Petera leh thiang lote hnena rawngbawlna – Lal Ramhluna Ralte – Mizo Sermon

Tirhkohte 10:13-14 Tin, a hnenah awin, “Peter, tho rawh; talh la, ei rawh,” a rawn ti a. Nimahsela Petera chuan, “Lalpa, ni lo ve; thiang lo leh bawlhhlawh engmah reng ka ei ngai lo ve,” a ti a.

Tute hi nge Pathianin a hman a, tute nge a tana chhawrnahawm ni thin tih hi ngaihtuahnaah a awm fo thin. Pastor pakhat chuan heti hian a sawi, “Full time-a Pathian rawngbawl tak tak tur chuan mi, naupan lai atang puitlin thlenga tha zik tluakte hi an tha ber,” tiin. A dikna lai pawh a awmin a rinawm. Amaherawh chu Pathian chuan mi, sualna kawng lo dai tawhte pawh a hnena lamlette pawh tangkai takin a hmang leh thin tih kan hria. Thlarau bo sengkhawmtu ropui tak tak hmuh leh hriat tur pawh an awm tih chu hai rual a ni lo. Engpawh chu nise, Pathian mi hman te chu tupawh chu lo nise keimahni theuhah seng lutin Pathian hman theihin ka awm em tih mahni inzawt fo ila a tha hle ang.

Kan Bible thu lak chhuahah khian Petera leh Lalpa inbiakna kan hmu a, he thu atang hian zirlai lo la chhuak dawn teh ang.

Joppa khuaa Petera a awm laiin chawfak hun laiin a in chungah tawngtai turin a kal a, chutah chuan a ril a lo tam ta a. Chaw ei a duh ta a. Ei tur an siam lai chuan englovin a zèl ta a. Tin, van inhawngin englo bawm, puan lian tak ang, a kil lia hlina leia uai thlain a hmu a; chu mi chhungah chuan fuliafa leh rannung leh chungleng sava tinrengte an awm a.(Tirh. 10:11-12)

Chung fuliafa leh rannung leh chungleng sava tinrengte chu ei turin awin a rawn hrilh ta a ni. Nimahsela Petera chuan chung ei thianglote chu a ei ngai loh thuin a chhang a ni. Nimahsela Lalpa aw chuan, chungte chu Pathianin a tihthianghlim tawh an ni a, thiang lo ti lo va ei mai tur a ni tiin a chhang a ni.

He tih hunlai hi Jentail mi, Sipai za hotu Kornelia mi tirhten Petera in an pan mek lai, an thlen dawn tepa thil thleng a ni.

Petera hian Jentailte hi chu juda miten bawlhlawh an ngaih ang chiaha bawlhhlawhah a ngaih avangin Chanchin Tha chu Jentail mite tan a nih ve a ring lo reng reng a, an ina kal leh tlawh chhuah chu a tihturah a ngai lo a ni. He laiah hian Lalpa chuan Peteran Jentailte a hmuh dan hriain fuliafa leh rannung ei thiang lo hmangin jentail, tlawh thiang lo, Pathian chhandamna pawh an chan ve tura a ngaih lohte hnena Chanchin Tha hrilhtir a tum avanga ei thiang lo hmanga a entirna a ni.

Kornelia mi tirhte a hnen an lo thlen chuan Petera chuan a thil hmuhte chu Kornelia hnena kal tura hriattirna a ni tih Pathianin a hriattir a. Tichuan Kornelia mi tirhte rualin Kornelia hnenah chuan a kal ta a ni.

Tichuan, Petera chuan tlawh thiang lo Jentailte hnenah chuan Chanchin Tha chu hlawk takin a hril ta a. Thlarau Thianghlim a lo thleng a, Baptisma chantir tur thu a pe ta nghe nghe a ni!

Mi invawng tha em em Petera, thiang lo ei ngai lova chuan, thiang lova a ngaihte hnenah ngei chuan Chanchin Tha a hril ta a, mi tam takin chhandamna an lo chang ta! Lalpa chu fakin awm rawh se.

Rawngbawltu tam tak hi chu thiang lo pawh nei lo, thil bawlhhlawh pawh khawih hreh chuang lova khawvel thil, tisa thil tinreng ham bawrh bawrh chunga rawngbawl thei tho kan tam niin a lang! Pathian mite tana thiang lo, khawih thiang lo, tih ve thiang lo khawvel thil kan tham nasat avangin thlarau bo kan man thei thin lo a ni. Rom 12:2 ah “He khawvel dan ang hian awm suh ula; Pathian duhzawng, a tha leh lawm tlak leh, that famkim chu in hriatfiah theih nan, in rilru a thara awmin lo danglam zawk tawh rawh u.” tia min hrilh laiin khawvel nen nun inzawm, (compromise) chungin rawng kan bawl a, khawvel mite duh ang duhin, an chin ang te kan ching ve zel a, khawvel mite rualin ke kan pen avangin khawvel mite chu Krista hnenah kan hruai thei thin lo niin a lang.

Thiang lo leh tenawm Jentail hnena rawngbawl tura Pathian kohna changtu Petera hi a va invawng thianghlim em!

Mi bawlhlawh, khawvel mi, sualin a phuar mekte hnena Krista Chanchin Tha hrila Isua ke bula hruai thei turin Lalpa mite hian intihthianghlim a va mamawh em!

Khawvel mi, setana duhzawnga awm thinte hian Lalpan a tithianghlim tawh a ni tih an hre lo va, chung mite chu Krista ke bulah hruaia Pathian chhandamna an chan theih nan Petera anga mahni nun vawng thianghlim chung siin an hnena kala rawngbawl turin Lalpan a ko che a ni.

Thianghlimna kawng, mi bawlhlawhte kal vena tur ni lo, mi bawlhlawhte tân ni siah hian mi bawlhhlawhte chu an lut tur a ni si a.(Isaia 35:8).
Pathianin malsawm rawh se.
Tuk chhuah nuam u le.

Leave a Reply

Your email address will not be published. Required fields are marked *

error: Content is protected !!