Ral a lian e khawvelah hian – Siamliana hla sawi zauna

RAL A LIAN E KHAWVELAH HIAN – SIAMLIANA HLA SAWI ZAUNA

-Lalrammuana Sailo

Siamliana chanchin tawi leh ‘Ral a lian e’ tih hla phuah hun:

Siamliana thlalak, Siamliana photo, Siamliana picture, Siamliana image
Hla phuah thiam Siamliana thlalak

Siamliana hi kum 1894-ah a piang a. 1918-ah a piangthar a, Pathian rawngbawltu Tirhkoh ni turin a inpe a. ‘Ral a lian e’ tih hla hi 1922-a a phuah nia hriat a ni. Tlangsang (Tripura) khuaah 1917-1931 chhung a awm a. 1921 aṭangin hla a phuah ṭan a. Tlangsang khuaa a awm lai hi hla a phuah runpui lai a ni. Lengkhawm zai chhuah nasat hunlaia Mizo hla phuahtu dangte ang bawkin a hlate chu ama phuah ni loin Pathianin a pek niin a sawi ṭhin a. “Ka nihna chu in hria a, Siamliana irawma chhuak a ni lova, Siamliana hmanga Pathian thiltih a ni a” (R.Thangvunga) a ti ṭhin.

HLA A PHUAH DAN

  • A lung a rawn leng em em a.
  • Fianriala awm leh ṭawngṭai a duh a.
  • A chang chuan leikapuiah puanin a inlukhup a, a mu a, a kut dinglam hi solfa vai ang hian a vai a vai a; chung lam arsi leh thlate khi ngun takin a en a, a mu ngai meuh lo. Hetiang hian nithum te a awm a, a nupui fanaute a ngaihtuah chang lo. He a awmdan hi a reh hnu chuan hla rawn nei a, a thluk nen a peih fel vek tawh ṭhin.
  • A chang chuan tu te emaw thusawi aṭanga hla phuah pawh a nei ve bawk.

RENG RAM (TRIPURA) A  KRISTIANTE DINHMUN

  • 1917-ah Tlangsang khua aṭangin Missionary H.K Dohnuna chuan Reng ram chu a bial a. Hetih hunlai hian hnamdang chu sawi loh, Mizo ngei pawh Kristian ni lo tam tak an la awm a. Kristian ni chhunte pawh an dinhmun a derthawngin khawvel thilah, zu hmun sa hmun nulat tlangvalna thilah an tlan nasa hle.
  • Siamliana hla phuah hun lai hian Reng ram hi ramthim mai ni lovin Kristianten tihduhdah an tuarna hmun a ni.
  • Tirhkoh ten thlenin an hmuh zawh loh chang a tam
  • 1920-ah chuan Reng sawrkarin kristiante hnawhchhuah vek a tum.
  • Tuikuk kristian za lai chu an lalin a um darh a, Mizoramah an lo lut.

RAL A LIAN E TIH HLA HRILHFIAHNA:

Chang khatna: ‘Ral lian’, ‘Setan ral lian’ a sawi hi sual leh a hnathawh, Kristianna ngaihtheihlohna leh kristiante tihduhdahna a ni thei a ni. Chutiang tihduhdahna leh thlemna karah chuan Pathian thlarauin a awmpuia a tihchak loh chuan Pathian tana ding ngam tur an awm dawn lo tih hla phuahtu hian a hria a ni.

Thunawn: “Hmanah zirtirte i thuam ang khan…” – Isua kha a thih hnu khan a zirtirte chu lungngai takin an awm a, mahse an hnenah Isua a rawn inlar a, Thoma pawhin Isua chu a tho leh ngei a ni tih a mit ngeiin a hmu a. Tin, Isua chuan vana a lawn hmain khawvel tawp thlenga an hnena a awm ve zel tur thu leh thil tih theihna nasa tak pek an nih thuin a thlamuan a. Isua a tho leh ngei tih an hriat avang leh a thu chahte avangin Zirtirte pawh rinna kawngah lo chak tharin martar hial huamin khawvel ram hrang hrangah chanchinṭha an pu darh ta a. Chuti ang chuan Siamliana pawh hian Pathian thlamuanna chan ve dilin a ṭawngṭai a ni. Pathian thlamuanna chuan harsatna karah pawh a tichakin a tihuaisen dawn a ni tih a hria a ni.

Chang hnihna leh chang thumna : Kristianten harsatna leh manganna, tihduhdahna emaw an tawrh changa an inhnemna ni fo chu an tuar aia nasaa Kraws-a Isuan a lo tuarsakna chu inhnemnan an hmang ṭhin a. Kraws thu chuan an rilru a luahin a hneh bik fo. Siamliana pawh hi an hun tawn avanga tuar nasa intiin lungngai viau mahse Isuan a lo tuar sak tawhna te a ngaihtuah chuan nep a inti a, Pathian hnenah an tana a tuar sakna te hrechang lo leka a lo awm avangin ngaihdam a dil niin a hriat a ni.

Chang lina : Pathian ram zauh turin leh Pathian-in a thisena a tlan sa ni si mahse Pathian hriatna la nei lo, Kristian la ni ve lote chu Isua lama hip a, an bona ram ata chhhanchhuahna hmanruaah Pathianin amah chu hmang ve se a duh a. Pathian thlarauin a awmpui loh chuan “sual ral lian”, harsatna leh thlemna a lo thlen hunah a hneh zawh dawn loh avangin Pathian chu amah tichak turin a au lawm lawm a. Harsatna hmunah hian Pathian rawngbawltute tichak leh thlamuan turin Pathianin Siamliana hi a hmang a ni.

 

Ral a lian e khawvelah hian lyrics – Siamliana

 

(Note: Siamliana chanchin leh Tripura rama Kristianna chanchin hi R.Thangvunga’n Siamliana hlate zirchianna a ziah ‘Mizo hla leh a phuahtute ‘ tih lehkhabu aṭanga lak a ni)

1 thought on “Ral a lian e khawvelah hian – Siamliana hla sawi zauna

Leave a Reply

Your email address will not be published. Required fields are marked *

error: Content is protected !!