Piansualnain a hneh theih loh Nick Vujicic-a

Nick Vujicic-an (Nik Vuichik-a tia lam tur) piansualna a hneh dan leh mite cho phurtu a nih dan te Pu Gilbert Renthleiin Makedonia chanchin bu October ni 6 2013-a a chhuah ngaihnawm leh rilru hneh tak hi i han sawi chhawng teh ang.

-Gilbert Renthlei

Pian leh murna : Kum 1982, December ni 4-ah Pastor Bruce Vujicic leh Dushka Vujicic te inkarah Australia khawpui Brisbane- ah a lo piang a. A nu hi Nurse a ni a, khawvel êng a rawn hmuh hian kut ke kim lovin a lo piang a; kut pawh nei lo ke mumal pawh nei mumal lo va a rawn piang hlim chu a pa Bruce Vujicic-a’n a hmuh chuan Bathroom-ah luak turin a tlan lut hial a, a nu Dushka Vujicic-i phei chuan thla li a nih thlengin a pawm ngam lo hial ani. Chutiang taka Nick Vujicic-a an râp em emna chhan chu natna vâng tak Tetra-amelia-in a thlen piansualna, ban bul leh ke te tak te nen chauha a lo pian chhuah vang a ni.

Naupan lai : Hetianga rualbanlo saa piang ni mah se Nick Vujicic-a chu naupang hrisel tak a ni a, mahse a piansualna chuan a nunah hrehawmna leh harsatna tam tak a thlen ṭhin a, sikul a luh dawn hian pianphunga rualban lo chu mi pangngaite sikula luh ve phal a ni lo va, rualbanlote sikula luh tur a ni. A nu chuan rualbanlote sikula a luhtir dawn chuan a rilru a pangngai em em bakah rilru chak tak a ni si a, rualbanlo sikula luhtir chu a ngaingam lovin a remtih loh mai bakah a fapa tan ṭha dawn lo va a hriat avangin theihtawpin a fapa tan hma a la a. Sawrkar thuneitute leh Sikul lam thuneitu hrang hrang te a be kual a, a tawpah a fapa chu Sikul pangngaiah a luhtir thei ta a ni. Naupang rilru chak leh thiam thei tak a ni a, Victoria State Premier pawhin a hranpa ngatin a tlawh a, amah Nick-a avang hian naupang rualbanlote chunga khawtlang rilru put dan pawh nasa takin a danglam phah a ni.

A theihnate mi dang tana chona ni turin : Nick-a hian sikul a luhnaah hian harsatna tam tak a tawk a, naupang dangten an tiduhdahin a piansualna avangin an chhaih nawmnah a, a rilru a hrehawm hle ṭhin. Mahse chung hunah te chuan Kristian chhungkua aṭanga seilian a nih angin a rilruah Bible chang Sam 139 : 17, 18 “Aw Pathian, i mi ngaihtuahnate chu ka tan a va hlu em; Chhiar sen rual a ni lo. Chhiar dawn ila, ṭiau vaivut aia tam a ni, Ka han harh chuan i kiangah ka lo awm reng a ni,” tih thu hi a lo awm ṭhin a, chu thu chuan a thlamuan fo thu a sawi. Hetianga tihduhdahna leh hmuhsitna a tawn ṭhin avang hian beidawnna leh thinrimna nasa tak a nei ṭhin a, kum 8 mi a nihin mahni inthah a tum a, a hlawhchham a. Kum 10 mi a nihin tuiah inhnim hlum a tum leh a, mahse a nu leh pa amah hmangaih em emtute a ngaihtuahin a ṭhulh leh a ni. Pathian hnenah vawi tam tak a ban leh a ke te ṭotir tura a dil hnuin Nick Vijicic-a chuan a thiam thil leh a theihna te, mi dang anga nung thei tura theihrawpa a beihnate chu mi dang tan chona nasa tak siam saktu leh mi thinlunga nasa taka thusawitu a ni tih a hre chhuak a, a nunna chelh saktu Pathian hnenah lawmthu a hrilh ta mawlh mawlh zawk a ni.

Beidawnna aṭanga beiseina : A nun khawhar leh beidawng taka a hman lai hian nikhat chu a nuin chanchinbua mi pakhat piansualna hrang hrangin a tlakbuak chanchin inziak chu a chhiartir a, he thu ziak hi a nun nasa taka thlaktu a ni ta a ni. Nick-a chuan amah chauh chu chutiang harsatna leh beidawnna tawk a ni lo tih a hrechhuak a, chu chuan tumruhna pek belhchhahin thil tak zawk tih theih tumin nasa takin hma a lak phah ta a, chung beidawnna hrang hrang a tawhte chu hneh tum tlatin a thinlungah tumruhna leh tawrhchhelna siamsaktuah a hmang ta zawk a ni. A tumruhna leh a tawrhchhelna avangin a ke tawitê vei lama a ke zungṭang pahnih hmangin a ziak thei a, Computer mouse leh keyboard te a ke hmangin duhtawkin a hmang thei a. Tennis ball te vawm theiin Drumset te a ke hmangin a vaw thei a, a ke hmang vekin a sam te a khuih theiin a ha te a nawt a, phone te a hmang theiin a bak hmul te a inziah fai theih bakah tuite pawh duh tawkin a in thei a ni.

Mi dangte cho chhuaktu atan : Ni khat chu Sunday Sikula an zirlai chuan a rilru a hneh em em a, chuta ṭang chuan a rinna chu Isua Kristaah nghatin mi dang tana malsawmna ni thei turin a hring nun chanchinte mi dang a hrilh ṭhin a. Hengte hian mi dang tana thu a sawi nasatzia leh an nuna harsatna hrang hrang an tawha tawrhchhelhna leh tumtuhna petu a nih ṭhin thu a hriat chuan amahah Pathianin thil tum a nei tih a hre chho ta a, a piansualna leh rual a ban lohna te chu Pathianin mi dangte cho chhuaktu atana hmanruaa hman a duh tih a hriatin a vawi khatna atan a chunga thil thleng zawng zawng chu Pathian malsawmnaah a pawm thei ta a ni.

Hlawhtlinnaah lut zelin : Pawl sarih a nihin “Class Captain” atan thlan a ni a, kum 17 a lo nih chuan Ṭawngṭai Pawl dinnaah thu a sawi ṭan a. Hlawkna um lo va mi dang tana rawngbawl saktu pawl “Life Without Limb” a din chho ta a ni. Kum 21 a nihin Subject pahnih Accounting leh Financial Planning-te major subject-a lain a graduate a, chumi hnu aṭang chuan Motivational Speaker (mite fuih leh cho phur zawnga thusawitu) niin tunlai ṭhalaite thil tawn hrang hrang leh ama nun behchhanin hmun hrang hrangah thu sawiin a zin kual ṭhin a. Kristian intawhkhawmna , Sikul leh pawlho intawhkhawmnaah te thu sawiin vawiin ni thleng hian mi maktaduai 30 chuang hmaah thusawi tawha chhut a ni. Heng bakah hian khawvel huapa show lar ber pawl Oprah Winfrey Show-ah te a inlan a, tin a hringnun chanchin tihlanna “Life’s Greater Purpose” leh “No Arms, No Legs, No Worries” te pawh a tichhuak tawh bawk a ni.

Hetiang taka a beihna leh mi dangte tana malsawmna nih tuma a beih avang hian kum 2005 khan Nick Vujicic chu “Young Australian of the Year” Award hlan a ni a. Hei bakah hian chawimawina tam tak a dawng tawhin February 12, 2012 khan Kanae Miyahara-i nen an innei a, fa duhawm tak mipa pakhat leh hmeichhia an nei a. Tunah hian an chhhngkuain Los Angels-ah an cheng mek a ni. A pawl din *”Life Without Limps” ah theihtawpa inhmangin mi dangte tan thuchah ropui tak tak puang chhuakin hun a hmang mek a ni.

Nivk Vujicic-a hian kan thil thlir dan te bihchiang turin min ngen a, harsatna kan tawh hrang hrangte thlir kan a, chung harsatna kan tawhte chu remchanga la a, hmasawn nan leh tisa leh thlarau ṭhan lenna atana hmang turin min fuih a ni. Nick Vijicic-a nun aṭang hian ṭhalaite leh eriniho hian zir tur kan ngah hle a ni. Kan zirlaiah te, kan hnathawhna, hna kan dilnaah te beidawng mai lo va vawi engemaw zat hlawhchham hnu pawha bei ṭang ṭang turin leh beidawnna chu inhnehtir mai lo va, hneh let zawk thei tura tum ruh leh tuarchhel turin min zitir a ni.

Leave a Reply

Your email address will not be published. Required fields are marked *

error: Content is protected !!