangkaiin, kum 1905 khan, chutih laia ram ropui ber pakhat Russia chu an tlawm ruah thei ta mai a ni. Khawthlang ramho anmahni lo nuihzat ṭhinho pawhin an hmui an chip hmak ta mai a ni awm e. Pu Rokunga hian 1944 lam daih tawh khan Meiji Restoration chanchin te hi a lo hre kiau tawh emaw tih tur a ni.

Thiamna a tih ve thung hi chu ‘technology’ emaw ‘skill development’ emaw tihna a ni; chumi awmzia chu hriatna (knowledge/science) te a taka chantirna (application of science to practical purpose) tihna a ni. Hriatna neih ringawt hian hmasawnna a thlen thei mai lo; chu thil chu a taka hman thiamna neih tel a ngai. Hei hi Pu Rokunga vision-ah hian rahbi pahnihna a ni. Kum eng emaw zat kal taah khan, (a kum chiah ka hre ta lo) TIME Magazine chuan Japanese-ho hi scientific invention lamah chuan hriat hlawh vak lo mah se technology lamah an sang hle, chu chu mi dang hmuhchhuah sa, a taka hman theiha siam chhuah lamah chuan tuma tluk loh turin an sang em em thung si a ni, tiin a sawi. Transistor radio, camera leh precision machines / equipments lama an sanzia chu khawvel hriat a nih hi! Chutiangin German-ho pawh an ni. Indopui pahnihna laia Jet engine siam chhuak hmasa ber an nih nghe nghe kha. Technology (thiamna) lama sang ram chuan Science (hriatna) lam chauha sang leh hriat hlawh ramte an lehpel ṭhin, ti ila kan sawi sual lovang e. Entir nan, India ram pawh Pandit Nehru-a te vanglai, scientific institutes an din chiam chiam hun lai, kawng danga ram changkangte hnunga kawl ek kan thai si lai hun ang te kha. Tuna kan State Sawrkar hrawn lai mekin ‘skill development’ pawimawhna changchawi nachang a hre ta te hi thil lawmawm tak a ni thlawt.

Finna: Hriatna leh thiamna inkawp ringawt hian hmasawnna tluantling a thlen kher lo; chu mai chu ni lovin, Pu Rokungan ‘finna’ a tih tel lo chuan hriatna leh thiamna hi a khingbaiin, hman sual theih pawh niin a lang. Pu Rokungan ‘finna’ a tih hi, mihring finna (intelligence) emaw human wisdom satliah emaw mai ni lovin chung lam aṭanga chhuak kaihhruaina, Pathian pek finna ngei chu a ni a sawi. Ama hla phuah dang, kum 1947 a a siam, “Ro min rclsak ang che” tih hlaa mi:

“F’inna ropui min pe la,
Ro min rel sak ang che.

I finna leh theihna leh
I hruaina lo rengin,
Ropuina leh lalthuthleng
An ral leh thuai si ṭhin,”

a tih hian a sawi chiang khawp mai. A ni taka, chunglam finna leh hruaina hnuaia awm lo ‘hriatna leh thiamna’ hi a kal sual pui theih tih entirna rcmchang tak chu, khawvcl Indopui II-na chawk chhuaktu Germany, Italy leh Japan ramte kha an ni. Heng ramte hian Nazism, Fascism leh Shintoism zirtirna leh kaihhruaina hnuaiah, ralthuam leh sipai chakna hmangin khawvel pum hneh an tum a nih kha. Science leh technology lama changkang ber ber ram an ni bawk, an chet fuh lai kha chuan tuma dan zawh rual an ni lo emaw tih turin ram an la duai duai mai a nih kha. Mahse a tawpkhawkah chuan, chunglam finna leh hruainaa innghat ram America leh Great Britain kaihhruai, ṭangrual ram (Allies) te chuan an lehthal chiang hle thung si a nih kha!

Chung hun lai khawvel kalphung leh international politics inlumlet dan te chu Pu Rokunga hian a lo hmu fiah thiam hle ni maw, Indopui II tawp hnua a hla siam, a chunga kan tarlanah hian a hmuh theih a ni. Kan ram inrelbawl zel dan tur kalhmang engmah a la chian hma si khan, ram leh hnam dinchhuahna tura thil pawimawhte chu Pu Rokunga hian a vision-ah a lo hmu lawk vek niin a hriat. A hun hnuhnung a hman thleng khan, kan ram inrelbawlna lama kan thlen chin chu ‘Autonomous District Council set up’ mai a ni. Mahse a thinlung ram erawh chu, chung hun laia nationalism spirit so sang tak chuan a chim pha daih si niin a hriat. Chu thil (nationalism) chu kum l966-ah a lo alh chhuak ta a nih kha. Hetiang thinlung puthmang nei tura hlaa mite thinlung leh ngaihtuahna chhem alhtu zingah Pu Rokunga hi a langsar pawl tak a ni awm e. Hun a kal zel a, a tak ram kan dai chin erawh chuan, a duhthusam ‘raltiang ram’ chu a thleng pha lo tulh tulh thung siin a hria a, a rilru a mangang hle thin ni tur a ni. A thih hma lawk kum 1969-a a hla siam hian a sawi chiang hie:

“Dar ang lenna khawpui,
Tlangkimah mawi mah la,
I nun a mawi lo;
I chhungah sualna doral ang a lian,
Dikna a fam ta, felna a tlawm ta,
Nun suar ang a chim;
Tham leh bawlhhlawhnaten tual an leng,
Awi maw a pawi em mai!”

Pu Rochamliana, Secretary, Rokunga Mémorial Society chuan, “Rokunga khan ‘Zawlkhawpui’ hi Mizo hnam pumpui aiawhtu ang deuhvin a tehkhin a ni thei a. ‘Zawlkhawpui’ lo tluchhe ta chu Mizo hnam tluchhe ta a sawina a ni thei,” a ti (‘Mizo nih tinuamtu ROKUNGA’ p. 287, First Edition 2008).

A ni taka, kan ramah hian chunglam finna leh theihnaa hruai ni lo, ‘lalṭhutthleng’ an ral tam ta malh malh hle; chu ‘finna’ a hruai ni lo ‘lalṭhutthleng’ luahtu nazawngte chuan ‘raltiang ram’ min thlen pui thei si lo a nih hi! ‘Raltiang ram saw’ kan tikumkhua mai dawn em ni ang?

Rokunga thlalak

4 thoughts on “Raltiang ram – Rin Sanga (Rokunga hla) – Raltiang i kai ve ang

  1. I have noticed you don’t monetize your site, don’t waste your traffic, you can earn additional cash every month.

    You can use the best adsense alternative for any type of website (they approve
    all websites), for more info simply search in gooogle: boorfe’s tips
    monetize your website

  2. Hi. I see that you don’t update your website too often. I know that writing posts is time consuming and boring.
    But did you know that there is a tool that allows you to create new posts using existing
    content (from article directories or other blogs from your niche)?
    And it does it very well. The new articles are high quality
    and pass the copyscape test. Search in google and try:
    miftolo’s tools

Leave a Reply

Your email address will not be published. Required fields are marked *

error: Content is protected !!