R. Thankhuma Sailo (1936 – 2018)

KAN HMANGAIH EM EM PU R. THANKHUMA SAILO HRIATRENG NAN

Hming: R. Thankhuma Sailo
Kum – 82
Thih ni – Ni 12, September 2018
A nupui – Darkimi

Pu R.Thankhuma Sailo hi Lalchuanga Sailo leh Hmingthangi te inkarah ni 10 January, 1936-ah a lo piang a..Unau 9 zinga upa ber niin Ratu khuaah a seilian a. A unaute chu:

R. Thankhuma Sailo leh a nupui Pi Darkimi

1. R.Thankhuma Sailo H/O Darkimthangi, Dinthar II,Aizawl
2. Comm. Lalthanngura H/O Comm. Kaphliri, Tuikual, Aizawl.
3. Lalthangliana Sailo H/O Sanghliri, Ratu
4. Saingura Sailo H/O Zovi, Kanan Veng, Aizawl
5. Sailochhungi (L) W/O D.K. Manthanga, Govt. Complex.
6. Sailothangi (L) W/O Tluanga (L), Ratu.
7. L. Sanglura Sailo H/O R. Liannguri. Ramhlun South, Aizawl.
8 .Ngurzikpuii (L) W/O Halleluia, Ratu
9. Vanlalngheta Sailo H/O Vanlalnghaki, Ramhlun South

A duh tan he hla hi play pah theih a ni a. Thlalak hrang hrang kan dah lut e

Pi Darkimi nen hian kum 1957 April ni 24-ah Capt. Saibuangan a inneihtir a, an fate chu:

1. Saihmingliana Sailo H/o Laldinpuii, Vengthar, Kolasib
2. Ngurthanmawia Sailo H/o Lalropuii, Vengthar, Kolasib
3. Lalrinsanga Sailo H/o Lalṭhapuii, Vengthar, Kolasib.
4. Lallawmzuali Sailo
5. Lalhlupuii Sailo W/o K.Lalrohluna. Tlangnuam, Aizawl.

An tu leh fate nen

An nupa hian tu 14 (Mipa 8 leh Hmeichhia 6) leh Tuchhuan 13 (Mipa 8 leh Hmeichhia 5) an nei bawk. Pu Thankhuma hian kuthnathawk-a nu leh pate puih a ngaih vangin zirna lamah chuan pawl ruk thleng chauh a zir a. Mi taima leh themthiam tak a ni a, Ratu-ah chuan thing zai hmasa pawl tak niin thingzai in pawh a sa hmasa pawl an ni.

Kohhran rawngbawlna lam:

Pu R.Thankhuma Sailo hian a phak tawkah Pathian rawngbawl hna thawkin an awmna kohhran Salvation Army lamah theihtawp chhuahin a inhmang ve ṭhin a. Inkhawm kal hma tum tlat mi an ni a. Kolasib an awm laiin Vengthar Corps dintute zingah telin Corps Sergeant Major hmasa ber a ni a. Chanvo hrang hrang – Corps Council Secretary, Corps Treasurer, leh CSM nihna te an awmna hmun hrang hrangah a chelh tawh a. Sawrkar hna a thawh vanga an insawn kualna apiangah heng a chanvo chelh te hi pek ve zel ṭhin a ni. A boral ni thlengin  a lawina Dinthar Corps-ah Corps Sergeant Major (CSM) nihna a chelh mek a ni.

Vantlang rawngbawlna:

Mizo Union-ah Unit President, Block-ah Secretary leh Asst. Secretary hnate a lo chelh ṭhin a.Torch light hmanga inbiakna thiam a nih avangin khawtlangin an chhawr ṭangkai em em a. Kum 1955-a Ratu-a YLA din thar leh a nihna kawnga a bultumtute zingah a tel a. Ratu Branch YMA ah President -1965, leh Vice President (1965-1967) a chelh a, Rambuai khan Ratu-ah khawtlang hruaitu dinhmuna din kha a hautak em avangin President ni mai turin an ngen leh a, 1967 -1972 chhung chu YMA President hna a chelh leh ta a ni. Kum 1976 khan Central YMA aṭangin, ‘Hruaitu hlun chawimawina’ a dawng a. Dinthar MUP ah term hnih chhung Treasurer niin a boral thlengin Senior Adviser-ah an hmang mek a ni.

Sorkar hna:

Pu R.Thankhuma Sailo hi Postal Department-ah a thawk ṭhin a, a hna avangin 1975 March thla aṭangin Kolasib-ah awmhmun a khuar ṭan a, hmun hrang hrangah thawk kualin Mizoram khua hi tlawh loh a nei mang lo. Kum 1989-ah Aizawl Head Post Office-ah sawn a ni a. Kum 2005-ah a pension a. Aizawl Dinthar vengah an inbengbel zui ta a ni.

Dam lohnain a tihbuai dan:

Pathianin Pu Thankhuma a ven dan hi a makin a ropui hle a. Ratu-a an awm laiin Biak in chung chihnaah che sualin a tla thla a, a hnuai thutthleng delh tliak khawpin a insawh na a, mahse Pathian zarah a lo ṭha chhuak leh a. Kum 1991 a mit keh vangin thi mai tur anga ngaih a nih hnuah mite ṭawngṭaisakna zarah a dam ṭha chhuak leh a. Kum 2005-ah chuan a mit kawnga bawk awm chu cancer ni ngeiin an hria a, Kothari Medical Centre, Calcutta lamah tirh a ni a, bawk chu an lo paihsak a, a lo dam leh ta a ni. Hengah te hian Pathian chungah an lawm em em a, henga damlohna a tawh hnute phei hi chuan mite ṭhatzia a hmu chiang em em a, dam lo kan leh khawhar in kal te chu a tihturah ngaiin a theih ang angin midangte a kan kual ṭhin a ni.

Kum 2017-ah an nupa inneih kum 60 tlin an lawm hnuah kum tawp Dec. 10 aṭang chuan cancer natnain a tibuai ṭan a, AMRI, Kolkata-ah te kalpui a nih hnuah a khat tawkin New Life Hospital-ah a lut fo a. In lamah enkawl zui reng a ni bawk a. August ni 31 chhuna a khua a sik chu nikhaw hre loa awm zuiin ICU-ah dah luh a ni a. September ni 12 zing dar 5:20 ah Pathian hnenah a chawl ta a ni.

Pu R.Thankhuma Sailo dam loh chungchangah Kohhran mipuite leh ṭhenawm khawvengten amah an buaipuina leh an duhsaknaah hian lawmthu sawi zawh sen ngaih loh tur lawmna kan nei a. A damloha ICU-a dah luh a nih hmaa lo buaipuitute chungah kan lawm em em a. Tin, nu leh pa, YMA, nula leh tlangval leh Aizawl veng hrang hrang leh khual khua aṭanga lo kalte chungah lawmthu kan sawi mawlh mawlh a ni. Tin, amah enkawltu Doctor leh nurse, in lama buaipui ṭhintute zawng zawng chungah lawmthu kan sawi mawlh mawlh bawk a ni. A vui nia zaipawl leh Dinthar Corps Band-te, thusawitu hrang hrang leh amah sunna huna lo tel ve te zawng zawng chungah lawmthu kan sawi nawn leh e.

“Nangmaha chakna nei mi chu a eng a thawl e; A thinlunga Zion panna lamliante awma chu. Ṭahna ruam chu an zawhin tuihna awmnate an siam ṭhin a, A ni, ruah tui tla hmasa chuan malsawmnain a khuh ṭhin. Chakna aṭangin chak lehzualnaah an kal ṭhin a, Zion0ah Pathian hmaah an inlan ṭheuh ṭhin.” – Sam 84:5-7

2 thoughts on “R. Thankhuma Sailo (1936 – 2018)

    1. Pawisa chawi a awm lo. Mahse nakum lamah chuan video bik siam man hi chu tam lo te tak a ngai ve mai thei. Pakhat khawih nan darkar eng emaw zat a duh ve a. Chanchin hrim hrim chu a thlawn zel ang

Leave a Reply

Your email address will not be published. Required fields are marked *

error: Content is protected !!