PI VANLALAWMPUII CHAWNGTHU HOVIN BIATEAH MHIP DAY HMAN A NI

Vawiin khan MHIP Biate Branch buatsaihin MHIP Day lawmna hun Zialung Community Hall, Biateah hman a ni a, he hun hi Cooperation, Sericulture leh Fisheries Department changtu Minister Pi Vanlalawmpuii  Chawngthu chuan khuallian niin a hmanpui a ni. Vawiin hian ‘Hmeichhiate leh Naupangte himna leh hmasawnna atana nasa taka tan lak’ tih chu thupuia hman a ni.

Khuallian chuan MHIP Day chuan nute hlutna leh pawimawhna a hriat thar tir leh thin thu leh mitinte hrilhnawn fotu nise a duh thu a sawi a. Mizoram sawrkarin hmeichhiate dinhmun hrethiamin hamthatnate a siam sak thu leh abikin hmeichhiate tan Village Council, Local Council leh Municipal Council-ah te reservation a siam sak a ni, a ti a. Heng bakah hian nupa inthen hnua hmeichhiate dikna humhimna ‘The Mizo Marriage, Divorce and Inheritance of Property Act pawh siam niin, tunhnaiah Cabinet pawmpuinain hmeichhiate leh Naupangte enkawltu tur Women & Child Development Department din tum a ni, a ti a.

Pasalte ngamlo ngam khawpa huaisente chu hmeichhe fing an nih thu sawiin, hmeichhiate chu Pasalte zai ngai thiam thin tur leh zahder thim turin a chah a. Mipa leh hmeichhiate chu inlawmtawna, intimawi tawn tur leh a tu te mah inngainep tur bik kan nih loh thu a sawi a. Women Commission hnuaia legal cell-ah ukil tha tak tak kaihhruainain hmeichhiate lak a hleilennate chinfel thin anih thu a sawi bawk a. Nu leh pa te chu fate leh kawppuite chin chang hre thin tur leh abikin nun dan hrisel chungchang inzirtirna chu  ngaipawimawh thin turin a chah a. Hrangturzo bialtu MLA chuan a bial chhunga gas hnianghnar zawka neih theihna turin East Lungdarah Gas Distributor thar bun anih theihna tur leh Mizofed Petrol pump, Keituma siam tuma hmalak mek anih thu a tarlang tel bawk a ni. MHIP Day hmang tura kalkhawmte chu hun nuam tak hmang tur leh MHIP vul reng turin duhsakna a hlan nghal a ni.

He hun hi Pi Lalthangpuii Sailo, Vice-President, MHIP Biate chuan a kaihruai a. Kumina puan tak HSLC leh HSSLC exama titha hmeichhe zirlaite chawimawina hun hman a ni a. Kum 80 chunglam MHIP Day hmang tura kalte chawimawina neih a ni bawk a. Pi R. Lalsawmi, Treasurer-in lawmthu sawina hun a nei a. Hemi hnu hian MHIP Day puala intihsiakna hrang hranga tithate hnenah lawmman semna neih a ni. Chawhma lam khan Biate MHIP President Pi Lalthuami Tochhawng kaihhruainain hun hlimawm tak hman a ni a. Secretary report leh member boralte sunna hun neih a ni a. Pi K. Lalengliani, Adolescent Councelor in thupui a sawifiah a. Intihsiakna hrang hrangte neih a ni a. Tlai lamah MHIP Day puala buatsaih chawhlui kilho nghal a ni.  -DIPR

Leave a Reply

Your email address will not be published. Required fields are marked *

error: Content is protected !!