PU PC ZORAM SANGLIANA’N KOLASIB VENGTHAR AH MHIP DAY HMANPUI

Vawiin khan Kolasib bialtu MLA Pu PC Zoram Sangliana chuan Kolasib Vengthar Community Hall ah MHIP day vawi 44 na a hmanpui.

Khuallian chuan Vengthar MHIP te chu MHIP day vawi 44 na a hmanpui theih avangin lawmawm a tih thu a sawi a, he huna MHIP member kalkhawm te chu MHIP member an nihna chhan hrechiang turin a chah a, nunau, tleirawl tanpui ngaite tanpui tura inpe tur annnih thu sawiin, an hmeichhe pui te mai bakah midang tanpui ngaite tan penchhuak fo turin a chah bawk a ni. Mizoram ah a bikin Kolasib District chu HIV/AIDS hluarna ani a, hemi kawngah hian MHIP te chu tihtur tamtak an nei, mahni inchhung bakah khawtlang ah pawh hmeichhia bakah mipa te pawh mahni nun theuh uluk taka vawn a pawimawh na te tlangaupui fo turin a chah a ni. Pu PC Zoram Sangliana chuan  MLA fund hmanga Kolasib Vengthar MHIP building sak thar chu a hawng nghal a, Vengthar Branch YMA building saknan MLA fund cheng nuai 1 a hlan bawk a ni.

Hemi bakah hian Kolasib bialtu MLA chuan Zoram Driver’s Union, Kolasib Sub Hqrs office sak tur lungphum a phum bawk a, Office sak tur bul tan nan hian MLA fund cheng nuai 5 a pe bawk a.  Pu Zoram Sangliana chuan ZDU Office sak tan tura  ruahman ani chu lawmawm a tih thu sawiin Office chu Driver te tan chauh nilo harsatna tawk tupawh mi harsa zawkte tan pawh tluk luh ngamna hmun nise a duh thu a sawi bawk a, ZDU Office chu mi nawlpui tan pawh malsawmna thlentu ni turin duhsakna a hlan a ni. Bialtu MLA chuan Driver hna chu hna pawimawh tak ani tiin ram pawna veivak tamber pawl an nih angin mizo hmel ti mawitu a tang hram hram turin a chah a,  ZDU te hmalakna  fakawm tak Ramthim Board chu chhawmnung zelin kawng hrang hranga harsatna tawk mi beidawng leh mangang te tan tlukluh ngamna pawl ni chhunzawm zel turin a sawm bawk a ni. -DIPR

Leave a Reply

Your email address will not be published. Required fields are marked *

error: Content is protected !!