PAULA THU NGE DIK LAL ISUA THU
(Hmelmate lu chungah meiling chhek khawm tur nge kan nih hmangaih tur.)

-Lalṭanpuia Ngente

Unaute mai bakah hmelmate thleng pawha hmangaih tura min zirtir mek laiin an chhiatna tur duh ang hrima an lu chunga meiling chhek khawm dan han inzirtir chu a Kristian lo kan ti deuh em. Mahse, hei hi Bible ah a chuang ve tlat mai si a ni.

Paula chuan Rom 12:20 ah chuan, “Chuvangin i hmelma a rilṭam chuan ei tur pe rawh, a tuihal chuan in tur pe rawh: chutiang i tih chuan a lu chungah meiling i chhek khawm a ni ang” a ti a.

Lal Isua erawh chuan Mathaia 5:44-48 ah chuan, Kei erawh chuan ka hrilh a che u, in hmelmate chu hmangaih ula, a tiduhdahtu che u chu tawngtaisak rawh u, in Pa vana mi fate in nih theih nan;…… In hmangaitute chauh in hmangaih hian lawmman engnge in hmuh ang? chhiahkhawntute pawhin chutiangin an ti ve lawm ni? Tin, in unaute chauh chibai in buk hian engnge in tih hnem chuan bik? Jentailte pawhin chutiangin an ti ve lawm ni? Chutichuan, in Pa vana mi a ṭha famkim angin in tha famkim tur a ni.’ tiin min zirtir thung a.

Paula leh Lal Isua hian hmelmate pawh ni se ṭanpui an ngaih chuan ṭanpui turin min zirtir ve ve a, mahse kan thinlung min buatsaih an tum dan erawh chu a inchen lo tih kan hmu thei ang. Paula chuan hmelmate ṭanpui chu an lu chunga meiling chhek khawm dan a ni tiin min zirtir a, Lal Isua erawh chuan ṭha famkima kan awm theih nan leh kan Pa vana mi fate kan nih theih nan hmangaih turin min zirtir thung a. Paula theology leh Lal Isua zirtirna hi a inrem chiah lo em maw ni le tiin a ngaihtuah theih awm e.

Inrem lo lo ve. Amaherawhchu Lal Isua hian Pathian ram thu ngialngan takin a sawi a, Paula erawh chuan kan chak loh zia ang milin thu min hrilh thung a. Min hruai thlen an tumna chu Pa angchhungah ve ve a ni. Lal Isua chuan van khawpui nun min kawhhmuh a, Paula chuan khawvel sual kara keini mi chaklote khawsak dan tur min kawhhmuh thung a, an thuin a thlen chin a inchen lo deuh chauh a ni. A pahnih hian Pathian thu ve ve a ni a, ṭha zawk leh ṭha lo zawk a awm chuang lo.

Pathian thlarauin a luah khah leh thlarau hruaia awm tak takte chuan Lal Isua thu hi a takin an luah thei em em a, Paula ngei pawh hi chutiang zingah chuan chhiar theih a ni. Amaherawhchu, ringtu tam berte hian chu nun chu kan luah phak si loh avangin Paula chuan Pathian thlarau hriattirin mi chaklote kan him dan tur min zirtir mai chauh a ni.

Ni e, Pathian fate hi mihring ve bawk kan nih bakah khawvela awm kan la nih rih avangin min phuartu thil, chhungkua leh fanau te, eizawnna leh thil dang tam takte a awm a, chuvangin ringtu famkim zo lo, thlarau hruaina fir hlang chauha nung thei lo kan la ni hlawm rih si a. Paula te anga engkim thing thlaa inserh hrang ngam ni hlawm ila chuan zirtirna dang kan mamawh lo vang.

Chutiang chu kan nih avangin hmelmate leh hmusittute vanga rilru na thei, thinrim thei, hrehawm ti thei, lungngai thei kan la ni tlat mai si a. Kan rila rahte leh min hmangaihtute chu zirtir pawh ngai lovin kan hmangaih ve thei mai a, mahse, hmelmate leh dik lo taka min titute chu Pathian avangin khing let lovin insum hram hram thei mah ila, an mamawh te pawh pe thei hial ṭhin mah ila, hmangaih kher erawh chu harsa kan ti ṭheuh mai. Zêp lovin sawi duh ta hlawm ila chuan, chutianga hmusit leh dik lo taka min titute chuan min tih ang tiat vel tawrhna engemaw tal tuar ve se tih duhna thinlung hian ringtu nun hi a chhuah san fel fai hleithei lo chu a nih hi.

Hetiang hi kan nih avangin kan Pathian hian a fate hi min hre chiang em em a, chutiang hunah chuan thlemnaah hnuh luha kan awm lohna tur leh khawvel mite ang maia suala kan tluk luh loh nan amah zawkin kan thinlung nâ damna turin hma min lak sak zel tur thu Paula hmangin min hrilh a lo ni.

Lalpa chuan a mite hi min ngaihtuahin min humhalh em em a, thlemnaa hnuh luha kan awm leh suala kan tluk luh a phal lo va, a lo thlawna kan tawrh lah a phal hek lo. Chuvangin kan nâte chu min phurh sakin Ama chungah a bel vek ṭhin a. Tichuan, ama’n kan phuba te min lak sak zel theih nan leh keini hi suala kan tluk luh loh nan kan chunga ṭha lo taka titute chu khing let mai lo va Ama chungah engkim nghat tlat ṭhin turin min duh a, a rorelna lo thlir mai ṭhin turin min duh a ni. Kan Pathian chuan hetiang tak hian min hmangaihin min humhalh a ni tih hriaa kan thinlung nâ damna turin amah chu hmang ṭhin turin mih duh a. Keimania rorelna kan lo lek ve mai chuan hmusittu leh dik lo taka ti tute nen thuhmun reng kan ni dawn a, chu chu kan Pathian hian a fate chungah thlen tir a duh lovin a phal lo a ni.

Rom 12:19 chuan, “Duh takte u, in phuba la suh ula, Pathian thinurna kian zawk rawh u, “Phuba reng reng keima lak tur a ni, keiman ka thungrul ang,’ Lalpain a ti,” tih ziak a ni si,” tiin Lalpa chuan a mite min humhalh zia leh kan phuba pawh min lak sak tur zia min hrilh.

Zakaria 2:8 ah pawh heti hian a sawi bawk a. “Sipaihote LALPA chuan heti hian a ti si a; Ropuinna tur angzia zelin a tikhawlotu che u hnam hnenah chuan min tir a ni: Nangni khawihtu chuan a mit naute a khawih a ni mai” tiin. Pathian hian a mite min humhalh zia leh kan chunga natna thlentute chungah chuan a ngawih mai mai dawn loh zia kan hmu.

Chutichuan, keini fa nihna chang tawhte hian engkhaw lawi lova khawvel mite hmusit leh hnuaichhiahna hi kan Pa hian a lo thlawn maia kan tawrh a phal lo va, a faten chutiang an tuar chu en liam mai a tum hauh lo mai a. Mahse, Aman kan phubate laa ro a rel zel theih nan leh, keini hi mi diklo te nen thuhmun renga suala chhiar kan nih loh nan a hnenah kan engkim, kan hlimna leh lawmna te, kan lungngaihna leh thinrimnate chu tê lua awm lova thlen zel ṭhin turin mi duh a ni. Chutianga tê lua awm lova thlen zel ṭhin tute chuan Pathian hliahkhuhna an chang zel ṭhin.

Lalpa hnenah kan engkim i thlen ṭhin ang u, Amen.

Leave a Reply

Your email address will not be published. Required fields are marked *

error: Content is protected !!