R.K. Lalhluna chanchin

R.K.LALHLUNA CHANCHIN (Biodata of R.K. Lalhluna)

Thlahtute leh hnam hming: Ralte Kawlni (Helhlah) hnam a ni a. Thlahtu kan chhui theih thui ber chu Pasalṭha Chawngchhuaka, ram lama thangchhuah  a ni a. Chawngchhuaka fapa Saizinga, lal Sepuia khaw pa chak leh zaithiam chuan kum 1898-ah R.K. Kalkhangliana a hring a. Ani chu 1917-1918-ah France ramah Voluntary Labour-in a kal a. R.K. Kalkhangliana chuan R.K. Lalhluna a hring a. Chu chu a fapa dam chhun a ni a.

Pian hun : R.K.Lalhluna chu 9th October, 1938-ah Lunglawnah a lo piang a. A pain S.D.O. Lunglei hnuaia hna chhete a vawn lai a ni a. Jarman Sap ṭhatzia chawiin a fapa hmingah Sapnuntluanga  a sa tituai a. Mahse a nu’n a pai laia a hming a lo hriat lawk Lalhluna (Lalpa Pathian chawiin) a sa ta zawk a ni.

Naupan lai: Naupang bawrhsawm leh hrisel lo tak, khawsik leh pum nat ching tak a ni a, thahruiah rual a pawl phak vak lo ṭhin a ni. Naupang thang kam leh sava veh peih tak a niin, infiam ngaina, thiama sawi tur ni vak lo hi a ni a.

Lehkha zir dan : School a kal hmain a nu’n ziak leh chhiar thei chauhvin a kaihruai a. Class A, Lunglawn Primary School-ah kum 1946-ah a zir ṭan a, tluang taka zir chho zelin 1950-ah Class IIl a zir zo va. Kum 1951-1953-ah Lunglei High School-ah a kal a, 1954 aṭangin lehkha zir a chawlhsan a, chumi chin chu regular-a lehkha a zir chin chu a ni a.

Kum 1968-ah lehkha zir leh hnuhnawhin, New Activities High School, (Pu Sanghlira Colbert School)-ah kalin Private Candidate-in H.S.L.C. a exam a, mahse a failed a. Kum 1973-ah Primary Sikul zirtirtuah a ṭang a. 1977-ah Teacher Candidate-in H.S.L.C. chu Third Division-ah a pass ta a ni. Pre University College chu harsa takin a zir leh a. Eng emaw tiin a nam liam leh a, kum 1984-ah B.A. a pass ta a. Chu chu lehkha a zir dan tlangpui chu a ni a. 1978-1979-ah Diploma Primary School Teacher training a zo leh bawk.

Kut hnathawh lam: Kum 1954-1972 thleng zo hna chi hrang hrang a thawk a, pa buh ei nei thei lo tak a niin buh a ngah ngai lo va. Thingzai te a zuarin thing tum 300 chuang a zai hial awm e. P.W.D. Labour hna rei lote a thawk bawk a. Mi hna bawt deuh tak, rualpawl ve angreng tak a ni a. Ama tawkah rit lak a chak fu-in lo vah leh buh tuhah pawh rual a pawl hle a. Lo vahah tha ruk pumhlum a sennaah mi’n buh ṭin thum dawn lai an tuh a, amahin ni khatah ṭai ṭin hrut zet a tuh zo bawk a ni. Zirtirtua a tan tawh hnuah Mizo thembu hi za tam a siam a, a site income siamna ber a ni a. Darkar khat chhungin Mizo tukrek/sahrek pali a peih hman a ni.

Infiamna lamah : Infiam ve ṭhin, Champion ni ngai lem lo a ni ber a, a ke a chhiat tawh hnuah Badminton leh Draught khelh a uarin a vantlang ve viau a, Badminton-ah Veteran-ah Ṭawipui Constituency-ah single leh double-ah a champ a, chu chu a thlen san ber a ni a. Draught a thiam vanglai chuan hneh loh a khel lo a ni.

Politics lamah: Kum 1958-ah United Mizo Freedom Organization (Zalen) pawl a zawmin Unit Assistant Secretary a ni a. UMFO chu EITU-ah inletin Lunglei Sub-Division-ah Working Committee member a ni leh a. EITU atanga bang lehin MIZORAM Pradesh Congress Committee- ah a lut leh a, chutah pawh chuan District Level-ah Working Committee member a ni a. Ram a lo buai a, Congress pawl chu a tiavaiin Politics a chawlhsan ta rih a. Kum 1971-ah Mizo Union Party-ah a lut a. Lunglawn V.C. ah 1972-ah Bye Election-ah thlan tlin a ni a. Lunglei District-a siam a nih hnuah District levelah bawk Mizo Union-ah Working Committee member a niin Nomination Committee member a ni leh a. 1973 February-ah sawrkar hnaa lutin Politics a chawlhsan ta a ni.

Sakhuana lamah : Nu leh pa ringtu tuak kara seilian a niin Kristian saa piang a ni ber a, a hun zawng zawngah Isua hi Pathian fapa a nih leh chhandamtu a nih ringhlel ngai lova zui ṭhin a ni a. Rinna lamah chak lo mah se chak lo taka vuan tlattu ringtu a ni a. Kum 1968-1970-ah kahpah deuh takin Rev. H.Lalliana rawngbawlnaah a tel ve ṭhinin Evangelist angin rawng a bawl ve ṭhin a. Kohhran Sunday School Secretary te, Zaipawl Secretary te leh ṬKP-a puipa pawl nihnate a vuan ve tawh ṭhin a.

Prabhu Samachar Samiti (Vaiho zinga rawngbawltu pawl) dinin Team Director hna kum 5 chhung vel (1980-1986) a chelh a, Tin, Chanchinbu GEGRAPTAI chu kum 1983 – 2003 chhung a thlawna semin a buatsaih bawk a. Pathian thu lam sermon leh article tam tak a ziakin Theology tih ve mai theih, Layman theology-a an chhal fiamsak ṭhin ‘Bible-a Hunbite Mitthlana’ tih chu a chhuah a, Open Air Evangelism’tih a letling bawk. Tunah hian St. John Gospel Amplified a siam zovin ‘Zirtirnate Bihchianna’ tih leh ‘Zawhna leh Chhanna’ tih a siam zo tawh bawk. Hebrew leh Greek a hmelhriat hlek bawk.

Sorkar hna lamah : 21st February, 1973-ah Primary School Teacher-ah lak a niin Zobawk P.S. II-ah 1975 thleng a thawk a. 1976 -1986 chhung Melkhat Primary School-ah a thawk leh a, 1986 kum chanve velah Head Teacher-a hlankai a niin 1986 – 1988 thleng Bualte-ah a thawk leh a. 1988 kum tawp lamah K.Ṭ.Primary School Ramtharah a thawk a. 2008, 30th September-ah a pension ta a ni.

Thu leh hlaa a hmalakna : Kum 2014 thleng khan Lehkhabu 31 a ziak tawh a, hla 45 vel, essay za chuang a ziak tawh bawk a ni. Thufing tawi 6 vel leh Play 4 vel a ziak tawh a. Chungahte chuan State Level-ah te, District level-ah te lawmman eng emaw zat a dawng tawh bawk a ni

Tahrik 24.3.1991-ah Rastrapati Bhavan New Delhi-ah Padma Shri Award (Lit.), President Venketarahman-an a hlan bawk. (Padma Shri chu India-in Civil mite chawimawina a neih san dan indawt aṭanga palina a ni. Mizote zinga a dawngte zingah pasarihna a ni. Chutianga thu leh hla lama hma a lakna kawngah chuan M.A.L. Lunglei te, Lunglei Drama Society-ten Certificate an hlan bawk. Tunah hian MAL, LWC, YWC-ah Senior Adviser a ni.

Nihna a chelh thenkhat : Lunglei District-ah Primary School Teacher Association President nihna a vuan tawh. MAL-ah Patron member leh Senior Adviser a ni tawh bawk a. Baptist Assembly hnuaia Committee peng khat, Social Concern-ah Committee member-ah a ṭang tawh bawk a ni. Lunglei District Farmers Association-ah Secretary a ni tawh bawk. INTACT-ah Committeemember a ni tawh bawk.

RK Lalhluna, Lalhluna, Padma Shri RK Lalhluna, Padma Shree RK Lalhluna, RK Lalhluna photo, RK Lalhluna image, RK Lalhluna picture,
RK Lalhuna (middle man)

Chhungkaw lam : R.K. Lalhluna te unau hi paruk lai piang mah se a dam khawchhuak chu pahnih chauh an ni a. A u Lalzami chu kum 1928-ah a piang a. Ani hi 1938-ah a piang thung a. A pa chu R.K. Kalkhangliana (1898-1968) niin a nu chu Laithangpuii (1900- 1990) a ni a. Kum 1970 July ni 8-ah P.C. Vanlalnghaki nen Kohhran dan puitlingin an innei a, ani nen chuan fate- Vanlalringi (1971 – 1974), Lalramlawmi (1972-) Vanlalpuia (1974-) Lalringliana (1975-) te an nei a. Tunah hian tu panga Malsawmtluangi (1999-), Biakropuii (2001 -), Saidingpuii (2003-), Deborah Lalremruati, Joshua Lalfakawma te an nei a ni.  Zirna lamah Lalramlawmi hi B.A. Hons a ni a, Primary Schoolah zirtirtu hna a thawk mek a ni. Vanlalpuia, B.A.Hons. te, Lalringliana, H.S.L.C. te an ni.

A tuina te : R.K.Lalhluna hi mi hawi zau leh hawl zau tak a ni a. Tuina a ngah hle a, chungte chu

1.Vah chhuah: Pasalṭha ang maia silai hum leh hum lo pawha vahchhuah nuam ti mi a ni a, sa leh therhlo, zuangban ilo kapa awk zeuh zeuh ṭhin a niin sakhi te a awkin sazuk leh sanghal a kap bawk a. Mite zar a zo hle bawk ṭhin a ni. Sa, Zorama hming nei deuh chin a ei tawhte chu Sai, Sele, Sazuk, Sanghal, Saza, Sathar, Savawm, Sakei leh Sakhi sate a ni a. Sachhia pawha ei kim thawkhat a ni. Tunah chuan Vegetarian a ni a, Carvonarian rilru a chhuahsan tawhin ram vah a bansan tawh a ni.

2.Dapchhuah: Thil awmsa hmuhchhuah hi a tuina a ni a. Chawngbawla thlan awmna te a thuin a chhuichhuak a, Zampuimanga thlan te, Zawlnei Darphawka thlan te, Pu Darchhunga, ringtu a nih avanga a puten a nupui an chhuhsak tak thlan te a dapchhuak bawk a ni. Hmanlai Chawngtui khua (An chai rei avanga pamṭulte awmna khua) a tlawh chhuak bawk. Heng a hmalaknate hi mipuiin an ngaisangin an um zui ṭhin a ni.

3.Ram chhe siam ṭhat: Thingtlang leilet siam hi thil tihmakmawhah a ngai bawk a, Lunglawn ram chhe tak chu thingtlang leileta siamin a buatsaih puitling a, tun thleng hian enkawl a la ni.

4.Zirtirna dik lo dodal : Zoramah Bible zirtirna ziktluak mang lova inkaihhruaina tam tak awmin a hria a, a theih ang anga ṭan la-in a dodalna a chhakchhuak ve ṭhin a. Chanchinbu te buatsaihin hma a lain Politics lama kalsualna te hi a ruh lang rawt lovin a khik khak bawk ṭhin a ni. ‘Zirtirna Bihchianna’ tih a ziak bawk. Amplified St. John Gospel a buatsaih bawk. Zawhna leh Chhanna a buatsaih bawk.

5.Thu leh hla lam : Thu leh hlaa tui mi a ni bawk a, thu leh hla tam tak a ziakin Bible ziakna ṭawng bul Greek leh Hebrai te pawh hmelhriat tuma zirin hma a la chho bawk ṭhin a ni. Lehkhabu kawm ngeih mi a niin mi inchhiar zau tak a ni bawk. Lehkhabu hmuh har tak takte a dapchhuak ṭhin a ni. Tuk tin Bible bung khat a chhiar ziah ṭhin a ni. Inti-upa mai lovin Social Change hi a inlehpelhtir ngai lo a ni. Music leh Expedition hi a hoba ni.

Tlangkawmna : Heng kimchang lem lo taka kan han tarlan te hi R.K.Lalhluna nihphung ṭhenkhat chu a ni a, a lo pian aṭanga tun thlenga kaihruaitu Pathian zarah a nih nih a ni chho mek zelin Primary School Headmaster (Selection Grade) niin kum 2008-ah a pension ta a ni. Tunah hian a nupui fanaute nen Lunglawnah an khawsa mek a ni.

R.K. Lalhluna kutchhuah / R.K. Lalhluna lehkhabu ziahte chu

1.Thlanrawkpa Khuangchawi (C) 1977

2.Lal Seipuia pasalthate (Hf) 1977

3.Keimi (Myth) 1977

4.Senglawn Zo (Hf) 1978

5.Pipute arsi chhuina  (Ast) 1978

6.Thawnthu tawi (Fb)  1978

7.Staff Notation zirna (Mus) 1982

8.Chawngkhupa (B) 1983

9.K.Hauhthanga (B) 1985

10.Fam Lalzova (B. Col.) 1986

11.Open Air Rawngbawlna (NS Tr)  1987 

12. Darphawka (B) 1993

13.Appolo Munubi (NS Tr. Col.)  1993

14.Martar Vanlalliana (B)  1993

15.R. Lalthanga (B) 1999

16.Chhailai Di (Hf)  2005

17.Staff, Tonic Solfa Zirna (Mus) 2009

18.Mitthlana (NS) 2003

19.Mahnia Music zirna (Mus) 2009

20.Darlenglehi (B) 2010

21.Bihchianna (NS) 2011

22. St. John Amplified (NS) 2011

23.Zawhna leh Chhanna (NS) 2011

24.Rev. Thankunga (B)2011

25.Lawhlei (Mus) 2012

26.Rothangpuia & TH.Lewin (Hf)2013

27.Mizo History Kamkeuna  (H) 2013

28.Zoṭawng Dictionary (L)  2013

29.Awithangpa   (B)  2013

30.K.Papuia (B) 2014

31.Mizo tawng Grammar (Cinque foils)   (L)  2014

32.Latin, English, Mizo Dictionary  (L)  2016

Lehkhabu nihnate : Historical Fiction (Hf), History (H),, Mythology (Myth), Music (Mus), Non-Secular (NS), Secular (S), Astronomy (Ast), Fable (Fb), Biography (B), Auto Biography (Ab), Language (L), Translation (Tr), Comics (C).

Leave a Reply

Your email address will not be published. Required fields are marked *

error: Content is protected !!