R.K. Lianzuala (1966 – 2019) chanchin leh a hnathawhte

R.K LIANZUALA (1966 – 2019) CHANCHIN LEH A HNATHAWHTE

Mizo pa ropui leh huhang nei lian, kum 53 mi lek nia boral ta R.K. Lianzuala hi Pu Sawichhunga (L) ( Under Secretary,Mizoram Legislative Assembly) leh Pi Lianmawii ( L ) te inkarah May ni 29, 1966 khan Champhai khua ah a lo piang a, an unau hi mipa pathum leh hmeichhia pali niin amah hi unau zinga a tlum ber (naupang ber) a ni. A chanchin kimchang chu a hnung lamah kan dah a, a tir lamah a dam loh dan te, social media leh media lama a rawngbawlna te kan sawi hmasa dawn a ni.

A dam loh dan : Kum 2018 February thla vel aṭanga insawisel ṭanin a inentir hnuah chuan cancer a ni tih hmuh chhuah a ni a. Chuta ṭang chuan chemo te lain phai lam Vellore-ah te vawi eng emaw zat an kal bakah Aizawl lamah pawh in lam leh damdawiin lamah enkawl chhoh reng a ni a. A taksa a chak lo chho telh telhin March ni 14 zanah chuan Ebenezar Medical Center, Chawnpui Aizawl-ah ICU ah dah luh a ni a. March ni 9 (inrinni) chhun dar 11:15 ah chuan a natna ata Pathian hnena chawl turin, amah lainattu leh hmangaih taka enkawltu a chhungte chu a lo kalsan ta a ni.

Mizoram Images, Mizoramimages, mizo mi larte thi,

R.K. Lianzuala ruangin an in a thleng lai

MEDIA, SOCIAL MEDIA LAMA RAWNGBAWLTU R.K. LIANZUALA

Pa tlawmngai, mite fak rawn, a aw ṭha tak leh thil a sawi ngaihnawm thiam em avangte leh a hriatna zau tak hmanga midangte a tih bengvar ṭhin avanga mite hriat hlawh, Zonet Cable TV neitute zinga mi R.K. Lianzuala boral thu chuan Mizo mipuite a ṭhawng hle mai. TV lamah documentary tam tak Mizo ṭawnga leta sawi fiah ṭhin a nih avangte leh mi langsar tak takte kawm kuala thiam taka titi pui ṭhin mi a nih avangin amah chiang taka hre ngai lo pawhin a aw ri pui tak chu an hre tawh hlawm ṭheuh ngei ang.

Pu R.K. Lianzuala hian Facebook lamah chuan February ni 23, 2018 thleng khan ni tin thu thar post-in midangte tan rawngbawl hna a thawk ṭhin a. A thuziakte chu mi sang chuang fein an chhiar ṭhin a. Thu a post mai a ni lo a, a thuziak commenttute chu mi chhia leh mi ṭha thliar hrang loin an za vaiin ang khatin a en a, a theih chen chenah a chhang let ṭhin a, chuvang chuan mi tam takin amah an ngainat zual phah a ni. February ni 23 hnu lamah erawh Cancer natnain a tihbuai avangin thuziak peih loh ni a nei ta fo mai.

A natna Cancer chu Doctor ten theihtawp chhuahin an enkawl a, Pathian mite ṭawngṭaipuina nasa takin a dawng bawk a. May ni 13, 2018 ah ‘LALPAN MIN TIDAM TA’ tih thupuia hmangin Pathianin a enkawl dan leh doctor pawhin a dinhmun a ṭhat thu a hrilh tihte, miten an ṭawngṭaisakna rah vang liau liaua Pathianin tidam a nih thute leh a lawmzia te a post a. Amaherawh chu cancer natna chuan a tibuai zui leh ta a.

Amahina a status a update, a thu post hnuhnung ber chu May ni 20, 2018 daih tawhah khan niin ‘Pestikos Thilpek’ tih a ziak a. Chu a thuziak paragraph hmasa berah chuan “In za-in Pentikos Ni chibai ka bûk a che u. TT 2-a he ni thlen dan kan hmuh hi a ngaihnawm hle mai a, a awhawm bawk a, a hlawhtling hle a, Petera sermon ngaithla, baptisma chang pawh 3,000 lai an ni. Bung 3-ah Petera leh Johana’n pian tirh ata kebai, kutdawh, Nazareth Isua hminga an tihdam thu kan hmu zui bawk, Solomona hulhliapa Petera sermon nen.” Tiin bul a ṭan a, a thuziak khar nan ‘Tuk chhuah nuam vek u le’ tiin ni danga a tih dan ṭhin bawkin amah follow-tute chu duhsakna a hlan zui a.

Ni 15, November, 2018-a a facebook wall lama a dam ṭhat leh ṭhat loh an va zawh chu, “Dam ṭha lek lek e” tiin a la chhang hram hram hram a. Hei hi ama wall lama a awka hnuhnung ber niin a hriat ta a ni. Hemi hnu hi chuan a wall-a dam ṭha tura duhsakna thu an hlan pawh chhan let chu sawi loh like pe peih pawhin a awm tawh lo.

R.K. LIANZUALA (29th May 1966 – 9th March 2019) CHANCHIN TLANGPUITE

Zirna lam

1.HSLC- 1982 ( MBSE-ah 2 na)
2.BA ( Sociology Honours) 1987 ( Gold Medallist )
3.MA (Public Administration)-1989 (Gold Medallist)
4.Diploma in Broadcast Journalism (UK)

Hna thawh tawhte

1.Teacher,St.Paul’s High School
2.Editor,Printing & Stationery Dept. Govt. of Mizoram.
3.Casual News Editor, AIR, Aizawl
4.Asst.News Editor, AIR, Aizawl
5.Managing Director, ZONET Cable TV Pvt.Ltd.

Rawngbawlna lam

1.Bethlehem Branch KTP ah Branch OB a chelhkim
2.Venghlui Pastor Bial KTP ah OB a chelhkim
3.Zaipawl Conductor, Bethlehem branch leh Venghlui Pastor Bial
4.Central KTP,Committee Member (1992-94) Asst.Secretary (1994-96)
5.PYF Committee Member (1992-94), Asst.Secy. (1994-96), Secretary (1996-98)
6.Bible Soceity, Aizawl Auxiliary Youth Secy & Vice President
7.Council Member, Council for World Mission (CWM) (1999-2001)
8.Presbyterian Youth Triennium, USA ah a tel (1995)
9.Samoa ram CWM Meeting leh Scotland,Leaders Conference ah a tel( 1999)
10.2004 kumah Bethlehem Presbyterian Kohhran-ah Upa atan thlan tlin a ni a, mahse khatih lai khan All India Radio Asst. News Editor hna a thawh lai a nih avangin zan lamah tlai tak taka hawn a ṭul ṭhin avangin leh Kohhran rawngbawlna ti ṭhuanawp thei dawna a hriat avangin Pathian leh kohhrante kohna chu zah tak chungin a pawm ta lova, Ordain a ni ta lo. Hei bakah hian Branch KTP, Bial leh Presbytery Conference, Financial Campaign leh Programme ah Speaker-ah an la hmang ziah a ni. Bethlehem Kohhran hian Thuhril rawngbawl hna leh Puitling Sunday School zirtirtu leh Pavalai Vice Chiarman hna a la chelh ve mek a ni.

A unaute

1.Dr. RL Dangvela, Specialist ( Obstetric & Gynaecology,Civil hospital,Aizawl)
2.Lalthanpuii, Associate Professor (Govt.Hrangbana College )
3.Lianthangpuia (L) MBBS a zirlaiin a boral
4.Rinchungnungi, Associate Professor (Govt.Hnahthial College)
5.Zonunsangi, Postal Asst. Aizawl
6.Zatinchhingi, Bethlehem. Aizawl.


(Mizoram Images Production chuan R.K. Lianzuala boral hi a ui em em a, amah sunna leh hriatreng nan he thuziak hi a hlan a ni. He thuziaka ‘Zirna Lam’ tih aṭanga a hnu lam hi whatsapp aṭanga kan lak a ni)

Leave a Reply

Your email address will not be published. Required fields are marked *

error: Content is protected !!